മഞ്ഞുമല ‘ഗൾഫിൽ പോകുന്നു’; അൻറാർട്ടിക്കയിൽ നിന്ന്​ 

ദുബൈ: അൻറാർട്ടികയിൽ ആർക്കും വേണ്ടാതെ കിടക്കുന്ന ഒരു മഞ്ഞുമല യു.എ.ഇയിലേക്ക്​ വരുന്നു. ദ നാഷ്​ണൽ അഡ്വസൈർ ബ്യൂറോ ലിമിറ്റഡാണ്​ മലയെ മരുഭൂമിയിലേക്ക്​ എത്തിക്കുന്നത്​. ഇതുമായി ബന്ധപ്പെട്ട വെബ്​സൈറ്റ്​ നിലവിൽ വന്നു. ജലദൗർലഭ്യമുള്ള പ്രദേശങ്ങളിൽ മഞ്ഞുമലകൾ ഉപകാരപ്പെടുമോ എന്ന പരീക്ഷണമാണ്​ നടത്തുന്നത്​. പദ്ധതിയുടെ നടത്തിപ്പിനായി ശാസ്​ത്രജ്ഞർ, വിദഗ്​ധർ, അൻറാർട്ടിക്കയെക്കുറിച്ചും മഞ്ഞുമലകളെക്കുറിച്ചും സമുദ്രത്തെക്കുറിച്ചും ആഴത്തിൽ അറിവുള്ളവർ എന്നിവരെ ഉൾപ്പെടുത്തി കമ്മറ്റി രൂപവത്​ക്കരിക്കുന്നുണ്ട്​. ഒപ്പം ലോകമെമ്പാടുമുള്ള ഗവേഷണ സ്​ഥാപനങ്ങളുടെയും സർവ്വകലാശാലകളുടെയും സഹകരണവും തേടുന്നുണ്ട്​. 

പദ്ധതിയുടെ ചെലവ്​ കുറക്കാനും സമുദ്രത്തിലൂടെ കെട്ടിവലിച്ചുകൊണ്ടു വരു​േമ്പാൾ മല ഉരുകാതിരിക്കാനുമുള്ള വഴികളാണ്​ കമ്പനി ഇപ്പോൾ തേടുന്നത്​. ഇതെക്കുറിച്ചുള്ള അന്തിമ തീരുമാനം ഇൗ വർഷം അവസാനത്തോടെയെ ഉണ്ടാവൂ. നിലവിൽ 50 മുതൽ 60 മില്ല്യൻ അമേരിക്കൻ ഡോളർ വരെയാണ്​ പദ്ധതിക്ക്​ ചെലവ്​ കണക്കാക്കുന്നത്​. 2019 പകുതിയോടെ പദ്ധതിക്ക്​ തുടക്കമാവും. ആദ്യഘട്ടത്തിൽ ആസ്​ത്രേലിയിലെ പെർത്തിലോ ദക്ഷിണാഫ്രിക്കയിലെ കേപ്​ ടൗണിലോ എത്തിക്കുന്ന മഞ്ഞുമല യു.എ.ഇയിൽ എത്തുന്നത്​ 2020 ആദ്യപാദത്തിലാണ്​. മഞ്ഞുമല ഉപയോഗിച്ച്​ വിനോദസഞ്ചാരികളെ ആകർഷിക്കാനും പദ്ധതിയുണ്ട്​.