60 വർഷത്തിനിടെ 40 ശതമാനം ചാന്ദ്രദൗത്യങ്ങളും പരാജയപ്പെട്ടു -നാസ

15:14 PM
07/09/2019
Chandrayan-2

ന്യൂഡൽഹി: കഴിഞ്ഞ ആറ്​ പതിറ്റാണ്ടിനിടെ നടന്ന ചാ​ന്ദ്ര ദൗത്യങ്ങളിൽ 60 ശതമാനവും പരാജയപ്പെട്ടുവെന്ന്​ അമേരിക്കൻ ബഹിരാകാശ ഏജൻസിയായ നാസ. നാസയുടെ മൂൺ ഫാക്​ട്​ ഷീറ്റിലാണ്​ ഇക്കാര്യം വ്യക്​തമാക്കുന്നത്​. ഇക്കാലയളവിൽ 109 ചാ​ന്ദ്രദൗത്യങ്ങളാണ്​ നടന്നത്​. ഇതിൽ 60 എണ്ണം വിജയിച്ചപ്പോൾ 48 എണ്ണം പരാജയപ്പെട്ടുവെന്ന്​ കണക്കുകൾ വ്യക്​തമാക്കുന്നു. 

1958 മുതൽ 2019 വരെയുള്ള കാലയളവിൽ യു.എസ്​, സോവിയറ്റ്​ യൂണിയൻ, യുറോപ്യൻ യൂണിയൻ, ചൈന, ഇസ്രായേൽ, ഇന്ത്യ തുടങ്ങിയ രാജ്യങ്ങളെല്ലാം ചാന്ദ്രദൗത്യം നടത്തിയിട്ടുണ്ട്​. 1958 ആഗസ്​റ്റ്​ 17ന്​ യു.എസായിരുന്നു ആദ്യ ചാന്ദ്രദൗത്യം നടത്തിയത്​. എന്നാൽ, ഇത്​ പരാജയമായി.

1959 ജനുവരി നാലിന്​ സോവിയറ്റ്​ യൂണിയൻ നടത്തിയ ലൂണ-1 ദൗത്യമാണ്​ ആദ്യമായി വിജയിച്ചത്​. ആറ്​ പരാജയങ്ങൾക്ക്​ ശേഷമായിരുന്നു ഒരു ചാന്ദ്ര ദൗത്യം വിജയിക്കുന്നത്​​. 1958 ആഗസ്​റ്റ്​ മുതൽ 1959 നവംബർ വരെ സോവിയറ്റ്​ യൂണിയനും യു.എസും 14 ദൗത്യങ്ങൾ നടത്തി. ഇതിൽ ലൂണ -1, ലൂണ -2, ലൂണ-3 എന്നിവയാണ്​ വിജയിച്ച ദൗത്യങ്ങൾ. ഇത്​ മൂന്നും സോവിയറ്റ്​ യൂണിയനാണ്​ വിക്ഷേപിച്ചത്​. യു.എസിൻെറ റേഞ്ചർ 7 മിഷനാണ്​ ചന്ദ്ര​ൻെറ അടുത്തുള്ള ദൃശ്യങ്ങൾ ആദ്യമായി പകർത്തിയത്​. ആദ്യമായി ചന്ദ്രനിൽ സോഫ്​റ്റ്​ ലാൻഡിങ്​ നടത്തിയത്​ 1966 ജനുവരിയിൽ യു.എസ്​.എസ്​.ആറിൻെറ ദൗത്യമായ ലൂണ 9 ആയിരുന്നു. 1996 മെയിൽ അമേരിക്കയും ചന്ദ്രനിൽ സോഫ്​റ്റ്​ ലാൻഡിങ്​ നടത്തിയത്​.

ചാന്ദ്ര ദൗത്യങ്ങളിലെ നിർണായകമായ കാൽവെപ്പായിരുന്നു അപ്പോളോ-11 ദൗത്യം. നീൽ ആം​സ്​ട്രോങ്ങിൻെറ നേതൃത്വത്തിൽ മൂന്ന്​ അമേരിക്കൻ ബഹിരാകാശ ശാസ്​ത്രജ്ഞർ ചന്ദ്രനിൽ ഇറങ്ങി. 2009നും 2019നും ഇടയിൽ യു.എസ്​, ഇന്ത്യ, ഇസ്രായേൽ തുടങ്ങിയ രാജ്യങ്ങളാണ്​ ചാന്ദ്രദൗത്യം നടത്തിയത്​. 

Loading...
COMMENTS