ഡിസ്​പ്ലേ പ്രശ്​നമറിഞ്ഞിട്ടും ആപ്പിൾ മാക്​ബുക്കുകൾ​ വിറ്റെന്ന്​ യു.എസ്​ ജഡ്​ജി

ഡിസ്​പ്ലേയ്​ക്ക്​ തകരാറുണ്ടെന്ന്​ ബോധ്യമുണ്ടായിട്ടും ആപ്പിൾ മാക്​ബുക്കുകൾ വിറ്റഴിച്ചെന്ന വെളിപ്പെടുത്തലുമായി യു.എസ്​ ജില്ലാ ജഡ്​ജി എഡ്വാർഡ്​ ഡാവില്ല. 2016, 2017 മാക്​ബുക്ക്​ പ്രോ മോഡലുകൾക്ക്​ ഡിസ്​പ്ലേയ്​ക്ക്​ പ്രശ്​നമുള്ളതായി​ 2019ൽ നിരവധി ഉപഭോക്​താക്കൾ പരാതിപ്പെട്ടതായും അദ്ദേഹം വ്യക്​തമാക്കി. മാക്​ബുക്ക്​ ലാപ്​ടോപ്പിന്‍റെ ഡിസ്​പ്ലേയിൽ സ്​റ്റേജ്​ ലൈറ്റിങ്​ എഫക്​ടാണ്​ യൂസർമാർ റിപ്പോർട്ട്​ ചെയ്​തത്​.

ലാപ്​ടോപ്പുകൾ ഉപയോഗശൂന്യമാക്കാൻ പാകത്തിലുള്ള വലിയ തകരാറാണ്​ അത്​ വരുത്തി​വെക്കുക. നിരന്തര ഉപയോഗം മൂലം ഫ്ലെക്​സ്​ കേബിളുകൾക്ക്​ തേയ്​മാനം വരുന്നതോടെയാണ്​ ഡിസ്​പ്ലേയിൽ 'ഡാർക്​ സ്​പോട്ടുകൾ' കണ്ടുതുടങ്ങുന്നതെന്നാണ്​ റിപ്പോർട്ട്​. ആപ്പിൾ അറിഞ്ഞുകൊണ്ട് തകരാറുള്ള ലാപ്ടോപ്പുകൾ വിൽക്കുന്നുവെന്ന് ആരോപിച്ച് ഒരു കൂട്ടം ഉപഭോക്താക്കൾ 2019ൽ സമർപ്പിച്ച കേസിൽ അധ്യക്ഷനായ ജഡ്​ജി പ്രീ-റിലീസ് പരിശോധനയിൽ ഈ പ്രശ്നത്തെക്കുറിച്ച് ആപ്പിളിന് മുന്നറിയിപ്പ് നൽകാമായിരുന്നു എന്ന്​ വ്യക്​തമാക്കി.

ജില്ലാ ജഡ്ജി വാദികളുടെ പക്ഷത്താണ്​ നിലകൊണ്ടത്​. ലാപ്ടോപ്പുകൾ റിലീസ് ചെയ്യുന്നതിന് മുമ്പുള്ള പരിശോധനയിൽ അപകാതയുമായി ബന്ധപ്പെട്ട റിപ്പോർട്ട്​ എൻജിനീയർമാരെ ആപ്പിളിനെ അറിയിച്ചിരിക്കാമെന്ന്​ പരാതിക്കാർ ആരോപിക്കുന്നു. അതുകൊണ്ടുതന്നെ, പ്രശ്​നമറിഞ്ഞിട്ടും കമ്പനി ലാപ്ടോപ്പുകൾ വിറ്റെന്നാണ്​ ജഡ്​ജി ചൂണ്ടിക്കാട്ടുന്നത്​. മാക്​ബുക്ക്​ ഉടമകളുടെ പരാതികളിലുള്ള ആരോപണങ്ങളും അതോടൊപ്പം പ്രീ-റിലീസ് ടെസ്റ്റിങ്ങുമായി ബന്ധപ്പെട്ട്​ ഉയർന്നുവന്ന ആരോപണങ്ങളും ആപ്പിളിന് അപാകതയെക്കുറിച്ച് വ്യക്തമായ അറിവുണ്ടെന്ന് തെളിയിക്കാൻ പര്യാപ്തമാണെന്നും കോടതി കണ്ടെത്തി.

അതേസമയം, ഡിസ്​പ്ലേ കേബിളുകളിൽ ഏതെങ്കിലും വിധത്തിലുള്ള തകരാറുണ്ടെന്ന കാര്യം ആപ്പിൾ നിഷേധിക്കുന്നത്​ തുടരുകയാണെന്നും ഫ്ലെക്​സ്​ ഗേറ്റുമായി ബന്ധപ്പെട്ട എല്ലാ തെളിവുകളും കമ്പനി മറച്ചുവെക്കാൻ ശ്രമിക്കുകയാണെന്നും പരാതിക്കാരിൽ ഒരാളായ മഹാൻ തലേഷ്​പൗർ പറഞ്ഞു. ആപ്പിൾ ഉപകരണങ്ങളുമായി ബന്ധപ്പെട്ട പ്രശ്​നങ്ങളും അഭിപ്രായങ്ങളും പങ്കുവെക്കാനുള്ള സപ്പോർട്ട്​ കമ്യൂണിറ്റിയിൽ നിന്നും മനഃപ്പൂർവ്വം പല പോസ്​റ്റുകളും ആപ്പിൾ നീക്കം ചെയ്യുന്നതായും അദ്ദേഹം വെളിപ്പെടുത്തി.