ഇനിയും സ്വകാര്യതാ നയം അംഗീകരിച്ചില്ലെങ്കിൽ എന്ത്​ സംഭവിക്കും...? വിശദീകരണവുമായി വാട്​സ്​ആപ്പ്​

തങ്ങളുടെ മെസ്സേജിങ്​ ആപ്പ്​ വിട്ട്​ ആരൊക്കെ പോയാലും പുതിയ സ്വകാര്യതാ നയ പരിഷ്​കാരങ്ങളുമായി മുന്നോട്ടുപോകുമെന്ന്​ വാട്​സ്​ആപ്പ്​ കഴിഞ്ഞ ദിവസമാണ്​ മുന്നറിയിപ്പ്​ നൽകിയത്​. യൂസർമാർക്ക്​ പുറമേ, ഇന്ത്യൻ സർക്കാരും വാട്​സ്​ആപ്പിനെതിരെ രംഗത്തെത്തിയിരുന്നു. പോളിസിയിൽ എന്തെങ്കിലും മാറ്റം വരുത്തുന്നതിന്​ പകരം പരിഷ്​കാരങ്ങൾ അംഗീകരിക്കുന്നതിനുള്ള സമയപരിധി മെയ്​ 15 വരെ നീട്ടുകയാണ്​ അവർ ചെയ്​തത്​. ജനുവരിയിലായിരുന്നു കമ്പനി ആദ്യമായി തങ്ങളുടെ പ്രൈവസി പോളിസ്​ അപ്​ഡേറ്റ്​ യൂസർമാർക്ക്​ നൽകിത്തുടങ്ങിയത്​.

എന്നാൽ, മെയ്​ 15നുള്ളിൽ ഇന്ത്യയിലെ യൂസർമാർ വാട്​സ്​ആപ്പി​െൻറ സ്വകാര്യതാ നയം അംഗീകരിച്ചില്ലെങ്കിൽ എന്ത്​ സംഭവിക്കും...?? ഇൗ ചോദ്യത്തിനുള്ള ഉത്തരവുമായി ഒടുവിൽ വാട്​സ്​ആപ്പ്​ തന്നെ എത്തിയിരിക്കുകയാണ്​.

നിങ്ങൾ പ്രൈവസി പോളിസി അംഗീകരിക്കുന്നില്ലെങ്കിൽ, വാട്​സ്​ആപ്പ്​ അക്കൗണ്ട്​ ഡിലീറ്റ്​ ചെയ്യപ്പെടില്ല. ഏറ്റവും കുറഞ്ഞത്​ ഇൗയടുത്തൊന്നും. എന്താണ്​ നയ പരിഷ്​കാരങ്ങളിലൂടെ തങ്ങളുദ്ദേശിക്കുന്നതെന്ന്​ യൂസർമാരെ മനസിലാക്കാനായി വരും ദിവസങ്ങളിൽ ആപ്പിനുള്ളിൽ തന്നെ ബാനറുകൾ പ്രദർശിപ്പിക്കുമെന്നും വാട്​സ്​ആപ്പ്​ കഴിഞ്ഞദിവസം പ്രഖ്യാപിച്ചിരുന്നു. സമയമെടുത്തുകൊണ്ട്​ നിങ്ങളുടെ സൗകര്യംപോലെ പുതിയ മാറ്റങ്ങൾ അവലോകനം ചെയ്താൽ മതിയെന്നും അവ നിങ്ങളുടെ സ്വകാര്യ ചാറ്റുകളെ ഒരു തരത്തിലും ബാധിക്കുകയില്ലെന്നുമാണ്​ അതിൽ പറയുന്നത്​. മികച്ച ടാർഗെറ്റ്​ പരസ്യങ്ങളുമായി ബന്ധപ്പെട്ട്​ ബിസിനസ്​, പേയ്​മെൻറ്​ സംവിധാനങ്ങൾ ഉപയോഗിക്കുന്നവരുടെ വിവരങ്ങളാണ്​ ഫേസ്​ബുക്കുമായി പങ്കുവെക്കുന്നതെന്നും അത്​ സാധാരണ ഉപയോക്​താക്കളെ ബാധിക്കില്ലെന്നും വാട്​സ്​ആപ്പ്​ വിശദീകരിക്കുന്നുണ്ട്​.

വാട്​സ്​ആപ്പി​െൻറ പുതിയ വിശദീകരണങ്ങൾ സമയമെടുത്ത്​ വായിച്ച് നയ പരിഷ്​കാരങ്ങൾ​ അംഗീകരിക്കുന്നതിനായി മെയ്​ 15 വരെ മൂന്ന്​ മാസത്തെ സമയമാണ്​ നൽകിയിരിക്കുന്നത്​. എന്നിട്ടും സമ്മതമറിയിച്ചി​ല്ലെങ്കിൽ തുടക്കത്തിൽ നിങ്ങളുടെ വാട്​സ്​ആപ്പ്​ അക്കൗണ്ടിൽ നിന്നും പല സുപ്രധാന ഫീച്ചറുകളും കമ്പനി എടുത്തുകളഞ്ഞേക്കും. കുറച്ചുകാലത്തേക്ക്​, വാട്​സ്​ആപ്പ്​ കോളുകൾ സ്വീകരിക്കാനും അതുപോലെ നോട്ടിഫിക്കേഷനുകൾ കാണാനും സാധിക്കും. എന്നാൽ, ആപ്പിൽ നിന്ന്​ മെസ്സേജുകൾ അയക്കാനോ വായിക്കാനോ കഴിയില്ല.

പിന്നാലെ വാട്​സ്​ആപ്പ്​ അക്കൗണ്ട്​ ഡിലീറ്റ്​ ചെയ്യപ്പെടുമോ എന്ന്​ ചോദിച്ചാൽ.., ചെയ്യപ്പെടും എന്നാണ്​ ഉത്തരം. എന്നാൽ, 120 ദിവസങ്ങൾക്ക്​ ശേഷം മാത്രം. ആക്​ടീവല്ലാത്ത യൂസർമാർക്കെതിരെ സ്വീകരിച്ചുവരുന്ന നയമായിരിക്കും പ്രൈവസി പോളിസി അംഗീകരിക്കാത്തവർക്കെതിരെ സ്വീകരിക്കുക. അതായത്​, എന്നെന്നേക്കുമായി ആ നമ്പറിലുള്ള അക്കൗണ്ട്​ നഷ്​ടപ്പെടും. ഒപ്പം അതുവരെയുള്ള ചാറ്റുകളും പോയേക്കും.