മോദിക്ക്​ പിന്നാലെ ടിക്​ ടോക്​ നിരോധിക്കാൻ ട്രംപും

വാഷിങ്​ടൺ: ചൈനീസ്​ ആപുകളായ ടിക്​ ടോകിനും വീചാറ്റിനും യു.എസും നിയന്ത്രണമേർപ്പെടുത്തുന്നു. ആപ്പിൻെറ ഡൗൺലോഡിങ്​ നിരോധിക്കാനാണ്​ യു.എസ്​ നീക്കം. റോ​യി​ട്ടേഴ്​സാണ്​ വാർത്ത റിപ്പോർട്ട്​ ചെയ്​തത്​. സെപ്​റ്റംബർ 20 മുതൽ നിരോധനം നിലവിൽ വരും.

ആപ്പിൾ സ്​റ്റോറിൽ നിന്നും ഗൂഗിൾ പ്ലേ സ്​റ്റോറിൽ നിന്നും ആപ്പുകൾ ഒഴിവാക്കണമെന്ന്​ യു.എസ്​ കോമേഴ്​സ്​ ഡിപ്പാർട്ട്​മെൻറ്​ പുറത്തിറക്കിയ ഉത്തരവിൽ വ്യക്​തമാക്കുന്നു. ഈ ഉത്തരവ്​ ഔദ്യോഗികമായി ഇതുവരെ പുറത്ത്​ വിട്ടിട്ടില്ല.

അതേസമയം, യു.എസ്​ കമ്പനികൾക്ക്​ അമേരിക്കക്ക്​ പുറത്ത്​ ഈ ആപുകളുമായി വ്യാപാരബന്ധം പുലർത്തുന്നതിന്​ നിരോധനമില്ല. എന്നാൽ, അമേരിക്കയിൽ ഇതിന്​ കടുത്ത നിയന്ത്രണങ്ങളുണ്ടാവും. അമേരിക്കൻ റീടെയിൽ ഭീമനായ വാൾമാർട്ട്​ ട്രാൻസാക്ഷനുകൾക്കായി വീ ചാറ്റിൻെറ മിനി ആപാണ്​ ഉപയോഗിക്കുന്നത്​. യു.എസ്​ കമ്പനികളുമായി ടിക്​ ടോക്​ ഏതെങ്കിലും തരത്തിലുള്ള ഇടപാടുകൾ നടത്തുന്നെങ്കിൽ അത്​ 45 ദിവസത്തിനകം പൂർത്തിയാക്കണമെന്ന്​ ​നേരത്തെ ട്രംപ്​ അന്ത്യശാസനം നൽകിയിരുന്നു.