'മിഡ്​നൈറ്റ്​ പട്രോൾ'; കുട്ടികളുടെ പുലരുവോളമുള്ള ഗെയിമിങ്ങിന്​ പൂട്ടിടാൻ പുതിയ വിദ്യയുമായി ടെൻസെൻറ്​

പബ്​ജി ​​മൊബൈൽ, ഫ്രീഫയർ പോലുള്ള ബാറ്റിൽഗ്രൗണ്ട്​ ഗെയിമുകളുടെ വരവോടെ ഉറക്കം നിലച്ച കുട്ടികളെ നേരെയാക്കാൻ പുതിയ മാർഗവുമായി എത്തിയിരിക്കുകയാണ്​ ചൈനീസ്​ ഗെയിമിങ്​ കമ്പനിയായ ടെൻസെൻറ്​. 'മിഡ്​നൈറ്റ്​ പട്രോൾ' എന്ന്​ വിളിക്കപ്പെടുന്ന ടൂൾ ചൈനയിലാണ്​ ഇപ്പോൾ അവതരിപ്പിച്ചിരിക്കുന്നത്​. പുലരുവോളം ഗെയിമുകളിൽ മുഴുകി ആരോഗ്യപരമായും മാനസികമായും വലിയ അപകടത്തിലേക്ക്​ നീങ്ങുന്ന പുതുതലമുറയെ അതിൽ നിന്നും രക്ഷിക്കലാണത്രേ ചൈനീസ്​ കമ്പനിയുടെ ഉദ്ദേശം.

എന്താണ്​ മിഡ്​നൈറ്റ്​ പട്രോൾ..?

വിശദീകരിച്ചാൽ​ വിവാദമായേക്കാവുന്ന സംവിധാനമാണ്​ ടെൻസെൻറി​െൻറ 'അർധരാത്രിയിലുള്ള പട്രോളിങ്​' സിസ്റ്റം. അതിന്​ പ്രധാന കാരണം സ്വകാര്യത തന്നെയാണ്​. ഒരു വ്യക്തി പ്രായപൂർത്തിയാകാത്ത ആളാണോയെന്ന് കണ്ടെത്താനും സ്ഥിരീകരിക്കാനും ഇൗ ടൂൾ ഫേഷ്യൽ റെക്കഗ്നിഷൻ സാങ്കേതികവിദ്യയാണ്​ ഉപയോഗിക്കുന്നത്​. ഫോണിലെ മുൻകാമറയുപയോഗിച്ചുള്ള ഇൗ വിദ്യയിലൂടെയാണ്​ നിരോധിത സമയങ്ങളിൽ കുട്ടികൾ ഗെയിമുകൾ കളിക്കുന്നത് തടയുന്നത്​.

പുതിയ സിസ്റ്റം നടപ്പിൽ വരുത്താൻ ടെൻസെൻറിന്​ എല്ലാ ഗെയിമർമാരും മുഖം തിരിച്ചറിയലിനുള്ള അനുവാദം കൊടുക്കേണ്ടിവരും. ടെൻസെൻറി​െൻറ ടൂൾ വ്യക്തികളുടെ മുഖം വിശകലനം ചെയ്യുകയും പ്രായപൂർത്തിയാകാത്തവരെ കണ്ടെത്തുന്നതിനായി ഒരു ഡാറ്റാബേസിൽ സംഭരിച്ചിരിക്കുന്ന ചിത്രങ്ങളും പേരുകളുമായി മാച്ച്​ ​ചെയ്തുനോക്കുകയും ചെയ്യും.

കുട്ടികളെ ആപ്പിലാക്കിയ ചൈനയിലെ ''ആസക്തി വിരുദ്ധ" ചട്ടം

പ്രായപൂർത്തിയാകാത്തവർ രാത്രിയിൽ അമിതമായി ഗെയിമുകൾ കളിക്കുന്നത് തടയാൻ 2019 ൽ "ആസക്തി വിരുദ്ധ" ചട്ടങ്ങൾ പാസാക്കിയ രാജ്യമാണ്​ ചൈന. ഇൗ ചട്ടത്തിലൂടെ 18 വയസിന്​ താഴെയുള്ളവർ ഗെയിം കളിക്കുന്ന സമയത്തിൽ നിയന്ത്രണം കൊണ്ടുവരികയും കർഫ്യൂ ഏർപ്പെടുത്തുകയും ഗെയിമിൽ അനാവശ്യമായി പണം മുടക്കുകയും ചെയ്യുന്നത്​ ചൈന നിയന്ത്രിച്ചു.

ഇതിലൂടെ രാത്രി 10 മണി മുതൽ രാവിലെ എട്ട്​ മണിവരെ കുട്ടികളെ ഗെയിം കളിക്കുന്നതിൽ നിന്ന്​ വിലക്കിയിരുന്നു. വാരാന്ത്യങ്ങളിലും അവധി ദിവസങ്ങളിലും മൂന്ന്​ മണിക്കൂർ വീതവും മറ്റുള്ള ദിവസങ്ങളിൽ ഒന്നരമണിക്കൂർ നേരവും മാത്രമാണ്​ ഗെയിം കളിക്കാൻ അനുവാദം നൽകിയത്​.

എന്നാൽ, ചില വിരുതൻമാർ പല കുതന്ത്രങ്ങളും പയറ്റി 'നിരോധിത സമയങ്ങളിൽ' ഗെയിം കളി തുടർന്നിരുന്നതായി ടെൻസെൻറ്​ സാക്ഷ്യപ്പെടുത്തുന്നു. പുതിയ മിഡ്​നൈറ്റ്​ പട്രോൾ സംവിധാനം അത്തരം വിട്ടുവീഴ്​ച്ചകളെല്ലാം പരിഹരിച്ച്​ കുട്ടികൾ രാത്രികളിൽ ഗെയിം കളിക്കുന്നത്​ പൂർണ്ണമായും നിയന്ത്രിക്കുമെന്നും അവർ കൂട്ടിച്ചേർത്തു.

നിലവിൽ മിഡ്​നൈറ്റ്​ പട്രോൾ സംവിധാനം ചൈനയിൽ ആരംഭിച്ചുകഴിഞ്ഞു. ജനപ്രിയ ഗെയിമുകളായ ഹോണർ ഓഫ് കിങ്​സ്​, ഗ്ലോറി ഓഫ് കിങ്​, പീസ് എലൈറ്റ് തുടങ്ങിയ 60 ഒാളം ഗെയിമുകളിൽ ഇത്​ സജീവമാക്കിയിട്ടുണ്ട്​. വരും ദിവസങ്ങളിൽ പട്ടികയിൽ കൂടുതൽ ഗെയിമുകൾ ചേർക്കാൻ കമ്പനി പദ്ധതിയിടുന്നുണ്ട്​.