‘അഡൽറ്റ് ഒൺലി’ സെക്ഷൻ അവതരിപ്പിക്കാനൊരുങ്ങി വിമാനക്കമ്പനി

വിമാനത്തിൽ ‘അഡൽറ്റ് ഒൺലി’ സെക്ഷൻ അവതരിപ്പിക്കാനൊരുങ്ങി എയർലൈൻ കമ്പനി. 16 വയസ്സിന് മുകളിലുള്ളവർക്കായിരിക്കും ഈ ഭാഗം അനുവദിക്കുക. ടർക്കിഷ്-ഡച്ച് കമ്പനിയായ കോറെൻഡൺ എയർലൈൻസാണ് നവംബർ മുതൽ യാത്രക്കാർക്ക് പുതിയ സേവനം നൽകാൻ പദ്ധതിയിടുന്നത്. ആംസ്റ്റർഡാമിൽനിന്ന് ഡച്ച് കരീബിയൻ ദ്വീപായ കുരകാവോയിലേക്കാണ് ആദ്യം ഈ സൗകര്യം ഒരുക്കുക.

കുട്ടികളുടെ ശബ്ദങ്ങളും മറ്റും ഇല്ലാതെ വിമാനത്തിൽ സ്വസ്ഥമായി ഇരിക്കാനും ജോലി ചെയ്യാനും മറ്റും അവസരമൊരുക്കുകയാണ് കമ്പനി ലക്ഷ്യമിടുന്നത്. കുട്ടികൾക്കൊപ്പമല്ലാതെ യാത്ര ചെയ്യുന്നവർക്കാണ് ഈ സീറ്റുകൾ അനുവദിക്കുക. വിമാനത്തിലെ മറ്റു ഭാഗവുമായി വേർതിരിച്ചായിരിക്കും ഇതിനുള്ള സീറ്റുകൾ ഒരുക്കുക. മുൻവ​ശത്തെ ഒമ്പത് സീറ്റുകൾ മറ്റുള്ളവയേക്കാൾ വലിപ്പത്തിലും വിശാലതയിലും ഒരുക്കുന്നുമുണ്ട്. അഡൽറ്റ് ഒൺലി സീറ്റിന് 49 ഡോളർ അധികം നൽകണം. വലിപ്പം കൂടിയ പ്രത്യേക സീറ്റുകൾക്ക് 108 ഡോളറാണ് അധികം നൽകേണ്ടത്.