സർവീസ്​ സെന്‍റർ ജീവനക്കാർ ഐഫോണിലെ നഗ്​ന ചിത്രങ്ങൾ ​ചോർത്തി; വിദ്യാർഥിനിക്ക്​ കോടികൾ നഷ്​ടപരിഹാരം നൽകി ആപ്പിൾ

കാലിഫോർണിയ: റിപ്പയർ ചെയ്യാൻ നൽകിയ ഐ ഫോണിൽ നിന്ന്​ നഗ്​ന ചിത്രങ്ങൾ ഫേസ്​ബുക്കിൽ ചോർന്നതോടെ വിദ്യാർഥിനിക്ക്​ ഭീമൻ നഷ്​ടപരിഹാരത്തുക നൽകി ആപ്പിൾ. കാലിഫോർണിയയിൽ പെഗാട്രോണിന്​ കീഴിൽ പ്രവർത്തിക്കുന്ന സർവീസ്​ സെന്‍ററിലെ രണ്ട്​ ജീവനക്കാരാണ്​ ചിത്രങ്ങൾ ചോർത്തിയത്​.

2016ലാണ്​ ഒറിഗോണിൽ നിന്നുള്ള വിദ്യാർഥിനി തന്‍റെ മൊബൈൽ ഫോൺ നന്നാക്കുന്നതിനായി ആപ്പിൾ സർവീസ്​ സെന്‍റററിൽ നൽകിയത്​. നന്നാക്കിയ ശേഷം ടെക്​നീഷ്യൻമാർ ഫോണിൽ കണ്ട 10ലധികം സ്വകാര്യ ദൃശ്യങ്ങൾ വിദ്യാർഥിനിയുടെ തന്നെ ഫേസ്​ബുക്ക്​ അക്കൗണ്ടിൽ അപ്​ലോഡ്​ ചെയ്​തു.

സ്വന്തം നഗ്​ന ചിത്രം വിദ്യാർഥിനി പങ്കുവെച്ച രീതിയിലായിരുന്നു പോസ്റ്റ്​. സുഹൃത്തുക്കൾ ചുണ്ടിക്കാണിച്ചതോടെ ചിത്രങ്ങൾ പെട്ടന്ന്​ തന്നെ നീക്കം ചെയ്​തു.

ഒത്തുതീർപ്പ്​ തുക വ്യക്തമല്ലെങ്കിലും കോടികളാണ്​ ടെക്​ ഭീമൻമാർ വിദ്യാർഥിനിക്ക്​ നൽകുന്നതെന്ന്​ 'ദ ടെലഗ്രാഫ്'​ റിപ്പോർട്ട്​ ചെയ്​തു. പെൺകുട്ടിയുടെ അഭിഭാഷകൻ 50 ലക്ഷം ഡോളറായിരുന്നു നഷ്​ടപരിഹാരമായി ആവശ്യപ്പെട്ടിരുന്നത്​.

സംഭവത്തിന്‍റെ ഫലമായി പെൺകുട്ടിക്കുണ്ടായ 'കടുത്ത മാനസിക ക്ലേശത്തിന്' നഷ്​ടപരിഹാരം നൽകിക്കൊണ്ട് ഒത്തുതീർപ്പ് അംഗീകരിക്കുകയായിരുന്നു. കേസ് സംബന്ധിച്ച വിവരങ്ങൾ ചർച്ച ചെയ്യരുതെന്നും തുക വെളിപ്പെടുത്തരുതെന്നും ഒത്തുതീർപ്പിന്‍റെ ഭാഗമായി വ്യവസ്ഥയുണ്ട്​.

ബിസിനസ്​ തിരിച്ചടി ഒഴിവാക്കുന്നതിനായാണ്​ ആപ്പിൾ ഒത്തുതീർപ്പിനിടെ രഹസ്യസ്വഭാവം ആവശ്യപ്പെട്ടത്​. ഇക്കാരണത്താൽ നടപടികളിലുടനീളം ആപ്പിളിനെ 'ഉപഭോക്താവ്' എന്നായിരുന്നു വിശേഷിപ്പിച്ചത്​. സംഭവത്തിൽ അന്വേഷണം നടത്തിയ ആപ്പിൾ രണ്ട്​ ജീവനക്കാരെയും പിരിച്ചു വിട്ടു.