ചൈനീസ്​ ബ്രാൻഡുമായി ചേർന്ന്​ ഇന്ത്യയിൽ വിലകുറഞ്ഞ സ്​മാർട്ട്​ഫോണുകൾ ഇറക്കാൻ ജിയോ

ചൈനീസ്​ ബ്രാൻഡായ ഐടെലുമായി സഹകരിച്ച്​ ഇന്ത്യയിൽ വിലകുറഞ്ഞ സ്​മാർട്ട്​ഫോണുകൾ ഇറക്കാൽ പദ്ധതിയിട്ട്​ ജിയോ. ഈ വർഷത്തിന്‍റെ അടുത്ത പകുതിയിൽ ജിയോ രാജ്യത്ത്​ വില കുറഞ്ഞ ലാപ്​ടോപ്പുകളും 5ജി പിന്തുണയുള്ള ഫോണുകളും ലോഞ്ച്​ ചെയ്യാൻ പോകുന്നതായുള്ള റിപ്പോർട്ടുകൾ പുറത്തുവന്ന്​​ ദിവസങ്ങൾക്ക്​ ശേഷമാണ്​ പുതിയ പ്രഖ്യാപനം​. ഫീച്ചർ ഫോണുകൾ ഉപയോഗിക്കുന്നവരെ ലക്ഷ്യമിട്ടുള്ളതാണ്​ പുതിയ ഐടെൽ-ജിയോ പങ്കാളിത്തം.

2014 മുതൽ ഇന്ത്യയിൽ ഏറ്റവും വില കുറഞ്ഞ ഫോണുകൾ വിൽക്കുന്ന ബ്രാൻഡാണ്​ ഐടെൽ. 3000 രൂപ മുതലുള്ള ആൻഡ്രോയ്​ഡ്​ ഗോ സ്​മാർട്ട്​ഫോണുകൾ വരെ അവർ ഇന്ത്യയിൽ ലോഞ്ച്​ ചെയ്​തിട്ടുണ്ട്​. വരുന്ന മെയ്​ മാസം ജിയോയുമായി ഐടെൽ കരാറിലേർപ്പെടും. തൊട്ടുപിന്നാലെ തന്നെ ഒരു ഫോണും ലോഞ്ച്​ ചെയ്യാൻ സാധ്യതയുണ്ടെന്ന്​ ബദ്ധപ്പെട്ട വൃത്തങ്ങൾ വ്യക്​തമാക്കുന്നു.

ഐടെൽ ഫോണുകൾ നിർമിക്കുകയും ജിയോ ആ ഫോണുകൾ ഉപയോഗിക്കുന്നവർക്ക്​ വേണ്ടി മാ​ത്രമായി ഏറ്റവും കുറഞ്ഞ ചാർജ്​ മാത്രം ഈടാക്കുന്ന ഡാറ്റാ പ്ലാനുകൾ അവതരിപ്പിക്കുകയും ചെയ്​തേക്കും. ഐടെൽ-ജിയോ സ്​മാർട്ട്​ഫോൺ പ്ലാനുകൾ അടുത്തമാസത്തോടെ ജിയോ അവതരിപ്പിക്കും. അതേസമയം, നിലവിൽ ഫോണിന്‍റെ പേര്​, ഫീച്ചറുകൾ, ഡിസൈൻ എന്നിവയെ കുറിച്ച്​ യാതൊരു സൂചനയുമില്ല.