ബി.എസ്.എൻ.എല്ലിന്റെ ഒരു രൂപ പ്ലാനിനെതിരെ സ്വകാര്യ കമ്പനികൾ

മുംബൈ: ദീപാവലി ആഘോഷത്തോടനുബന്ധിച്ച്​ ബി.എസ്​.എൻ.എൽ പ്രഖ്യാപിച്ച ഒരുരൂപ പ്ലാനിനെതിരെ പരാതിയുമായി സ്വകാര്യ ടെലികോം കമ്പനികൾ. ബി.എസ്​.എൻ.എല്ലിന്‍റെ നടപടി തങ്ങളെ കൊള്ളയടിക്കുന്ന താരിഫ്​ നിർണയമാണെന്ന്​ (പ്രഡേറ്ററി പ്രൈസിങ്​) എന്ന പരാതിയുമായി റിലയൻസ്​ ജിയോ, ഭാരതി എയർടെൽ, വോഡഫോൺ ഐഡിയ എന്നിവ സെല്ലുലാർ ഓപറേറ്റേഴ്​സ്​ അസോസിയേഷൻ ഓഫ്​ ഇന്ത്യ മുഖേന ടെലികോം റെഗുലേറ്ററി അതോറിറ്റി ഓഫ്​ ഇന്ത്യയെ (ട്രായ്​) സമീപിച്ചു. മറ്റ്​ കമ്പനികളിൽനിന്ന്​ മാറാൻ (മൊബൈൽ നമ്പർ പോർട്ടബിലിറ്റി) ​പ്രത്യേക ഓഫറുകൾ നൽകുന്നത്​ വിലക്കുന്ന വ്യവസ്ഥക്കെതിരാണ്​ ഇതെന്നും അവർ ആരോപിച്ചു.

ദീപാവലിയോടനുബന്ധിച്ച്​ ഒക്​ടോബർ 15 മുതൽ നവംബർ 15 വരെ വെറും ഒരു രൂപക്ക്​ 4ജി റീചാർജ്​ പ്ലാനാണ്​ ബി.എസ്​.എൻ.എൽ പ്രഖ്യാപിച്ചത്​. പുതിയ സിം എടുക്കുന്നവർക്കാണ്​ ഇത്​ നൽകുന്നത്​. 30 ദിവസത്തേക്ക്​ പ്രതിദിനം രണ്ട്​ ജി.ബി ഡേറ്റ, 100 എസ്​.എം.എസ്​, പരിധിയില്ലാതെ കാൾ എന്നിവയാണ്​ ഇതിൽ ലഭിക്കുക. സ്വാതന്ത്ര്യദിന വാർഷികത്തോടനുബന്ധിച്ച്​ പരീക്ഷിച്ച്​ വിജയിച്ച പദ്ധതിയാണ്​ ബി.എസ്​.എൻ.എൽ വീണ്ടും പയറ്റുന്നത്​. കഴിഞ്ഞ ആഗസ്​റ്റിൽ ഒരുരൂപക്ക്​ സമാനമായ സേവനങ്ങൾ ലഭിക്കുന്ന ‘ഫ്രീഡം പ്ലാൻ’ അവതരിപ്പിക്കുകയും വിജയകരമെന്ന്​ കണ്ട്​ സെപ്​റ്റംബർ 15 വരെ ദീർഘിപ്പിക്കുകയും ചെയ്തിരുന്നു. ഇതിന്‍റെ ഫലമായി ആഗസ്റ്റിൽ 1.4 ദശലക്ഷം പുതിയ കണക്ഷൻ ബി.എസ്​.എൻ.എല്ലിന്​ ലഭിച്ചു.

2016ൽ സേവനം തുടങ്ങിയപ്പോൾ ആദ്യ ആറ്​ മാസത്തേക്ക്​ നിയന്ത്രണമില്ലാതെ 4ജി വാഗ്ദാനം ചെയ്ത ജിയോയാണ്​ ഇപ്പോൾ ബി.എസ്​.എൻ.എല്ലിനെതിരെ രംഗത്തുവന്നത്. അന്ന്​ ഐഡിയയും എയർടെലും ജിയോക്കെതിരെ പരാതി ഉന്നയിച്ചെങ്കിലും ഫലമുണ്ടായില്ല. സമീപകാലത്ത്​ ജിയോക്കും എയർടെലിനുമെതിരെ വോഡഫോൺ ഐഡിയ ഉന്നയിച്ച പരാതിയിലും നടപടിയുണ്ടായില്ല. പുതിയ പരാതിയിൽ ബി.എസ്​.എൻ.എല്ലിനെതിരെയും ട്രായിയുടെ ഭാഗത്തുനിന്ന്​ നടപടിയുണ്ടാകാനിടയില്ലെന്നാണ്​ ടെലികോം വൃത്തങ്ങൾ പറയുന്നത്​.