ഗൂഗ്​ൾ വീട്ടിലിരുന്ന്​ ജോലി ചെയ്യുന്നവരുടെ ശമ്പളം വെട്ടിച്ചുരുക്കുന്നു

വാഷിങ്​ടൺ:​ ലോക പ്രശസ്​ത ടെക്​ ഭീമൻ ഗൂഗ്​ൾ വർക്ക്​ ഫ്രം ഹോമിലുള്ള ജീവനക്കാരുടെ ശമ്പളം കുറക്കുന്നു. വിദൂരമായ സ്ഥലങ്ങളിലിരുന്ന്​ ജോലി ചെയ്യുന്നവരുടെ ശമ്പളമാവും വെട്ടിക്കുറക്കുക. താരതമ്യേന ചെലവ്​ കുറവുള്ള നഗരങ്ങളിൽ ജോലി ചെയ്യുന്നവരുടെ ശമ്പളം കുറക്കുമെന്ന്​ കമ്പനി അറിയിച്ചു​. തൊഴിലാളി എവിടെ ഇരുന്ന്​ ജോലി ചെയ്യുന്നുവെന്നതും ശമ്പളത്തെ സ്വാധീനിക്കാറുണ്ടെന്ന്​ ഗൂഗ്​ൾ വ്യക്​തമാക്കുന്നു.

സിയാറ്റിലിലെ ഗൂഗ്​ളിന്‍റെ ഓഫീസിലിരുന്ന്​ ജോലി ചെയ്യുന്ന തൊഴിലാളി സമീപത്തെ കൗണ്ടി​യിലേക്ക്​ മാറിയപ്പോൾ ശമ്പളം 10 ശതമാനം വരെ കുറച്ചുവെന്നാണ്​ റിപ്പോർട്ട്​. വർക്ക്​ ഫ്രം ഹോമിന്‍റെ ഭാഗമായാണ്​ ജീവനക്കാരൻ ഗൂഗ്​ളിന്‍റെ സിയാറ്റിൽ ഓഫീസ്​ വിട്ടത്​. സാൻഫ്രാൻസിസ്​കോയിൽ ഗൂഗ്​ൾ ഓഫീസിൽ നിന്നു വീട്ടിലേക്ക്​ മാറിയ ജീവനക്കാരുടെ ശമ്പളം പരമാവധി 25 ശതമാനം വരെ കുറച്ചിട്ടുണ്ടെന്നും റിപ്പോർട്ടുകളുണ്ട്​.

അതേസമയം, ഫേസ്​ബുക്കും ട്വിറ്ററും നേരത്തെ തന്നെ ഇത്തരത്തിൽ ശമ്പളം കുറക്കാൻ തീരുമാനിച്ചിരുന്നു. ചെറു കമ്പനികളായ റെഡ്ഡിറ്റ്​, സില്ലോവ്​ തുടങ്ങിയവയും വീട്ടിലിരുന്ന്​ ജോലി ചെയ്യുന്ന ജീവനക്കാരുടെ ശമ്പളം കുറച്ചിരുന്നു.