വാങ്ങിയിട്ട്​ അഞ്ച്​ ദിവസം മാത്രം; യുവതിയുടെ ബാഗിൽ നിന്ന്​ വൺപ്ലസ്​ നോർഡ്​2 പൊട്ടിത്തെറിച്ചു

ന്യൂഡൽഹി: അഞ്ച്​ ദിവസം മാത്രം പഴക്കമുള്ള വൺപ്ലസ്​ നോർഡ്​ 2 5ജി മൊബൈൽ ഫോൺ യുവതിയുടെ ബാഗിൽ വെച്ച്​ പൊട്ടിത്തെറിച്ചു. ബംഗളൂരുവിൽ ഞായറാഴ്​ചയാണ്​ സംഭവം. സംഭവം നടന്ന ഉടൻ യുവതിയുടെ ഭർത്താവ്​ ഇക്കാര്യം ട്വിറ്ററിൽ പങ്കുവെക്കുകയായിരുന്നു.

ചൈനീസ്​ മൊബൈൽ ഫോൺ നിർമാതാക്കളായ വൺപ്ലസിന്‍റെ ഏറ്റവും പുതിയ മോഡലായ നോർഡ്​ 2 കഴിഞ്ഞ മാസമാണ്​ പുറത്തിറക്കിയത്​. ഉപയോക്താവുമായി ബന്ധപ്പെട്ടു കഴ​ിഞ്ഞു​െവന്നും വിഷയത്തിൽ അന്വേഷണം നടത്തുമെന്നും വൺപ്ലസ്​ അറിയിച്ചു.

അൻകുർ ശർമയാണ്​ ഞായറാഴ്ച രാവിലെ തന്‍റെ ഭാര്യ മൊബൈൽ ബാഗിലിട്ട്​ സൈക്ലിങ്ങിന്​ പോകുന്നത്​ വഴി പൊട്ടിത്തെറിച്ചതായി ട്വിറ്ററിൽ പോസ്റ്റിട്ടത്​. 'പെട്ടന്നാണ്​ ഫോൺ പൊട്ടിത്തെറിച്ചത്​. അതിൽ നിന്ന്​ പുക ഉയരാൻ തുടങ്ങി. പൊട്ടിത്തെറിയിൽ ഭാര്യക്ക്​ അപകടം പറ്റി'-ശർമ ട്വീറ്റ്​ ചെയ്​തു. പിന്നീട്​ ഇയാൾ ട്വീറ്റ്​ നീക്കം ചെയ്​തെങ്കിലും അതിന്‍റെ കാഷെ പതിപ്പ്​ കാണാൻ സാധിക്കുന്നുണ്ട്​. പൊട്ടിത്തെറിച്ച മൊബൈൽ ഫോണിന്‍റെ മൂന്ന്​ ചിത്രങ്ങളും അദ്ദേഹം പങ്കു​വെച്ചിട്ടുണ്ട്​.

ട്വിറ്ററിലെ വൺപ്ലസിന്‍റെ ഔദ്യോഗിക അക്കൗണ്ട്​ കമ്പനിയുമായി നേരിട്ട്​ മെസേജിലൂടെ ബന്ധപ്പെടാനായി ഇദ്ദേഹത്തോട്​ ആവശ്യപ്പെട്ടു​. പൊട്ടിത്തെറിയിൽ കമ്പനി ഉപയോക്താവിന്​ നഷ്​ടപരിഹാരം നൽകിയോ എന്ന കാര്യത്തിൽ വ്യക്തതയായിട്ടില്ല. ഇതാദ്യമായിട്ടല്ല വൺപ്ലസ്​ മൊബൈൽ ഫോൺ പൊട്ടിത്തെറിക്കുന്നത്​. 2019 ജൂലൈയിൽ വൺപ്ലസ്​ മൊബൈൽ പൊട്ടിത്തെറിച്ചതായി റിപ്പോർട്ടുകളുണ്ടായിരുന്നു.

കഴിഞ്ഞ മാസം വിപണിയിലെത്തിയ വൺപ്ലസ്​ നോർഡ്​ 2 കഴിഞ്ഞ ആഴ്ചയാണ്​ ഇന്ത്യയിൽ വിൽപനക്കെത്തിയത്​. 29,999 രൂപയാണ്​ ആണ്​ പ്രാരംഭ വില. വൺപ്ലസ്​ നോർഡിന്‍റെ പരിഷ്​കരിച്ച പതിപ്പായ വൺപ്ലസ്​ നോർഡ്​ 2 5ജി 4500 എം.എ.എച്ച്​ ബാറ്ററിയുമായാണ്​ എത്തിയത്​.

മീഡിയടെകിന്‍റെ ഡൈമൻസിറ്റി 5ജി ചിപ്​സെറ്റ്​ സീരീസിലെ പുത്തൻ പോരാളിയായിരിക്കും നോർഡ്​ 2ന്​ കരുത്ത്​ പകരുക. ഡൈമൻസിറ്റി 1200 എന്ന ഏറ്റവും പുതിയ 5ജി പ്രൊസസറാണ്​ മീഡിയടെക്​ വൺപ്ലസിന്​ നൽകുന്നത്​.