കങ്കണയുടെ ട്വീറ്റുകൾ ട്വിറ്റർ വീണ്ടും നീക്കി

ന്യൂഡൽഹി: ബോളിവുഡ്​ താരം കങ്കണ റണാവത്തിന്‍റെ ഏതാനും ട്വീറ്റുകൾ ട്വിറ്റർ വീണ്ടും നീക്കി. ട്വിറ്ററിന്‍റെ നിയമങ്ങൾ ലംഘിക്കുന്നവയാണ്​ ഇതെന്ന്​ കണ്ടെത്തിയതിനെ തുടർന്നാണ്​ നടപടി.

കർഷക പ്രക്ഷോഭത്തെ കുറിച്ചുള്ള അന്താരാഷ്​ട്ര സെലിബ്രിറ്റികളുടെ ട്വീറ്റുകളെ എതിർത്തുള്ള കങ്കണയുടെ പോസ്റ്റുകളാണ്​ നീക്കിയത്​. ക്രിക്കറ്റ്​ താരം രോഹിത്​ ശർമക്കെതിരെയുള്ള ട്വീറ്റും നീക്കിയവയിൽ ഉൾപ്പെടും.പോപ്​ ഗായിക രിഹന്നയെ വിഡ്​ഢി എന്നും കർഷകരെ തീവ്രവാദികളെന്നും കങ്കണ വിളിച്ചിരുന്നു.

ഹിന്ദുക്കളെ അധിക്ഷേപിക്കുന്ന ടി.വി ഷോയുടെ നിർമാതാക്കളുടെ തലയറുക്കുമെന്നുള്ള പോസ്റ്റിനെത്തുടർന്ന്​ കങ്കണയുടെ അക്കൗണ്ട്​ ഏതാനും കാലത്തേക്ക്​ ട്വിറ്റർ സസ്​പെൻഡ്​ ചെയ്​തിരുന്നു.