ഞെട്ടിക്കുന്ന വിലയിൽ സ്​മാർട്ട്​ഫോണുകൾ ഈ വർഷാവസാനം തന്നെ; പ്രഖ്യാപനവുമായി ജിയോ

മുംബൈ: റിലയൻസ്​ ജിയോയുടെ കഴിഞ്ഞ വാർഷിക ജനറൽ ബോഡി യോഗത്തിലായിരുന്നു മുകേഷ്​ അംബാനി ഗൂഗ്​ളുമായി സഹകരിച്ച്​ രാജ്യത്ത്​ വില കുറഞ്ഞ 5ജി സ്​മാർട്ട്​ഫോണുകൾ അവതരിപ്പിക്കുമെന്ന്​ പറഞ്ഞത്​​. ജിയോയിലൂടെ ഇന്ത്യയിൽ ഏറ്റവും കുറഞ്ഞ നിരക്കിൽ ഇൻറർനെറ്റ്​ ലഭ്യമാക്കിയ അംബാനിയുടെ പ്രഖ്യാപനം ചൈനയടക്കമുള്ള വിദേശ കമ്പനികൾക്ക്​ ഞെട്ടലുണ്ടാക്കിയപ്പോൾ, ഇന്ത്യക്കാർക്ക്​ ആഘോഷിക്കാനുള്ള വകയായിരുന്നു.

എന്നാൽ, തങ്ങളുടെ സ്​മാർട്ട്​ഫോൺ ഇൗ വർഷാവസാനം തന്നെ പുറത്തിറക്കുമെന്ന്​ അറിയിച്ചിരിക്കുകയാണ്​ റിലയൻസ്​ ജിയോ. ആൻഡ്രോയ്ഡ് പ്ലാറ്റ്ഫോമിൽ പ്രവർത്തിക്കുന്ന 100 മില്യൺ സ്​മാർട്ട്​ഫോണുകളായിരിക്കും ഇന്ത്യയിൽ ലോഞ്ച്​ ചെയ്യുക. ഫോണിനൊപ്പം ആകർഷകമായി ഡാറ്റാ പാക്കുകളും കമ്പനി വാഗ്​ദാനം ചെയ്​തേക്കുമെന്ന്​ ബിസിനസ്​ സ്റ്റാർഡാർഡ്​ പുറത്തുവിട്ട വാർത്തയിൽ പറയുന്നുണ്ട്​. അതേസമയം ഫോണുകൾ 5ജി പിന്തുണയോടെയാണോ എത്തുന്നത്​.. എന്ന കാര്യത്തിൽ സ്ഥിരീകരണമില്ല.

ഗൂഗ്​ളുമായി സഹകരിച്ച്​ ആൻഡ്രോയ്​ഡ്​ അടിസ്ഥാനമാക്കിയുള്ള സ്​മാർട്ട്​ഫോൺ ഒാപറേറ്റിങ്​ സിസ്റ്റം നിർമിക്കാനുള്ള തയാറെടുപ്പിലാണ് നിലവിൽ​ ജിയോ. നേരത്തെ ജിയോ ഇറക്കിയ 'ലൈഫ്'​ സ്​മാർട്ട്​ഫോണുകൾ ഇന്ത്യയിൽ മികച്ച രീതിയിൽ വിൽപ്പന നടന്നിരുന്നെങ്കിലും കൂടുതൽ മോഡലുകൾ കമ്പനി നിർമിച്ചിരുന്നില്ല. എന്നാൽ, ഇത്തവണ മികച്ച തിരിച്ചുവരവിനാണ്​ കമ്പനി ഒരുങ്ങുന്നത്​.