ജിയോക്ക്​ പഞ്ചാബിലെയും ഹരിയാനയിലെയും കർഷകർ കൊടുത്തത്​ എട്ടി​െൻറ പണി; നഷ്​ടമായത്​ ലക്ഷക്കണക്കിന്​ വരിക്കാർ

ന്യൂഡൽഹി: രാജ്യത്ത്​ ആളിപ്പടരുന്ന കർഷകരുടെ പ്രക്ഷോഭം ഏറ്റവും തിരിച്ചടി സമ്മാനിച്ചത്​ ഒരു പക്ഷെ മുകേഷ്​ അംബാനിക്കായിരിക്കും. പ്രതിഷേധിക്കാൻ തുടങ്ങിയ സമയത്ത്​ തന്നെ കർഷകർ ആഹ്വാനം ചെയ്​ത കാര്യങ്ങളിലൊന്ന്​ റിലയൻസ്​ ജിയോ ഉപേക്ഷിക്കാനായിരുന്നു. പിന്നാലെ പരസ്യമായി ജിയോ സിം നശിപ്പിച്ച്​ അത്​ പ്രാവർത്തികമാക്കുകയും ചെയ്​തു. ആളുകൾ മറ്റ്​ ടെലികോം കമ്പനികളിലേക്ക്​ പോർട്ട്​ ചെയ്​ത്​ കർഷകർക്ക്​ പിന്തുണയുമറിയിച്ചു.

അതേസമയം, ടെലികോം റെഗുലേറ്ററി അതോറിറ്റിയുടെ (ട്രായ്​) ഏറ്റവും പുതിയ കണക്കുകൾ അനുസരിച്ച്​, 2020 ഡിസംബർ മാസത്തിൽ മാത്രം പഞ്ചാബ്​, ഹരിയാന സംസ്ഥാനങ്ങളിൽ ജിയോക്ക്​ നഷ്​ടമായത്​ 20 ലക്ഷം വയർലെസ്​ വരിക്കാരെയാണ്​. പഞ്ചാബിൽ നവംബറിൽ 1.4 കോടി വരിക്കാരുണ്ടായിരുന്ന ജിയോക്ക്​ ഡിംസബറിൽ അത്​ 1.25 കോടിയായി ചുരുങ്ങി. ഹരിയാനയിലാക​െട്ട 94.48 ലക്ഷത്തിൽ നിന്നും 89.07 ലക്ഷമായും കുറഞ്ഞു.

ജിയോയുടെ നഷ്​ടം വലിയ നേട്ടമാക്കി മാറ്റിയത്​ എയർടെലാണ്​. കഴിഞ്ഞ മാസങ്ങളിലെ ട്രായ്​യുടെ കണക്കുകളിൽ ഏറ്റവും കൂടുതൽ ആക്​ടീവ്​ യൂസർമാരുള്ള ടെലികോം കമ്പനിയായി ചൂണ്ടിക്കാട്ടുന്നത്​ എയർടെലാണ്​. ലക്ഷക്കണക്കിന്​ ആളുകളാണ്​ പുതുതായി എയർടെലിലേക്ക്​ ചേക്കേറിയത്​. അതേസമയം, വൊഡാഫോൺ ​െഎഡിയക്ക്​ കാര്യമായ മുന്നേറ്റമുണ്ടായില്ല.