ബ്ലൂടൂത്തിലല്ല 'കോഡെക്കി'ലാണ് കാര്യം
text_fieldsവയർലെസ് ഹെഡ്ഫോണുകളും ഇയർഫോണുകളും സ്പീക്കറുകളും കൈയിലില്ലാത്തവർ ഇന്ന് ചുരുക്കമാണ്. കെട്ടുപിണഞ്ഞ വയറുകളുടെ അസ്വസ്ഥതകളില്ലാതെ ഫോൺ പോക്കറ്റിലോ കുറച്ചകലെയോ വെച്ച് പാട്ടും വിഡിയോകളും കാളിങ്ങും എല്ലാം ഈ വിരുതൻ ചെവിക്കുള്ളിലേക്ക് പകർന്നുതരും. ബ്ലൂടൂത്ത് സ്പീക്കറുകളും കേൾവി സൗകര്യത്തിന്റെ മേന്മ കൂട്ടുന്നു. വയർലെസ് ഹെഡ്ഫോണുകളും ഇയർഫോണുകളും സ്പീക്കറുകളും വാങ്ങുമ്പോൾ ശ്രദ്ധിക്കേണ്ട പ്രധാന സവിശേഷതകളിൽ ഒന്നാണ് 'ബ്ലൂടൂത്ത് കോഡെക്'. കൃത്യമായ ബ്ലൂടൂത്ത് കോഡെക്ക് കേൾവിതന്നെ മാറ്റിമറിക്കും.
സ്മാർട്ട്ഫോൺ, ടാബ്ലറ്റ്, ലാപ്ടോപ് എന്നിവക്കൊപ്പം വയർലെസ് ഹെഡ്ഫോണുകൾ, ഇയർഫോണുകൾ, സ്പീക്കർ എന്നിവയുടെ ബ്ലൂടൂത്ത് കോഡെക് യോജിച്ചു പോകണം. രണ്ടും ഒരേ നിലവാരത്തിലുള്ളവ തന്നെ തിരഞ്ഞെടുക്കുന്നതാണ് നല്ലത്. ഇപ്പോൾ എല്ലാവരും ഉള്ള കാശിന് ഒരു ഫോൺ വാങ്ങുകയും അതിന്റെ നിലവാരത്തിന് ചേരുമോ ഇല്ലയോ എന്നു നോക്കാതെ മറ്റേതെങ്കിലും വയർലെസ് ഇയർ ഫോണുകൾ തിരഞ്ഞെടുക്കുകയുമാണ്. അത് ശരിയല്ല. ഇനി കോഡെക്കുകളെ പരിചയപ്പെടാം.
എസ്.ബി.സി (സബ് ബാൻഡ് കോഡെക്)
• അടിസ്ഥാന ബ്ലൂടൂത്ത് കോഡെക് ആണ് എസ്.ബി.സി. സാധാരണ ബ്ലൂടൂത്ത് ഹെഡ്ഫോണുകളും ഇയർഫോണുകളും എസ്.ബി.സി ബ്ലൂടൂത്ത് കോഡെക്കിനെ മാത്രമേ പിന്തുണക്കൂ. ഇതിൽ ഓഡിയോ സിഗ്നൽ നന്നായി കംപ്രസ് ചെയ്യപ്പെടുന്നു. കൂടാതെ ശബ്ദനിലവാരവും കുറവായിരിക്കും.
ബിറ്റ് ഡെപ്ത്: 24 ബിറ്റ് വരെ
സാംപ്ലിങ് റേറ്റ്: 48 കിലോ ഹെർട്സ് വരെ
ബിറ്റ് റേറ്റ്: 328 കെ.ബി. പി.എസ് വരെ
എ.എ.സി (അഡ്വാൻസ്ഡ് ഓഡിയോ കോഡിങ്)
• ഇതേ പേരിലുള്ള എം.പി ത്രീ പോലുള്ള ഓഡിയോ ഫയൽ ഫോർമാറ്റായി തെറ്റിദ്ധരിക്കേണ്ട ഈ കോഡെക്കിനെ. എസ്.ബി.സിയെക്കാൾ ഒരുപടി മുകളിലാണ് എ.എ.സി ബ്ലൂടൂത്ത് കോഡെക്. ഐഫോണുകൾ, ഐപാഡുകൾ, ആപ്പിളിന്റെ എയർപോഡ് ശ്രേണിയിലുള്ള ബ്ലൂടൂത്ത് ഹെഡ്സെറ്റുകൾ എന്നിവയുടെ ബ്ലൂടൂത്ത് കോഡെക് ഇതാണ്.
ബിറ്റ് ഡെപ്ത്: 24 ബിറ്റ് വരെ
സാംപ്ലിങ് റേറ്റ്: 44.1 കിലോ ഹെർട്സ് വരെ
ബിറ്റ് റേറ്റ്: 320 കെ.ബി. പി.എസ് വരെ
ക്വാൽകോം aptX, aptX LL, aptX HD, aptX അഡാപ്റ്റിവ്
ക്വാൽകോം aptX കോഡെക് വർഷങ്ങളായി നിലവിലുണ്ട്. പിന്നീട് വന്ന പതിപ്പുകളാണ് aptX HD, aptX അഡാപ്റ്റിവ് പോലുള്ളവ. 576 കെ.ബി.പി.എസ് വരെ ബിറ്റ് റേറ്റ് ശേഷിയുണ്ട്.
ബിറ്റ് ഡെപ്ത്: 16-24 ബിറ്റ് വരെ
സാംപ്ലിങ് റേറ്റ്: 48 കിലോ
ഹെർട്സ് വരെ
ബിറ്റ് റേറ്റ്: 384-576 കെ.ബി.പി.എസ് വരെ
സാംസങ് സ്കേലബ്ൾ
• സാംസങ്ങിന്റെ സ്വന്തം കോഡെക്കാണ് സ്കേലബ്ൾ. ഇത് വേരിയബിളാണ്. നിരന്തരം മാറുന്ന, ക്രമീകരിക്കുന്ന ബിറ്റ്റേറ്റ് 512 കെ.ബി.പി.എസ് വരെ പോകുന്നു. കൂടാതെ മറ്റ് റേഡിയോ സിഗ്നലുകൾ ഉള്ള പരിതഃസ്ഥിതികളിൽ പോലും ഉയർന്ന നിലവാരമുള്ള ഡേറ്റ ട്രാൻസ്മിഷൻ സാധ്യമാക്കുന്നു. സ്കേലബ്ൾ കോഡെക് ഇപ്പോൾ സാംസങ് ഉപകരണങ്ങളിൽ മാത്രമേയുള്ളൂ.
എൽ.എച്ച്.ഡി.സി
(ലോ ലേറ്റൻസി ആൻഡ് ഹൈ ഡെഫനിഷൻ കോഡെക്)
• 900 കെ.ബി.പി.എസ് വരെ ഉയരുന്ന സ്വയം ക്രമീകരിക്കുന്ന ബിറ്റ്റേറ്റ് പിന്തുണയുള്ള മികച്ച ബ്ലൂടൂത്ത് കോഡെക്കുകളിൽ ഒന്നാണ് എൽ.എച്ച്.ഡി.സി. ഈ കോഡെക്കിന്റെ ഏറ്റവും വലിയ പോരായ്മ ഉപകരണങ്ങളുമായുള്ള ഒത്തുപോകലാണ്. അനുയോജ്യമായ വയർലെസ് ഹെഡ്സെറ്റുകളും ഉറവിട ഉപകരണങ്ങളും കുറവാണ്. ഷവോമി, ഒപ്പോ, വാവെയ് തുടങ്ങി ചുരുക്കംചില ബ്രാൻഡുകൾ മാത്രമേ ഇതിനെ പിന്തുണക്കുന്ന ഉൽപന്നങ്ങൾ പുറത്തിറക്കിയിട്ടുള്ളൂ. എണ്ണം കുറവായതാണ് ജനപ്രീതി നേടാതിരിക്കാൻ കാരണം.
ബിറ്റ് ഡെപ്ത്: 24 ബിറ്റ് വരെ
സാംപ്ലിങ് റേറ്റ്: 96 കിലോ ഹെർട്സ് വരെ
ബിറ്റ് റേറ്റ്: 900 കെ.ബി.പി.എസ് വരെ
സോണി എൽ.ഡി.എ.സി
• ലഭ്യമായ മികച്ച ജനപ്രിയ ബ്ലൂടൂത്ത് കോഡെക്കാണ് സോണി എൽ.ഡി.എ.സി. മൂന്നു തരത്തിൽ വേരിയബ്ൾ ബിറ്റ്റേറ്റ് ക്രമീകരിക്കും. സ്ഥിരമായ കണക്ടിവിറ്റിക്ക് 330 കെ.ബി.പി.എസ്, ശബ്ദനിലവാരത്തിന് 990 കെ.ബി.പി.എസ്, കൂടാതെ ഇവ രണ്ടും ചേർന്ന സന്തുലിതമായ 660 കെ.ബി.പി.എസ്. സോണി ഉൽപന്നങ്ങളിൽ മാത്രമാക്കിയിട്ടുണ്ടെങ്കിലും വിവിധ ബ്രാൻഡുകളുടെ ഹെഡ്സെറ്റുകളിൽ അടക്കം ലഭ്യമാണ്. നിരവധി ആൻഡ്രോയ്ഡ് സ്മാർട്ട്ഫോണുകളും ടാബ്ലറ്റുകളും ഇതിന് അനുയോജ്യമാണ്.
ബിറ്റ് ഡെപ്ത്: 24 ബിറ്റ് വരെ
സാംപ്ലിങ് റേറ്റ്: 96 കിലോ ഹെർട്സ് വരെ
ബിറ്റ് റേറ്റ്: 990 കെ.ബി. പി.എസ് വരെ
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.