ഇന്ത്യയിൽ വെച്ച്​ ചിപ്​ നിർമിക്കാമോ..; 7300 കോടി രൂപ തരാമെന്ന്​ സർക്കാർ

ചിപ്പുകൾ അഥവാ സെമി കണ്ടക്​ടറുകൾക്ക്​ ആഗോള തലത്തിൽ വലിയ ക്ഷാമം നേരിടുകയാണെന്ന​ റിപ്പോർട്ടുകൾക്ക്​​ പിന്നാലെ, പുതിയ പ്രഖ്യാപനവുമായി കേന്ദ്ര സർക്കാർ. മെയ്​ക്ക്​ ഇൻ ഇന്ത്യ പദ്ധതിയുടെ ഭാഗമായി ഇന്ത്യയിൽ ചിപ്​ നിർമാണ ഫാക്​ടറികൾ സ്ഥാപിക്കാൻ മുന്നോട്ടുവരുന്ന ഓരോ കമ്പനികൾക്കും ഒരു ബില്യൺ ഡോളർ (7300 കോടിയിലധികം രൂപ) പണമായി നൽകുമെന്നാണ്​ വാഗ്ദാനം. ഇന്ത്യയിലെ സ്​മാർട്ട്​ഫോൺ അസംബ്ലി വ്യവസായം വിപുലീകരിക്കാനും ഇലക്ട്രോണിക്സ് വിതരണ ശൃംഖല ശക്തിപ്പെടുത്താനുമാണ് പുതിയ സംരംഭം ലക്ഷ്യമിടുന്നത്.

കാറുകളിലും, കംപ്യൂട്ടർ, മൊബൈല്‍ ഫോണ്‍, ഗെയിമിങ്​ കണ്‍സോള്‍ തുടങ്ങി സകല ഇലക്​ട്രോണിക്​ ഗാഡ്​ജറ്റുകളിലും എന്തിന്​ മൈക്രോവേവ്​ അവനുകളിൽ പോലും അത്യാവശ്യമായ ഇലക്ട്രോണിക് ഭാഗങ്ങളാണ് സെമി കണ്ടക്ടറുകള്‍. ആഗോള തലത്തില്‍ വളരെ കുറച്ച് ചിപ്പ് നിര്‍മാണ കമ്പനികള്‍ മാത്രമാണുള്ളത്. ഇന്നുള്ള പല വ്യവസായ സംരംഭങ്ങളും നിലനില്‍ക്കുന്നത് അവരെ ആശ്രയിച്ചാണ്.

നിലവിലുള്ള ചിപ്പ് ക്ഷാമത്തിനിടയിൽ, ചിപ്​ നിർമാണ ഭീമന്മാരായ ക്വാൽകോം, മീഡിയടെക് എന്നിവർ അവരുടെ ഉത്പാദന പ്ലാന്‍റുകൾ ഇന്ത്യയിൽ സ്ഥാപിക്കണമെന്നാണ്​ സർക്കാർ ആഗ്രഹിക്കുന്നത്​. ''ചിപ്​ നിർമാണ യൂണിറ്റുകൾ സ്ഥാപിക്കുന്ന ഓരോ കമ്പനിക്കും സർക്കാർ പ്രോത്സാഹനമായി ഒരു ബില്യൺ ഡോളർ നൽകും. അതോടൊപ്പം സർക്കാർ ഒരു ഉപഭോക്​താവായിരിക്കുമെന്നും കമ്പനികൾ പ്രാദേശികമായി നിർമിച്ച ചിപ്പുകൾ തന്നെ വാങ്ങണമെന്ന ചട്ടം നിലവിൽ കൊണ്ടുവരുമെന്ന്​ ഉറപ്പുനൽകുമെന്നും'' അധികൃതർ ചൂണ്ടിക്കാട്ടുന്നു.

അതേസമയം, ലോകത്തെ ഏറ്റവും വലിയ സ്മാർട്ട്‌ഫോൺ നിർമാതാക്കളായ ചൈനയുമായി മത്സരിക്കാനാണ് ഇന്ത്യയുടെ പുതിയ ഒരു ബില്യൺ ഡോളർ സംരംഭത്തിന്‍റെ ലക്ഷ്യമെന്നാണ്​ സൂചന. നിലവിൽ ഒരു ചിപ്പ് നിർമ്മാതാക്കളും ഈ സംരംഭത്തിൽ താൽപര്യം കാണിച്ചിട്ടില്ലെന്നും സർക്കാർ ഉദ്യോഗസ്ഥർ കൂട്ടിച്ചേർത്തു. മാത്രമല്ല, ഈ വിഷയത്തിൽ ഇന്ത്യൻ സർക്കാരിൽ നിന്ന് ഒൗദ്യോഗിക പ്രതികരണങ്ങളൊന്നും വന്നിട്ടില്ല.

കോവിഡ്​ 19 വൈറസ് വ്യാപനം ശക്തിപ്പെട്ടതോടെയാണ് സെമികണ്ടക്ടര്‍ ചിപ്പുകളുടെ ക്ഷാമം ആരംഭിച്ചത്. മഹാമാരിക്ക്​ പിന്നാലെ ചിപ്പുകളുടെ ഡിമാന്‍റ്​ ഗണ്യമായി ഉയരുകയും നിർമാണം അതിനൊത്ത്​ ഉയരാതെ പോവുകയും ചെയ്യുകയായിരുന്നു. അതിന്​ പിന്നാലെ, ആഗോള കാർ നിർമാതാക്കളായ ഫോർഡ്​, നിസാൻ, ഫോക്​സ്​വാഗൻ, ഫിയറ്റ്​ എന്നിവർക്ക്​ നിർമാണം പോലും കുറക്കേണ്ടതായി വന്നു. കാർ നിർമാതാക്കൾ നൽകുന്നതിനേക്കാൾ വില നൽകി ചിപ്പുകൾ വാങ്ങാമെന്ന്​ ആപ്പിൾ പോലുള്ള ടെക്​ ഭീമൻമാർ അറിയിച്ചതും തിരിച്ചടിയായി ഭവിക്കുകയായിരുന്നു.