സേവനങ്ങള്‍ മുടങ്ങിയതിന് കാരണം യൂസർ ഐ.ഡി സംവിധാനത്തിന്‍റെ തകരാറെന്ന്​ ഗൂഗ്​ള്‍

കാലിഫോര്‍ണിയ: ഉപയോക്​താക്കളെ തിരിച്ചറിയുന്ന യൂസർ ഐ.ഡി. സംവിധാനത്തിന്‍റെ തകരാർ മൂലമാണ്​ തെന്ന വിശദീകരണവുമായി ഗൂഗ്​ള്‍.

ലോഗിന്‍ ചെയ്യുന്ന ഉപയോക്​താക്കളെ സ്ഥിരീകരിക്കുന്നതിനും ട്രാക്ക് ചെയ്യുന്നതിനും നിരവധി ടൂളുകള്‍ ഗൂഗ്​ള്‍ ഉപയോഗിക്കുന്നുണ്ട്. ഒക്ടോബറില്‍ ഇവയെയെല്ലാം പുതിയ ഫയല്‍ സ്റ്റോറേജ് സംവിധാനത്തിലേക്ക് മാറ്റുന്ന പ്രക്രിയ കമ്പനി ആരംഭിച്ചിരുന്നു. ഈ പ്രക്രിയയില്‍ പിഴവുകളുണ്ടായെന്നാണ്​ ഗൂഗ്​ള്‍ വിശദീകരിക്കുന്നത്​.

തിങ്കളാഴ്ച ഇന്ത്യന്‍ സമയം വൈകീട്ട് അഞ്ച് മണിയോടെയാണ് ഗൂഗ്​ളിന്‍റെ വിവിധ സേവനങ്ങളില്‍ മുക്കാൽ മണിക്കൂറോളം തടസം നേരിട്ടത്. ഗൂഗ്​ള്‍ ഡ്രൈവ്, ഗൂഗ്​ള്‍ കോണ്‍ടാക്ട്സ്, ഗൂഗ്​ള്‍ പേ അടക്കമുള്ളവയും തടസ്സപ്പെട്ടു. പ്രവര്‍ത്തനരഹിതമെന്ന സന്ദേശമാണ് ഉപയോക്​താക്കൾക്ക്​ ലഭിച്ചത്. ഗൂഗിള്‍ ക്ലൗഡ് സ്റ്റോറേജ് സേവനങ്ങളിലേക്ക് വന്ന 15 ശതമാനം റിക്വസ്റ്റുകളും നിരസിക്കപ്പെട്ടു.

സോളാര്‍ വിന്‍ഡ്‌സ് എന്ന സോഫ്റ്റ് വെയര്‍ കമ്പനിയ്ക്ക് നേരെയുണ്ടായ സൈബര്‍ ആക്രമണം ഗൂഗ്​ള്‍, മൈക്രോസോഫ്റ്റ് ഉള്‍പ്പടെയുള്ള കമ്പനികളെയും ചില അമേരിക്കന്‍ സര്‍ക്കാര്‍ ഏജന്‍സികളെയും സുരക്ഷാഭീഷണിയിലാക്കിയെന്ന റിപ്പോര്‍ട്ടുകളുടെ പശ്ചാത്തലത്തിലാണ് ഗൂഗ്​ൾ വെളിപ്പെടുത്തലുമായി രംഗത്തെത്തിയത്​. സോളാര്‍ വിൻഡ്​സിന്​ നേരെയുണ്ടായ ഹാക്കിങ് ശ്രമം തങ്ങളെ ബാധിച്ചിട്ടില്ലെന്ന് ഗൂഗ്​ൾ വ്യക്തമാക്കി.