അഡോബി സഹ സ്ഥാപകനും പി.ഡി.എഫ്​ വികസിപ്പിച്ചയാളുമായ ചാൾസ്​ ചക്​ ജെഷ്​കെ അന്തരിച്ചു

വാഷിങ്​ടൺ: പ്രമുഖ സോഫ്​റ്റ്​വെയർ കമ്പനി അഡോബിയുടെ സഹ സ്ഥാപകനും പോർട്ടബിൾ ഡോക്യുമെന്‍റ്​ ഫോർമാറ്റ്​ (പി.ഡി.എഫ്​) ടെക്​നോളജി വികസിപ്പിച്ചയാളുമായ ചാൾസ്​ ചക്​ ജെഷ്​കെ അന്തരിച്ചു. 81 വയസായിരുന്നു അദ്ദേഹത്തിന്​. 'അഡോബി കമ്യൂണിറ്റിക്കും ടെക്​നോളജി വ്യവസായത്തിനും ഇത്​ വലിയ നഷ്​ടമാണ്​. പതിറ്റാണ്ടുകളായി അദ്ദേഹം ഇതിന്‍റെ വഴികാട്ടിയും ഹീറോയുമായിരുന്നു'. - അഡോബി സി.ഇ.ഒ ശാന്തനു നാരായെൻ ജീവനക്കാർക്ക്​ അയച്ച ഇ-മെയിൽ സന്ദേശത്തിൽ പറഞ്ഞു.

"അഡോബിന്‍റെ സഹസ്ഥാപകരെന്ന നിലയിൽ, ചക്കും ജോൺ വാർനോക്കും ചരിത്രമായ സോഫ്റ്റ്​വെയറുകൾ വികസിപ്പിച്ചെടുത്തു, അത് ആളുകൾ എങ്ങനെ സൃഷ്ടിക്കുകയും ആശയവിനിമയം നടത്തുകയും ചെയ്യുന്നുവെന്നതിൽ വിപ്ലവം സൃഷ്ടിച്ചു," -നാരായെൻ പറഞ്ഞു. അക്ഷരങ്ങളും ചിത്രങ്ങളും കടലാസിൽ അച്ചടിക്കാൻ സമൂലമായ ഒരു പുതിയ മാർഗ്ഗം നൽകുകയും ഡെസ്ക്ടോപ്പ് പ്രസിദ്ധീകരണ വിപ്ലവത്തിന് കാരണമാവുകയും ചെയ്ത നൂതന സാങ്കേതികവിദ്യയായ 'അഡോബി പോസ്റ്റ്സ്​ക്രിപ്​റ്റ്​' ആയിരുന്നു അവരുടെ ആദ്യത്തെ ഉൽപ്പന്നം.

കമ്പനിയിൽ പുതുമയ്ക്കായി ചക്ക് നിരന്തരമായ പരിശ്രമങ്ങൾ നടത്തിയിരുന്നു. അതിന്‍റെ ഫലമായി സർവ്വവ്യാപിയായ പി.ഡി.എഫ് അടക്കം, അക്രോബാറ്റ്, ഇല്ലസ്ട്രേറ്റർ, പ്രീമിയർ പ്രോ, ഫോട്ടോഷോപ്പ് എന്നിവയുൾപ്പെടെയുള്ള ഏറ്റവും പരിവർത്തനാത്മക സോഫ്റ്റ്​വെയർ കണ്ടുപിടുത്തങ്ങളുണ്ടായി. " -അദ്ദേഹം കൂട്ടിച്ചേർത്തു.