താലിബാ​നെയും പിന്തുണക്കുന്ന ഉള്ളടക്കത്തിനും ഫേസ്​ബുക്ക്​ വിലക്കെന്ന്​ റിപ്പോർട്ട്​​

ലണ്ടൻ: അഫ്​ഗാൻ സംഭവങ്ങളുടെ പശ്ചാത്തലത്തിൽ താലിബാനും അവരെ പിന്തുണക്കുന്ന എല്ലാ ഉള്ളടക്കങ്ങൾക്കും​ ഫേസ്​ബുക്ക് നിരോധനമേർ​പ്പെടുത്തിയെന്ന്​ റിപ്പോർട്ട്​​. തീവ്രവാദ സംഘവുമായി ബന്ധപ്പെട്ട ഉള്ളടക്കം നിരീക്ഷിക്കുന്നതിനും നീക്കംചെയ്യുന്നതിനുമായി പ്രത്യേക സംഘത്തെ നിയോഗിച്ചതായി ഫേസ്​ബുക്ക്​ അറിയിച്ചു. അവർ പ്രാദേശികമായ ദാരി, പഷ്​തു ഭാഷ സംസാരിക്കുന്നവരും പ്രാദേശിക സാഹചര്യങ്ങളെക്കുറിച്ച്​ അറിവുള്ളവരും പ്ലാറ്റ്ഫോമിൽ ഉയർന്നുവരുന്ന പ്രശ്നങ്ങൾ തിരിച്ചറിയാനും മുന്നറിയിപ്പ് നൽകാനും കഴിയുന്നവരുമാണെന്ന്​ ഫേസ്​ബുക്ക്​ വക്താവ് പറഞ്ഞു.

വർഷങ്ങളായി താലിബാൻ അതി​െന്‍റ സന്ദേശങ്ങൾ പ്രചരിപ്പിക്കാൻ സമൂഹ മാധ്യമം ഉപയോഗിക്കുന്നു. യു.എസ് നിയമപ്രകാരം താലിബാൻ ഭീകര സംഘടനയാണ്​​. 'അപകടകരമായ ഓർഗനൈസേഷനുകളുമായി ബന്ധപ്പെട്ട നയങ്ങൾ' അനുസരിച്ചാണ്​​ അവരെ സേവനങ്ങളിൽനിന്ന് നീക്കിയതെന്ന്​ ഫേസ്​ബുക്​ അറിയിച്ചു. ഈ നയം ഇൻസ്​റ്റഗ്രാം, വാട്​സ്ആപ്​ എന്നിവയുൾപ്പെടെ എല്ലാ പ്ലാറ്റ്ഫോമുകൾക്കും ബാധകമാണെന്നും ഫേസ്ബുക്ക് വ്യക്​തമാക്കി.