വാക്​സിൻ രജിസ്​ട്രേഷ​െൻറ മറവിൽ സൈബർ തട്ടിപ്പ്; സ്വകാര്യ വിവരങ്ങൾ തേടി​ കോളുകൾ ലഭിച്ചത്​ നിരവധി പേർക്ക്​

ലഖ്​നൗ: വരുന്ന ആഴ്ചകളിൽ കൊറോണ വൈറസിനെതിരായ പ്രതിരോധ കുത്തിവെപ്പ്​ നടത്താൻ അധികൃതർ സജ്ജമായിക്കൊണ്ടിരിക്കുകയാണ്​. അതിനിടെ വാക്സിൻ രജിസ്ട്രേഷ​െൻറ മറവിൽ സ്വകാര്യ വിവരങ്ങൾ ആവശ്യപ്പെട്ട്​​ സൈബർ കുറ്റവാളികൾ വിളിക്കുന്നതായുള്ള പരാതിയുമായി​ ഉത്തർപ്രദേശ് നിവാസിൾ. ഇത്തരം തട്ടിപ്പുകളുമായി ബന്ധപ്പെട്ട നിരവധി കേസുകൾ സമീപകാലത്തായി അധികാരികളുടെ ശ്രദ്ധയിൽ പെട്ടിട്ടുണ്ട്​.

ആധാർ നമ്പർ, ബാങ്ക് അക്കൗണ്ട്, ഇൻഷുറൻസ് പോളിസി വിശദാംശങ്ങൾ തുടങ്ങിയ സുപ്രധാന വ്യക്തിഗത വിവരങ്ങൾ തേടിയുള്ള കോളുകളാണ്​ ലഭിക്കുന്നത്​. ഗോരഖ്പൂർ, ദിയോറിയ, ബസ്തി, മൗ, ഘാസിപൂർ, പ്രതാപ്​ഗഢ്​ എന്നിവിടങ്ങളിൽ നിന്നുള്ള നിരവധി ആളുകൾക്ക് ഇത്തരം കോളുകൾ ലഭിച്ചതായും റിപ്പോർട്ടുകളുണ്ട്​.

സൈബർ തട്ടിപ്പുകളിൽ വഞ്ചിതരാകാതിരിക്കാൻ പൊതുജനങ്ങൾക്ക്​ ആരോഗ്യ വകുപ്പും പോലീസ് ഉദ്യോഗസ്ഥരും മുന്നറിയിപ്പ്​ നൽകിയിട്ടുണ്ട്​. ആരുമായും വിശദാംശങ്ങൾ പങ്കുവെക്കരുതെന്നും കെണിയിൽ വീഴരുതെന്നും അവർ അറിയിച്ചു.

'ആളുകളെ രജിസ്റ്റർ ചെയ്യുന്നതിനോ വാക്സിനേഷൻ നൽകുന്നതിനോ ആരോഗ്യവകുപ്പ് ആരെയും കോൾ ചെയ്യാറില്ല. സൈബർ കുറ്റകൃത്യത്തിന് ഇരയാകാൻ സാധ്യതയുള്ളതിനാൽ വാക്‌സിൻ രജിസ്ട്രേഷ​െൻറ പേരിൽ ആർക്കും വിവരങ്ങൾ നൽകരുത്​. നിലവിൽ നിരവധി തട്ടിപ്പുകൾ നമ്മുടെ ശ്രദ്ധയിൽ പെട്ടിട്ടുണ്ട്'​. ഫ്രണ്ട്​ലൈനിലുള്ള കോവിഡ്​ യോദ്ധാക്കൾക്കായുള്ള പ്രതിരോധ കുത്തിവെപ്പ്​ ജനുവരി മൂന്നാം വാരത്തിൽ ആരംഭിക്കുമെന്നും മുതിർന്ന ആരോഗ്യ ഉദ്യോഗസ്ഥൻ ഇതുമായി ബന്ധപ്പെട്ട്​ പറഞ്ഞു.