ഇൻറർനെറ്റിന്​ 'കൺ​ട്രോൾ' മുറുക്കി​ ചൈന; കഴിഞ്ഞവർഷം അടച്ചുപൂട്ടിയത്​ 18,489 വെബ്​സൈറ്റുകൾ

ലോകത്ത്​ ഇൻറർനെറ്റ്​ ഉപയോഗത്തിന്​ കർശന നിയന്ത്രണം ഏർപ്പെടുത്തുന്ന രാജ്യങ്ങളിൽ മുമ്പനാണ്​ ചൈന. വിദേശ സോഷ്യൽ മീഡിയ പ്ലാറ്റ്​ഫോമുകളും സേർച്ച്​ എഞ്ചിനുകളും ഒാൺലൈൻ ഷോപ്പിങ്​ സൈറ്റുകളും നിരോധിച്ച്​, ​ചൈനീസ്​ ഭരണകൂടം അവയുടെ സ്വദേശി പകരക്കാരെയാണ്​ പ്രോത്സാഹിപ്പിക്കാറുള്ളത്​. ചൈന കഴിഞ്ഞ വർഷം രാജ്യത്ത്​ അടച്ചുപൂട്ടിയത്​ 18,489 വെബ്​സൈറ്റുകളാണ്​. 4,551 ഓൺലൈൻ പ്ലാറ്റ്ഫോമുകൾക്ക് മുന്നറിയിപ്പ് നോട്ടീസ് നൽകുകയും ചെയ്തതായി സർക്കാർ നിയന്ത്രിത മാധ്യമങ്ങൾ റിപ്പോർട്ട്​ ചെയ്യുന്നു​.

നിയമവിരുദ്ധം എന്ന്​ കാട്ടിയാണ്​ സൈറ്റുകൾ വിലക്കിയത്​. ഒാൺലൈൻ കോഴ്​സുകൾ എന്ന വ്യാജേന, ഒാൺലൈൻ ഗെയിമിങ്ങും ഡേറ്റിങ്​ വിവരങ്ങളും പ്രമോട്ട്​ ചെയ്​തതിനാണ്​​ വെബ്​ സൈറ്റുകൾ അടച്ചുപൂട്ടിയത്​. അതേസമയം, അശ്ലീലവും അക്രമപരവുമായ ഉള്ളടക്കം ഉൾപ്പെടെയുള്ള നിയമവിരുദ്ധമായ കാര്യങ്ങൾ പ്രചരിപ്പിച്ചതിനാണ്​ മറ്റുള്ളവക്ക്​ മുന്നറിയിപ്പ്​ നൽകിയതെന്നും സൈബർസ്പേസ് അഡ്മിനിസ്ട്രേഷൻ ഓഫ് ചൈന (സിഎസി) അറിയിച്ചു. എന്നാൽ, ചൈനീസ്​ സർക്കാരിനെ വിമർശിച്ചുകൊണ്ടുള്ള ഉള്ളടക്കങ്ങളുള്ള വെബ്​സൈറ്റുകളും വിലക്കിയവയിൽ പെടുമെന്ന്​ വിമർശകർ ആരോപിക്കുന്നുണ്ട്​.

നിയമവിരുദ്ധ പ്രവർത്തനങ്ങൾ പ്രോത്സാഹിപ്പിക്കുന്നതും സമൂഹത്തിൽ പ്രതികൂല സ്വാധീനം ചെലുത്തുന്നതും കുട്ടികളെ മോശമായി ബാധിക്കുന്ന വിവരങ്ങൾ ഉൾക്കൊള്ളുന്നതുമായ പ്ലാറ്റ്ഫോമുകളുള്ള സൈബർ സ്പേസ് ശുദ്ധീകരിക്കുന്നതിനായി 2020 ൽ സൈബർസ്പേസ് അഡ്മിനിസ്ട്രേഷൻ വകുപ്പുകൾ നിരവധി പ്രചാരണ പരിപാടികൾ ആരംഭിച്ചതായി സർക്കാർ നിയന്ത്രിത വാർത്താ ഏജൻസിയായ സിൻ‌ഹുവ റിപ്പോർട്ട് ചെയ്തു.