ബി.ജി.എം.ഐ ഇനി ബജറ്റ്​ ഫോണുകളിലും കളിക്കാം; ഇന്ത്യയിൽ ലൈറ്റ്​ വേർഷനുമായി ക്രാഫ്​റ്റൺ

പബ്​ജി ​മൊബൈലിന്​ പകരമായി ഇന്ത്യയിൽ ക്രാഫ്​റ്റൺ അവതരിപ്പിച്ച ഗെയിമാണ്​ ബാറ്റിൽഗ്രൗണ്ട്​ മൊബൈൽ ഇന്ത്യ (ബി.ജി.എം.ഐ). രാജ്യത്ത്​ ഏറ്റവും വലിയ സ്വീകാര്യത നേടിക്കൊണ്ട്​ കുതിക്കുകയാണ്​ ബി.ജി.എം.ഐ ഇപ്പോൾ.

മിക്ക ആൻഡ്രോയ്​ഡ്​, ഐ.ഒ.എസ്​ ഡിവൈസുകളിലും ഗെയിം പ്രവർത്തിക്കുന്നുണ്ടെങ്കിലും, പ്രകടനം, ഫ്രെയിം റേറ്റുകൾ, ഇൻ-ഗെയിം അനുഭവം എന്നിവ ഓരോ ഫോണുകളിലും അവയുടെ സവിശേഷതകളെ ആശ്രയിച്ച് വ്യത്യാസപ്പെട്ടിരിക്കും.

അതിനാൽ, വിലയും ഫീച്ചേഴ്​സും കുറഞ്ഞ ലോ-എൻഡ്​ ഫോണുകൾ ഉപയോഗിക്കുന്ന ഗെയിമർമാർക്കായി ക്രാഫ്​റ്റൺ ബി.ജി.എം.ഐയുടെ 'ലൈറ്റ്​' വേർഷൻ ലോഞ്ച്​ ചെയ്യാൻ പോവുകയാണ്​.

'ബി.ജി.എം.ഐ ലൈറ്റ്​' -ന്​ ആവശ്യക്കാരുണ്ടോ എന്നറിയാനായി ക്രാഫ്​റ്റൺ ഈയിടെ​ അവരുടെ ഡിസ്​കോർഡ്​ അക്കൗണ്ടിൽ ഒരു പോൾ നടത്തിയിരുന്നു. 'ബി.ജി.എം.ഐ ലൈറ്റ് എന്തുകൊണ്ടാണ്​ നിങ്ങൾക്ക്​ ആവശ്യമായി വരുന്നത്...?​ എന്ന ചോദ്യവും അതിനുള്ള നാല്​ ഓപ്​ഷനുകളും നൽകിക്കൊണ്ടായിരുന്നു പോൾ നടത്തിയത്​.

• എനിക്ക്​ ലോ-എൻഡ്​ ഫോണുകളിൽ ബി.ജി.എം.ഐ കളിക്കാൻ സാധിക്കുന്നില്ല.
• ബി.ജി.എം.ഐ ലൈറ്റ്​ വേർഷന്​ എന്‍റെ ഡിവൈസിൽ മികച്ച ഫ്രെയിം റേറ്റും പ്രകടനവും ഉണ്ടായേക്കും
• ഞാൻ LITE പതിപ്പിലാണ്​ പണം ചെലവഴിച്ചിരിക്കുന്നത്​, എന്‍റെ ഡാറ്റ/ഇൻവെന്‍ററി അതിലേക്ക്​ ട്രാൻസ്​ഫർ ചെയ്യാൻ ആഗ്രഹിക്കുന്നു.
• LITE പതിപ്പിലെ മാപ്പുകളും സ്‌കിന്നുകളും ഞാൻ ഇഷ്ടപ്പെടുന്നു. - എന്നിങ്ങനെയാണ്​ ക്രാഫ്​റ്റൺ നൽകിയിരിക്കുന്ന ഓപ്​ഷനുകൾ.

മതിയായ എണ്ണം കളിക്കാർക്ക് BGMI ലൈറ്റ് വേർഷൻ വേണോ / വേണ്ടയോ എന്നും അത്​ എന്തുകൊണ്ടാണെന്നും അറിയാൻ Krafton ആഗ്രഹിക്കുന്നുണ്ട്​. അതിനാൽ, വോട്ടെടുപ്പിന് കളിക്കാരിൽ നിന്ന് നല്ല പ്രതികരണം ലഭിക്കുകയാണെങ്കിൽ, ലോവർ എൻഡ് ഉപകരണങ്ങൾക്കായി ക്രാഫ്റ്റൺ ഉടൻ തന്നെ BGMI ലൈറ്റ് പുറത്തിറക്കിയേക്കാം.