പ്രൈം മെംബർഷിപ്പ്​ ചാർജ്​ കുത്തനെ കൂട്ടി ആമസോൺ; ഉടൻ പ്രാബല്യത്തിൽ വരും

ഒരു മാസം നീണ്ടുനിൽക്കുന്ന ഉത്സവ വിൽപ്പനയ്‌ക്കിടെ, ഞെട്ടിക്കുന്ന പ്രഖ്യാപനവുമായി ആമസോൺ ഇന്ത്യ രംഗത്ത്​.​ പ്രൈം അംഗത്വ സബ്‌സ്‌ക്രിപ്‌ഷൻ പ്ലാനുകളുടെ ചാർജ്​ 50 ശതമാനം വരെ വർദ്ധിപ്പിക്കുമെന്നാണ്​ അമേരിക്കൻ ടെക്​ ഭീമൻ അറിയിച്ചിരിക്കുന്നത്​. വാർഷിക ചാർജ്​ 500 രൂപയാണ്​ ഉയർത്തിയിരിക്കുന്നത്​. പ്രതിമാസ പ്ലാനുകളുടെയും മൂന്ന്​ മാസ പ്ലാനുകളുടെയും ചാർജുകൾ ഇതുപോലെ വർധിപ്പിക്കും.

പ്രൈം വാർഷിക മെംബർഷിപ്പിന്​​​ ഇതുവരെ 999 രൂപയായിരുന്നു ചാർജ്​. അത്​ 1499 രൂപയാക്കി. ത്രൈമാസ പ്ലാൻ 329ൽ നിന്ന്​ 459 ആക്കി ഉയർത്തി. പ്രതിമാസ പ്ലാനിന്​ ഇനിമുതൽ 179 രൂപ നൽകേണ്ടി വരും. 129 ആയിരുന്നു ആദ്യത്തെ ചാർജ്​. അതേസമയം, ഇ-കൊമേഴ്സ് ഭീമൻ പുതുക്കിയ ചാർജുകൾ പ്രാബല്യത്തിൽ വരുന്ന കൃത്യമായ ഡേറ്റ്​ പുറത്തുവിട്ടിട്ടില്ല. ഉടൻ തന്നെ ചാർജുകൾ വർധിപ്പിക്കുമെന്ന്​ മാത്രമാണ്​ അറിയിച്ചിരിക്കുന്നത്​.

ആമസോൺ പ്രൈം വിഡിയോ, ആമസോൺ മ്യൂസിക്​, ആമസോൺ ഒാഡിബിൾ, ആമസോൺ ഷോപ്പിങ്​ ആപ്പ്​ ഉപയോഗിക്കുന്നവർക്ക്​ സൗജന്യ ​ഡെലിവറി, എന്നിങ്ങനെയാണ്​ പ്രൈം മെംബർഷിപ്പ്​ നൽകുന്ന ആനുകൂല്യങ്ങൾ. മറ്റേത്​ ഒടിടി പ്ലാറ്റ്​ഫോമുകളിലുള്ളതിനേക്കാളും കൂടുതൽ ഇന്ത്യൻ ഉള്ളടക്കങ്ങൾ സ്​ട്രീം ചെയ്യുന്നതിനാൽ ആമസോൺ പ്രൈം വിഡിയോക്ക്​ രാജ്യത്ത്​ കോടിക്കണക്കിന്​ വരിക്കാരാണുള്ളത്​.