തിരിച്ചുവരും ഒരു 5ജി സ്​മാർട്ട്​ഫോണുമായി; ഇത്​ ബ്ലാക്ക്​ബെറിയുടെ വാക്ക്​

ഇൗ വർഷം തുടക്കത്തിൽ ടി.സി.എല്ലുമായുള്ള പങ്കാളിത്തം അവസാനിപ്പിച്ചതോടെ ബ്ലാക്ക്​ബെറിയുടെ അന്ത്യമായെന്ന്​ കരുതിയവർക്ക്​ തെറ്റി. തങ്ങൾ തിരിച്ചുവരുമെന്ന സൂചന നൽകിയിരിക്കുകയാണ്​ അമേരിക്കൻ കമ്പനിയായ ബ്ലാക്ക്​ബെറി. ടെക്​സാസ്​ അടിസ്ഥാനമാക്കിയുള്ള സ്റ്റാർട്ടപ്പായ ഒാൺവാർഡ്​ മൊബിലിറ്റിയുമായി സഹകരിച്ച്​ പുതിയ 5ജി ആൻഡ്രോയ്​ഡ്​ ഫോൺ നിർമിക്കുമെന്നാണ്​ ബ്ലാക്​ബെറി പ്രഖ്യാപിച്ചിരിക്കുന്നത്​. 2021ൽ അവതരിപ്പിക്കുന്ന പുതിയ സ്​മാർട്ട്​ഫോണിന്​ പതിവുപോലെ QWERTY ഫിസിക്കൽ കീബോർഡും ഉണ്ടായിരിക്കും.

തുടക്കത്തിൽ അമേരിക്ക, യൂറോപ്പ്​ എന്നിവിടങ്ങളിലാണ്​ ഫോൺ ലോഞ്ച്​ ചെയ്യുക. ബ്ലാക്ക്​ബെറിക്ക്​ വളരെ ചെറിയ മാർക്കറ്റുള്ള ഇന്ത്യയിൽ ഫോൺ അവതരിപ്പിക്കാൻ ഇടയില്ലെന്നും സൂചനയുണ്ട്​. 5ജി പിന്തുണയുള്ള ഒരു മോഡൽ മാത്രമായിരിക്കും ബ്ലാക്ക്​ബെറി വിപണയിൽ ഇറക്കുക. ഒാൺവാർഡ്​ മൊബിലിറ്റിയുമായുള്ള സഹകരണം തുടരുകയാണെങ്കിൽ ബ്ലാക്ക്​ബെറി ആരാധകർക്ക്​ കൂടുതൽ മോഡലുകൾ പ്രതീക്ഷിക്കാം.

സാധാരണ ഉപയോക്​താക്കൾക്ക്​ ഫോണിൽ പ്രത്യേക ഫിസിക്കൽ കീബോർഡ്​ വേണ്ടെന്നിരിക്കെ പതിവുപോലെ പ്രൊഫഷണൽ യൂസർമാരെ തന്നെയായിരിക്കും കമ്പനി ലക്ഷ്യമിടുക. സൈബർ ആക്രമണങ്ങളിൽ നിന്നും സുരക്ഷയേകാൻ മികച്ച സെക്യൂരിറ്റി ഫീച്ചറുകളടക്കമായിരിക്കും ഫോൺ എത്തുക. പഴയ ഫോണുകളിൽ സംഭവിച്ച പിഴവുകളും പ്രശ്​നങ്ങളും പരിഹരിച്ച്​ പുതിയ പങ്കാളിക്കൊപ്പം ശക്​തമായ തിരിച്ചുവരവിനാണ്​ ബ്ലാക്ക്​ബെറി ലക്ഷ്യമിടുന്നത്​.