ടെസ്​ല കാർ ഉരുക്കി മസ്​കിന്‍റെ പ്രതിമയും ഐഫോൺ 13ഉം നിർമിച്ചു; വില ലക്ഷങ്ങൾ -വിഡിയോ

43 ലക്ഷം രൂപ വിലയുള്ള ടെസ്​ല മോഡൽ 3 എന്ന ആഡംബര കാർ ഉരുക്കി ടെസ്‌ല സിഇഒ എലോൺ മസ്‌കിന്‍റെ എട്ട് ഇഞ്ച് ഉയരമുള്ള 27 പ്രതിമകൾ നിർമ്മിച്ചു. റഷ്യ ആസ്ഥാനമായുള്ള ആഡംബര ഉപകരണ കമ്പനിയായ കാവിയാറാണ് ഈ വിചിത്രമായ​ സാഹസത്തിന്​ മുതിർന്നത്​.

കാറിന്‍റെ ചില പാർട്​സ്​ ഉപയോഗിച്ച്​ കസ്റ്റമൈസ്​ഡ്​ ഐഫോൺ 13 പ്രോയും ഐഫോൺ 13 പ്രോ മാക്​സും കാവിയാർ നിർമിച്ചിട്ടുണ്ട്​. ഇലോൺ മസ്​കിന്‍റെ പ്രതിമ​ ഒന്നിന് 2.4 ലക്ഷം രൂപയ്ക്കാണ്​ വിൽക്കുന്നത്​. ഐഫോൺ മോഡലുകളുടെ വിലയാരംഭിക്കുന്നതാക​ട്ടെ അഞ്ച്​ ലക്ഷം രൂപ മുതലും.

"തങ്ങൾ നിർമിച്ച ഈ രണ്ട്​ ഉത്​പന്നങ്ങളും​ ഇലോൺ മസ്‌കിന്റെ ആത്മാവിനെ ഉൾക്കൊള്ളുന്നു, അതിനാൽ, ഈ പ്രഗത്ഭ വ്യക്തിയുടെ വിജയവും സർഗ്ഗാത്മകതയും ഇവ വാങ്ങിക്കുന്നവരിലേക്കും പകർന്നുകിട്ടും" കാവിയാർ കമ്പനി സ്ഥാപകനായ സെർജി കിറ്റോവ് പ്രസ്​താവനയിൽ കുറിച്ചു. അതേസമയം, മസ്​കിന്‍റെ പ്രതിമയ്​ക്ക്​ ജീവിച്ചിരിക്കുന്ന മസ്​കുമായി സാമ്യത കുറവാണെന്ന പരാതിയുമായി നെറ്റിസൺസ്​ എത്തി.