ടിക്​ടോകിന്​ തിരിച്ചടിയായി മിത്രോം ആപ്പ്​; ഡൗൺലോഡ്​ ചെയ്​തത്​ 50 ലക്ഷം പേർ

15:44 PM
28/05/2020
mitron-vs-tiktok

ന്യൂഡൽഹി: ചൈനീസ്​ വിഡിയോ ഷെയറിങ്​ ആപ്പായ ടിക്​ടോക്​ ഇപ്പോൾ ഇന്ത്യയിൽ ചർച്ചാവിഷയമാണ്​. ടിക്​ടോക്​ Vs യൂട്യൂബ്​ വെർച്വൽ യുദ്ധം കൊടുമ്പിരികൊള്ളു​േമ്പാൾ അതുമുതലെടുത്ത്​ ടിക്​ടോകിന്​ ഒരു അപരനെ ഒരുക്കിയിരിക്കുകയാണ്​ ഐ.ഐ.ടി റൂർക്കിയിലെ വിദ്യാർഥി. മിത്രോം ടി.വി എന്ന്​ പേരിട്ടിരിക്കുന്ന ആപ്പ്​ ഇപ്പോൾ രാജ്യത്ത്​ തരംഗമായിരിക്കുകയാണ്​. ആപ്പ്​ പ്ലേസ്​റ്റോറിൽ അവതരിപ്പിച്ച്​ ഒരു മാസം തികയുന്നതിന്​ മു​േമ്പ, 50 ലക്ഷം പേരാണ്​ ഡൗൺലോഡ്​ ചെയ്​തത്​​. 

പ്ലേസ്​റ്റോറിൽ 4.7 റേറ്റിങ്ങുമുള്ള മിത്രോം ടി.വി സമീപകാലത്ത്​ റേറ്റിങ്​ കുത്തനെ ഇടിഞ്ഞ ടിക്​ടോകിന്​ വെല്ലുവിളിയായിരിക്കുകയാണ്​. ടിക്​ടോക്​ പോലെ തന്നെ വിനോദത്തിനായി ചെറു വിഡിയോകൾ പോസ്​റ്റ്​ ചെയ്യാവുന്ന വിധത്തിലാണ്​ ഇന്ത്യൻ ആപ്പിൻെറയും നിർമാണം. നിലവിൽ ഒരു മൾട്ടിനാഷണൽ കമ്പനിയിൽ ജോലി ചെയ്യുന്ന ഒരു യുവാവാണ്​ ആപ്പിന്​ പിന്നിൽ. അതുകൊണ്ട്​ തന്നെ പേരും മറ്റ്​ വിവരങ്ങളും വെളിപ്പെടുത്താൻ സാധിക്കില്ലെന്നാണ്​ യുവാവ്​ പറയുന്നത്​. 

ചൈനാ വിരോധം മുതലെടുത്ത്​

കോവിഡ്​ വിഷയത്തിൽ ലോകം പ്രതിസ്ഥാനത്ത്​ പ്രതിഷ്​ഠിച്ചിരിക്കുന്ന രാജ്യമാണ്​ ചൈന. മഹാമാരിയുടെ കാരണക്കാരനെന്ന്​ അമേരിക്കൻ പ്രസിഡൻറ്​ ഡോണൾഡ്​ ട്രംപ്​ നിരന്തരം ആക്ഷേപിക്കുന്ന ചൈനയോട്​ ഇന്ത്യക്കും സമീപകാലത്തായി അത്ര നല്ല അടുപ്പമല്ല നിലനിൽക്കുന്നത്​. ടിക്​ടോക് അടക്കമുള്ള ചൈനീസ്​ ആപ്പുകൾ​ കോടിക്കണക്കിന്​ വരുന്ന ഇന്ത്യക്കാരുടെ വിവരങ്ങൾ ചോർത്തുന്നതായി ശശി തരൂർ എം.പിയെ പോലുള്ള പ്രമുഖർ ആരോപണമുന്നയിക്കുകയും ചെയ്​തിരുന്നു. 

ചൈനീസ്​ ഫോണുകളോ മറ്റ്​ ഇലക്​ട്രോണിക്​ ഉപകരണങ്ങളോ ഉപയോഗിക്കാത്ത ഒരു ഇന്ത്യക്കാരനെ ചൂണ്ടിക്കാണിക്കാൻ പറഞ്ഞാൽ തലചൊറിയേണ്ട അവസ്ഥ നിലനിൽക്കുന്ന സാഹചര്യത്തിൽ ചൈനയെ വെല്ലുവിളിച്ചുകൊണ്ട്​ വന്ന ആപ്പിന്​ ഇന്ത്യക്കാർ അകമഴിഞ്ഞ സ്​നേഹം നൽകുന്നതിൽ അദ്​ഭുതപ്പെടാനില്ല. 

എന്നാൽ, മിത്രോം ആപ്പിൻെറ ഭാവിയെ കുറിച്ച്​ ഒരു ഉറപ്പും നൽകാൻ സാധിക്കാത്ത വിധമാണ്​ അതിൻെറ നിർമാണം. ഒറ്റ നോട്ടത്തിൽ ടിക്​ടോകിൻെറ ക്ലോൺ എന്ന്​ തോന്നിപ്പിക്കുന്ന ആപ്പിനെതിരെ ടിക്​ടോക്​ ഒരു കോപിറൈറ്റ്​ കേസ്​ ഫയൽ ചെയ്​താൽ അതിന്​ പിന്നിലുള്ളവർ കുടുങ്ങുമെന്നും ചിലർ മുന്നറിയിപ്പ്​ നൽകുന്നുണ്ട്​​. 

ആപ്പിൻെറ പരിമിതികളെ കുറിച്ചും പ്ലേസ്​റ്റോർ റിവ്യൂ സെഷനിൽ പരാതികൾ ഉയർന്നുതുടങ്ങിയിട്ടുണ്ട്​. ‘ഇന്ത്യയിൽ നിർമിച്ചത്​ കൊണ്ട്​ പിന്തുണക്കുന്നു’ എന്ന്​ പറഞ്ഞുതുടങ്ങുന്ന നിരൂപണങ്ങളിലും ആപ്പിൻെറ പോരായ്​മകൾ മിക്കവരും വിവരിക്കുന്നുണ്ട്​. റേറ്റിങ്​ കൂട്ടി നൽകുന്നവരും ആപ്പിലെ ബഗ്ഗുഗൾ പരിഹരിക്കാനാണ്​ നിർദേശിക്കുന്നത്​. 

ഇന്ത്യയിൽ ഏറ്റവും ട്ര​െൻറിങ്ങായ ആപ്പുകളിൽ നിലവിൽ രണ്ടാം സ്ഥാനത്താണ്​ മിത്രോമുള്ളത്​. ആപ്പിന്​ ലഭിച്ചിരിക്കുന്ന അപ്രതീക്ഷിത സ്വീകരണത്തിൽ അമ്പരന്നിരിക്കുകയാണ്​ നിർമാതാക്കൾ. ഐ.ഐ.ടി വിദ്യാർഥിക്ക്​ പുറമേ നാല്​ പേരാണ്​ ആപ്പ്​ നിയന്ത്രിക്കുന്നത്​. കൂടുതൽ മികച്ച ഫീച്ചറുകൾ ഉൾപ്പെടുത്തി ആപ്പ്​ ഇൻറർഫേസ്​ ടിക്​ടോകിൽ നിന്നും വ്യത്യസ്​തമാക്കി അവതരിപ്പിച്ചാൽ ആഗോളതലത്തിൽ തന്നെ മിത്രോം​ തരംഗമായേക്കാം. 
 

Loading...
COMMENTS