22,522 രൂപയ്ക്ക്​ ഐഫോൺ? ആപ്പിൾ ഞെട്ടിക്കുമെന്ന്​ അനലിസ്റ്റുകൾ, മാർച്ചിലെ ലോഞ്ചിനായി കാത്ത്​ ടെക്​ ലോകം

2020-ലായിരുന്നു ആപ്പിൾ അവരുടെ രണ്ടാം തലമുറ ഐഫോൺ എസ്​.ഇ അവതരിപ്പിച്ചത്​. ചെറിയ ഐഫോണുകളോടും ആപ്പിളിന്‍റെ ടച്ച്​ ഐഡിയോടും ഭ്രമമുള്ളവർ ഐഫോൺ എസ്​.ഇ 2020 വാങ്ങിയിരുന്നു. ഐഫോൺ ഫ്ലാഗ്​ഷിപ്പുകൾ സ്വന്തമാക്കാൻ കാശില്ലാത്തവരും എസ്​.ഇ മോഡലിന്​ പിറകേ പോയി. എന്നാലും കുറഞ്ഞ സൈസിലുള്ള ബാറ്ററി എസ്​.ഇയുടെ വലിയൊരു പോരായ്മയായി മുഴച്ചു നിന്നിരുന്നു.

ഐഫോൺ എസ്​.ഇയുടെ പുതുക്കിയ മോഡൽ മാർച്ച്​ എട്ടിന്​ ആപ്പിൾ അവതരിപ്പിക്കുമെന്ന്​ റിപ്പോർട്ടുകൾ പ്രചരിക്കവേ, ഫോണിന്‍റെ വിലയെ കുറിച്ച്​ ടെക്​ വിദഗ്​ധർ സൂചന നൽകിയിരിക്കുകയാണ്​. 300 ഡോളർ മുതലായിരിക്കും എസ്​.ഇ 2022 വകഭേദത്തിന് ആപ്പിൾ​ വിലയിടുകയെന്നാണ്​ അനലിസ്റ്റായ ജോൺ ഡോനവൻ പറയുന്നത്​. അതായത്​ 22,000 രൂപ മുതൽ. ഐഫോൺ എസ്​.ഇ 2020 മോഡലിനേക്കാൾ 99 ഡോളർ കുറവാണ്​ പുതിയ എസ്​.ഇക്ക്​. അതേസമയം, മറ്റൊരു അനലിസ്റ്റായ ഡാനിയൽ ഐവ്​സ്​ ആപ്പിൾ 399 ഡോളറെന്ന വില തന്നെ തുടർന്നേക്കുമെന്നാണ്​ പറയുന്നത്​. അതേസമയം, 300 ഡോളറിന്​ അവതരിപ്പിച്ചാലും ഇന്ത്യയിലേക്ക്​ എത്തുമ്പോൾ ഫോണിന്​ സ്വാഭാവികമായും അൽപ്പം വില കൂടിയേക്കും.

iPhone SE+ 5G എന്ന പേരിൽ വരാൻ സാധ്യതയുള്ള പുതിയ ഐഫോൺ എസ്​.ഇ, 5G പിന്തുണ, മെച്ചപ്പെട്ട ക്യാമറ, കഴിഞ്ഞ വർഷം ഐഫോൺ 13 ലൈനപ്പിൽ അരങ്ങേറിയ ആപ്പിളിന്റെ A15 ബയോണിക് ചിപ്പ് എന്നിവയും ഫോണിന്‍റെ പ്രത്യേകതയായിരിക്കും. 300 ഡോളറിന്​ ഈ സവിശേഷതകൾ ലഭിക്കുന്നത്​ ഐഫോൺ വാങ്ങാൻ ആഗ്രഹിക്കുന്നവർക്ക്​ ഏറെ ആവേശം നൽകിയേക്കും. എന്നാൽ, സവിശേഷതകളിലുള്ള മാറ്റം ഡിസൈനിൽ പ്രതീക്ഷിക്കേണ്ടതില്ലെന്നാണ്​ സൂചന. 2017ൽ ലോഞ്ച്​ ചെയ്ത ഐഫോൺ 8ന്‍റെ അതേ രൂപം തന്നെയാണ്​ പുതിയ ഐഫോൺ എസ്​.ഇക്കും ആപ്പിൾ നൽകുക.

കുറഞ്ഞ വിലയിൽ ഐഫോൺ എത്തിക്കുക വഴി ആൻഡ്രോയ്​ഡ്​ യൂസർമാരെ ആകർഷിക്കാനാണ്​ ആപ്പിൾ ഉദ്ദേശിക്കുന്നത്​. പക്ഷെ, 4.7-ഇഞ്ച് സ്‌ക്രീനും തടിച്ച ബെസലുകളും പഴഞ്ചൻ രൂപവും എത്രത്തോളം പുതിയ യൂസർമാരെ എസ്​.ഇയിലേക്ക്​ അടുപ്പിക്കുമെന്ന്​ കണ്ടറിയണം. പ്രത്യേകിച്ച്​ ആൻഡ്രോയ്​ഡ്​ ഫോണുകൾ മികച്ച ഡിസ്​പ്ലേ സവിശേഷതകളോടെ കുറഞ്ഞ വിലയിൽ ലഭിക്കുന്ന കാലത്ത്​.