പിക്​സൽ 4 പരാജയപ്പെട്ടു; ഗൂഗ്​ളിൽ നിന്ന്​ രണ്ട്​ മുതിർന്ന എഞ്ചിനീയർമാർ രാജിവെച്ചു

ന്യൂയോർക്​: ഗൂഗ്​ളി​​​െൻറ സ്​മാർട്ട്​ഫോൺ സീരീസിലെ ഏറ്റവും പുതിയ അവതാരമായ പിക്​സൽ 4​​​െൻറ പരാജയത്തെ തുടർന്ന്​ കമ്പനിയുടെ രണ്ട്​ മുതിർന്ന എഞ്ചിനിയർമാർ രാജിവെച്ചതായി റിപ്പോർട്ട്​. ദ ഇൻഫർമേഷനാണ്​ ഇതുമായി ബന്ധപ്പെട്ട വാർത്ത പുറത്തുവിട്ടത്​. ഫോണി​​​െൻറ കാമറ ഡിപ്പാർട്ട്​മ​​െൻറിലെ മാർക്​ ലെവോയ്​, പിക്​സൽ ജനറൽ മാനേജർ മാരിയോ ക്വെയ്​റോസ്​ എന്നിവരാണ്​ മാർച്ചിലും ജനുവരിയിലുമായി കമ്പനി വിട്ടത്​. 

ഇരുവരുടെയും രാജി പിക്​സൽ 4ാമ​​​െൻറ പരാജയത്തെ തുടർന്നാണോ, അല്ലെങ്കിൽ സ്വമേധയാ കമ്പനി വിട്ടതാണോ എന്ന കാര്യത്തിൽ നിലവിൽ സ്ഥിരീകരണമൊന്നുമില്ല. മുൻ ഗൂഗ്​ൾ സി.ഇ.ഒ എറിക്​ ഷ്​മിത്ത്​ 19 വർഷത്തെ സേവനത്തിന്​ ശേഷം രാജിവെച്ച്​ പേരൻറ്​ കമ്പനിയായ ആൽഫബറ്റിലേക്ക്​ ​​മാറി ദിവസങ്ങൾക്ക്​ ശേഷമാണ്​ രണ്ട്​ എഞ്ചിനീയർമാരുടെ വിടവാങ്ങൽ വാർത്ത പുറത്തുവരുന്നത്​. 

മാർക്കറ്റിൽ തിളങ്ങിയ പിക്​സൽ 3, 3എക്​സ്​.എൽ എന്നീ മോഡലുകളുടെ പിൻഗാമിയായി ഏറെ പ്രതീക്ഷയോടെ വിപണിയിലെത്തിയ നാലാമൻ അമേരിക്കയിലും മറ്റ്​ മാർക്കറ്റുകളിലും തകർന്നടിയുകയായിരുന്നു. സ്​മാർട്ട്​ഫോൺ നിരൂപകരിൽ നിന്നും മോശം പ്രതികരണങ്ങൾ ലഭിച്ചതിനൊപ്പം സാമ്പത്തികമായും പരാജയപ്പെട്ടതോടെ കമ്പനി പ്രതിസന്ധിയിലായി. ഫോണിൽ കൊട്ടിഘോഷിച്ചുകൊണ്ട്​ അവതരിപ്പിച്ച സോളി റഡാർ ചിപ്പും മോഷൻ ജെസ്​റ്റേഴ്​സുമെല്ലാം വെറും ഗിമ്മിക്കാണെന്ന പ്രതികരണമായിരുന്നു ഏറെയും ലഭിച്ചത്​. 

ഇത്തരം ചിപ്പുകൾ അടങ്ങിയ ഫോൺ പല മൂന്നാംലോകരാജ്യങ്ങളിൽ അടക്കം വിൽക്കുന്നത്​ നിരോധനമുള്ളതും ഗൂഗ്​ളിന്​ തിരിച്ചടിയായി. പിക്​സൽ ഫോണുകൾക്ക്​ തരക്കേടില്ലാത്ത മാർക്കറ്റുള്ള ഇന്ത്യയിലും ഫോൺ വിപണയിൽ എത്തിയിരുന്നില്ല.