മടക്കാനും തുറക്കാനും പറ്റുന്ന ടിവിയുമായി സി സീഡ്​; വിലയും ഭാരവും ഞെട്ടിക്കും -വിഡിയോ

ലോകത്തിലെ ആദ്യത്തെ മടക്കാവുന്ന (ഫോൾഡബിൾ) 4കെ ടിവിയുമായി എത്തുകയാണ്​ ആഡംബര ഇലക്​ട്രോണിക്​സ്​ നിർമാതാക്കളായ സി സീഡ്​. ഫോൾഡബിൾ സ്​മാർട്ട്​ഫോണുകൾ പോലും കമ്പനിക​ൾക്ക്​ അതിന്‍റെ പൂർണ്ണതയിൽ നിർമിക്കാനാവാത്ത സാഹചര്യത്തിലാണ്​ സി സീഡ്​ ഫോൾഡബിൾ ടിവിയുമായി എത്തുന്നത്​. നിലവിൽ സാംസങ്​, ഹ്വാവേ എന്നിവർ മടക്കാവുന്ന ഫോണുകൾ വിപണിയിൽ എത്തിക്കുന്നുണ്ട്​.

165 ഇഞ്ച്​ വലിപ്പമുള്ള ഭീമാകാരമായ സി സീഡ്​ എം1 എന്ന 4കെ മൈക്രോ എൽ.ഇ.ഡി ടിവി അഞ്ച്​ പാനലുകൾ അടങ്ങിയതാണ്​. ഏവിയേഷൻ-ഗ്രേഡ് അലുമിനിയം അലോയ് കൊണ്ട് നിർമ്മിച്ച ഉയർന്ന ക്വാളിറ്റിയുള്ള ഫ്രെയിമാണ്​ ടിവിയിൽ ഉപയോഗിച്ചിരിക്കുന്നത്​. തടസ്സമില്ലാത്ത അനുഭവം ഉറപ്പാക്കാൻ, കമ്പനി അഡാപ്റ്റീവ് ഗ്യാപ് കാലിബ്രേഷൻ (എജിസി) സാങ്കേതികവിദ്യ ഉപയോഗിക്കുന്നുണ്ട്​. അത് ടിവി വിംഗുകൾ മടക്കിക്കളയുന്നതിനിടയിലുള്ള ഓഫ്‌സെറ്റുകൾ കണ്ടെത്തി, എൽ.ഇ.ഡികളുടെ തെളിച്ചം കൃത്യമായി കാലിബ്രേറ്റ് ചെയ്യുകയും ചെയ്യുന്നു.

ഡിസ്പ്ലേയ്ക്ക് 1000nits ബ്രൈറ്റ്​നസും, 16-ബിറ്റ് കളർ ഡെപ്തും, 30,000: 1 കോൺട്രാസ്റ്റ് റേഷ്യോയും, എച്ച്ഡിആർ, എച്ച്ഡിആർ 10 + പ്രോസസ്സിംഗ് എന്നിവയുടെ പിന്തുണയുണ്ട്​. HDCP 2.2 സപ്പോർ​ട്ടോടുകൂടിയ ഒരു HDMI പോർട്ട്​, രണ്ട്​ യു.എസ്​.ബി പോർട്ടുകൾ, കൂടെ ഒരു സീരീയൽ പോർട്ടും ടിവിക്കുണ്ട്​. 2.1 ഓഡിയോ പിന്തുണയുള്ള ഇന്‍റ​ഗ്രേറ്റഡ്​ സൗണ്ട്​ ബാറും സി സീഡ്​ എം1-ന്‍റെ പ്രത്യേകതയാണ്​. അതേസമയം ടിവിയുടെ തൂക്കവും വിലയും ആരെയും ഞെട്ടിക്കുന്നതാണ്​. എം1-ന്‍റെ ആകെ ഭാരം 1,350 കിലോ വരും. വിലയാക​ട്ടെ നാല്​ ലക്ഷം ഡോളറും(2.91 കോടി രൂപ).

"ഒരു മുറിയുടെ സ്വഭാവത്തിൽ വിട്ടുവീഴ്ച ചെയ്യാതെ മികച്ച നിലവാരത്തിൽ M1 സവിശേഷമായ വിനോദം നിങ്ങൾക്ക്​ സമ്മാനിക്കും - വലിയ ടിവി സിസ്റ്റങ്ങളെ വിശാലമായ സമകാലിക ഇന്‍റീരിയർ ഡിസൈനിലേക്ക് സമന്വയിപ്പിക്കുന്നതിനുള്ള ഏറ്റവും അനുയോജ്യമായ പരിഹാരം കൂടിയാണിത്​," സി സീഡ് മാനേജിങ്​ പാർട്ണർ അലക്സാണ്ടർ സ്വാറ്റെക് പറയുന്നു.

ടിവി മടക്കാനും തുറക്കാനും കുറച്ച്​ സെക്കന്‍റുകളെടുക്കുമെങ്കിലും ആ പ്രൊസസ്​ മികച്ച അനുഭവം സമ്മാനിക്കുന്നതാണ്​. സി സീഡ്​ എം1-ന്‍റെ ദൃശ്യങ്ങൾ കാണാം.