ആപ്പിൾ എയർടാഗ്​ ഉപയോഗിച്ച്​ ആഡംബര കാർ മോഷണം; മുന്നറിയിപ്പുമായി പൊലീസ്​

ആപ്പിൾ സമീപകാലത്തായി ലോഞ്ച്​ ചെയ്​ത ട്രാക്കിങ്​ ഡിവൈസായ എയർടാഗുകളെ കുറിച്ച്​ മുന്നറിയിപ്പുമായി എത്തിയിരിക്കുകയാണ്​ കാനഡയിലെ പ്രാദേശിക പൊലീസ്​. ആഡംബര കാറുകൾ മോഷ്​ടിക്കാനായി മോഷ്​ടാക്കൾ വ്യാപകമായി ആപ്പിൾ എയർടാഗുകൾ ഉപയോഗിക്കുന്നതായാണ്​ പൊലീസ്​ മുന്നറിയിപ്പ്​ നൽകുന്നത്​.

വാലറ്റുകളും താക്കോലുകളുമടക്കം നമ്മുടെ നിത്യോപയോഗ സാധനങ്ങൾ നഷ്ടപ്പെടാതിരിക്കാനും നഷ്ടപ്പെട്ടവ എളുപ്പം തിരിച്ചുപിടിക്കാനുമായി ആപ്പിൾ അവതരിപ്പിച്ച ട്രാക്കിങ് ഡിവൈസാണ് ആപ്പിൾ എയർടാഗ്. സ്വകാര്യ വസ്തുക്കളിലടക്കം ഈ ചെറിയ ഉപകരണം ഘടിപ്പിച്ചാൽ അവയുടെ സ്ഥാനം സ്​മാർട്ട്​ഫോൺ ഉപയോഗിച്ച്​ ട്രാക്ക് ചെയ്യാൻ സാധിക്കും.

എന്നാൽ, എയർടാഗിന്‍റെ ഈ സവിശേഷത ദുരുപയോഗം ചെയ്​താണ്​ കാനഡയിലെ കള്ളൻമാർ വില കൂടിയ വാഹനങ്ങൾ മോഷ്​ടിച്ചത്​. രാജ്യത്തെ യോർക്​ മേഖലയിലാണ്​ മോഷ്​ടാക്കൾ ഇത്തരത്തിലുള്ള ഹൈടെക്​ മോഷണം നടത്തുന്നതായി കണ്ടെത്തിയത്​. യോർക്കിൽ സ്ഥിരമായി ലക്ഷ്വറി കാറുകൾ മോഷണം പോവുന്നത്​ അന്വേഷിച്ച പൊലീസ്​ സംഘം അത്​​ എയർടാഗ്​ ഉപയോഗിച്ചുള്ള മോഷണമാണെന്ന്​ കണ്ടെത്തുകയായിരുന്നു.

വിദൂര സ്ഥലങ്ങളിൽപ്പോലും ആഡംബര കാറുകൾ കൃത്യമായി എങ്ങനെ ടാർഗറ്റ് ചെയ്യപ്പെടുന്നു എന്ന്​ കേന്ദ്രീകരിച്ച് നടത്തിയ അന്വേഷണമാണ്​ ആപ്പിൾ എയർടാഗുകളിലേക്ക്​ എത്തിച്ചത്​. അത്തരം മോഷ്​ടാക്കൾക്കെതിരെ കാനഡ പൊലീസ്​ ജാഗ്രതാ നിർദേശം നൽകിക്കഴിഞ്ഞു. ആപ്പിൾ എയർടാഗ് ഉപയോഗിച്ച് നിലവിൽ അഞ്ച് മോഷണങ്ങൾ നടത്തിയതായി പൊലീസ് കണ്ടെത്തിയിട്ടുണ്ട്​. അതേസമയം, മേഖലയിൽ നടന്ന മറ്റ് കാർ മോഷണങ്ങളിലും അതേ സംഘത്തിന്​ പങ്കുള്ളതായി സംശയിക്കുന്നു​ണ്ടെന്നും പൊലീസ്​ അറിയിച്ചു.

ആഡംബര വാഹനങ്ങൾ ആപ്പിൾ എയർടാഗ് ഉപയോഗിച്ച് ട്രാക്ക് ചെയ്യുകയും, അതിലൂടെ ഉടമയുടെ വീടും വാഹനം പാർക്ക് ചെയ്യുന്നത് എവിടെയാണെന്നും മോഷ്​ടാക്കൾ കണ്ടെത്തും. അവസരം കിട്ടു​േമ്പാൾ കാർ മോഷ്​ടിക്കുകയും ചെയ്യും. നഗരത്തിലെ പാർക്കിങ് സൗകര്യങ്ങളിലും ഷോപ്പിങ്​ മാളുകളിലും വെച്ചാണ്​ കാറുകൾ നോട്ടമിടുന്നത്​. കാറുകളിൽ പെട്ടന്ന്​ കണ്ടെത്താൻ കഴിയാത്ത സ്ഥലങ്ങളിലാണ്​ എയർടാഗുകൾ സ്ഥാപിക്കുന്നത്​.