ഇനി ഇ-മെയില്‍ ഐ.ഡി ഹിന്ദിയിലും

ന്യൂഡല്‍ഹി: ഇ-മെയില്‍ ഐ.ഡികള്‍ ഹിന്ദി അക്ഷരങ്ങള്‍ ഉപയോഗിച്ചും ദേവനാഗരി ലിപിയിലും എഴുതാം. ന്യൂഡല്‍ഹി ആസ്ഥാനമായി പ്രവര്‍ത്തിക്കുന്ന സ്റ്റാര്‍ട്ടപ്പായ ഡാറ്റാ എക്സ്ജെന്‍ ടെക്നോളജീസ് ആണ് ഇതിനായി ആപ് തയാറാക്കിയത്. ഡോട്ട് ഭാരത് ഡൊമൈനിലാണ് നിശ്ചിത തുക നല്‍കി ഇ-മെയില്‍ ഐ.ഡി ഉണ്ടാക്കാനാവുക. ഈ ഇ-മെയിലുകളില്‍നിന്ന് അയക്കുന്ന മെയിലുകള്‍ ഗൂഗ്ളിലും മൈക്രോസോഫ്റ്റിലും വായിക്കാനാവും. ജി-മെയില്‍ പോലെ ഡോട്ട് ഭാരത് ഡൊമൈനില്‍ സൗജന്യമായി ഇ-മെയില്‍ ഐ.ഡി ഉണ്ടാക്കാനുള്ള സൗകര്യം ഉടന്‍ ഏര്‍പ്പെടുത്തുമെന്ന് ഡാറ്റാ എക്സ്ജെന്‍ സ്ഥാപകനായ അജയ് ദത്ത പറഞ്ഞു.
സ്റ്റാര്‍ട്ടപ്പിന്‍െറ നീക്കം ഗൂഗ്ളും മൈക്രോസോഫ്റ്റും പിന്തുണച്ചു. പരസ്പര സമ്പര്‍ക്കത്തിന് ഭാഷ തടസ്സമാകരുതെന്നും സ്റ്റാര്‍ട്ടപ്പിന്‍െറ നീക്കത്തോടെ ആഗോള ഇ-മെയില്‍ എന്ന യാഥാര്‍ഥ്യത്തിലേക്ക് കൂടുതല്‍ അടുത്തിരിക്കുകയാണെന്നും ഗൂഗ്ള്‍ പറഞ്ഞു.