കോവിഡ്​ കാലത്തെ അകലം പാലിക്കൽ; രസകരമായ ഗാനം പങ്കുവെച്ച്​ വീരു

കോവിഡ്​ 19 ഭീതിയിൽ മറ്റുള്ളവരുമായി ഇടപെടുന്നതിൽ നിന്നും സുരക്ഷിതമായ അകലം പാലിക്കാൻ കേന്ദ്ര - സംസ്ഥാന സർക്കാറുകൾ നിർദേശിച്ച സാഹചര്യത്തിൽ രസകരമായ വിഡിയോ പങ്കുവെച്ചിരിക്കുകയാണ്​ ഇന്ത്യയുടെ മുൻ വെടിക്കെട്ട്​ ബാറ്റ്​സ്​മാൻ വീരേന്ദർ സെവാഗ്​. സോഷ്യൽ ഡിസ്​റ്റൻസിങ്​ അഥവാ സാമൂഹിക അകലം പാലിക്കൽ ആരോഗ്യ വകുപ്പ്​ പ്രോത്സാഹിപ്പിക്കുന്ന സാഹചര്യത്തിന്​ ഉതകുന്ന ഒരു ബോളിവുഡ്​ ഗാനമാണ്​ സെവാഗ്​ ട്വിറ്ററിൽ പങ്കുവെച്ചത്​.

1952ൽ ഇറങ്ങിയ സാഖി എന്ന ചിത്രത്തിലെ ‘ദൂർ ദൂർ സേ’എന്ന ഗാനം ‘ഈ സമയത്ത്​ ഉചിതം’ എന്ന അടിക്കുറിപ്പോടെയാണ്​ വീരു ഷെയർ ചെയ്​തിരിക്കുന്നത്​. പാട്ടിൻെറ വരികളും ഇന്ത്യയടക്കം ലോക രാജ്യങ്ങൾ കടന്നുപോവുന്ന സാഹചര്യത്തിന്​ ചേർന്നതാണ്​.

''ദൂരെ നിന്ന്​ സംസാരിക്കൂ... അകലം പാലിക്കൂ... അടുത്ത്​ വരാതിരിക്കൂ..... എന്നെ തൊടരുത്​...'' അങ്ങനെപോകുന്നു ഗാനത്തിൻെറ വരികൾ.

Apt In times like these. Door se #SocialDistancing pic.twitter.com/DbJ4akxRfe

— Virender Sehwag (@virendersehwag) March 18, 2020

കുറിക്ക്​ കൊള്ളുന്ന ട്വീറ്റുകൾ ഇടുന്നതിൽ പേരുകേട്ട വീരുവിൻെറ പുതിയ കണ്ടുപിടുത്തം എന്തായാലും ട്വിറ്ററിൽ വൈറലാണ്​. എവിടെ നിന്നാണ്​ ഇത്തരം വിഡിയോകൾ താങ്കൾ കൊണ്ടുവരുന്നതെന്ന്​ ചിലർ ചോദിച്ചു.

ചുമക്കുകയോ തുമ്മുകയോ ചെയ്യുന്നവരിൽ നിന്ന്​ പരമാവധി ഒരു മീറ്ററെങ്കിലും അകലം പാലിച്ച്​ നിൽക്കാൻ ലോകാരോഗ്യ സംഘടന നിർദേശിച്ചിരുന്നു. വൈറസ്​ പടരുന്നതിൽ നിന്ന്​ ജനങ്ങളെ സംരക്ഷിക്കാൻ ശക്​തമായ പ്രതിരോധ നടപടികളാണ്​ കേരളമടക്കമുള്ള സംസ്ഥാനങ്ങൾ സ്വീകരിച്ചിരിക്കുന്നത്​.