ദർബാറിലെ രുചിയും കത്തീഡ്രൽ മോസ്കിലെ പെരുന്നാൾ നമസ്​കാരവും

ലു​ഷ്​​നി​കി സ്​​റ്റേ​ഡി​യ​ത്തി​ലെ ഉ​ദ്ഘാ​ട​ന മ​ത്സ​ര​ത്തി​ൽ പ​ങ്കെ​ടു​ത്ത കാ​ണി​ക​ൾ അ​ടു​ത്തു​ള്ള മെ​ട്രോ സ്​​റ്റേ​ഷ​നി​ലേ​ക്കു​ള്ള യാ​ത്ര​യി​ൽ വ​ള​രെ​യ​ധി​കം ദൂ​രം ചി​ട്ട​യാ​യ രീ​തി​യി​ൽ ന​ട​ന്നു​പോ​കു​ന്നു, റ​സ്സി​യ്യ, റ​സ്സി​യ്യ  എ​ന്ന താ​ളാ​ത്മ​ക​മാ​യ വി​ളി​ക​ളാ​ൽ മു​ഖ​രി​ത​മാ​ണ് അ​ന്ത​രീ​ക്ഷം. ഈ ​പ​തി​നാ​യി​ര​ങ്ങ​ളെ നി​യ​ന്ത്രി​ക്കു​ന്ന​തി​ൽ ഒ​രു മ​നു​ഷ്യ​മ​തി​ൽ പോ​ലെ ഉ​റ​ച്ചു​നി​ൽ​ക്കു​ന്ന യു​വാ​ക്ക​ൾ ഇ​വി​ട​ത്തെ മി​ലി​റ്റ​റി ഫോ​ഴ്സാ​ണ്. ഇ​വ​ർ സം​ഘാ​ട​ക സ​മി​തി​ക്ക്​ ന​ൽ​കു​ന്ന പി​ന്തു​ണ കു​റ​ച്ചൊ​ന്നു​മ​ല്ല ഈ ​ലോ​ക​ക​പ്പി​നെ സു​ര​ക്ഷി​ത​മാ​ക്കു​ന്ന​ത്. ന​മ്മു​ടെ നാ​ട്ടി​ലെ സ്​​റ്റേ​ഡി​യ​ത്തി​ന് പു​റ​ത്ത് ക​യ​ർ കൊ​ണ്ടോ അ​ല്ലെ​ങ്കി​ൽ പ്ലാ​സ്​​റ്റി​ക്​ ബാ​രി​ക്കേ​ഡ് കൊ​ണ്ടോ ചെ​യ്യു​ന്ന പ​ണി​ക്ക് വേ​ണ്ടി​യാ​ണ് ഈ ​ഊ​ർ​ജ്ജ​സ്വ​ല​മാ​യ യു​വ​ത​യെ  ത​യാ​റാ​ക്കി നി​ർ​ത്തി​യി​രി​ക്കു​ന്ന​ത്. ഇ​തി​നു​പി​ന്നി​ൽ വ​ള​രെ  ഗൗ​ര​വ​ത​ര​മാ​യ ഒ​രു ര​ഹ​സ്യം  ഒ​ളി​ഞ്ഞു​കി​ട​പ്പു​ണ്ട്. ഇ​വി​ടെ 18 വ​യ​സ്സി​നും 24 വ​യ​സ്സി​നു​മി​ട​ക്ക്​ ര​ണ്ടു വ​ർ​ഷം സൈ​നി​ക​സേ​വ​നം നി​ർ​ബ​ന്ധ​മാ​ണ്. ഇ​തു പേ​ടി​ച്ച് റ​ഷ്യ​ക്കാ​രെ ക​ല്യാ​ണം ക​ഴി​ച്ച ചി​ല  ഇ​ന്ത്യ​ക്കാ​ർ മ​ക്ക​ളെ ഇ​ന്ത്യ​ൻ പൗ​ര​ന്മാ​രാ​യി വ​ള​ർ​ത്തു​ന്നു എ​ന്ന​ത് കൗ​തു​ക​ക​ര​മാ​ണ്. ക​ളി ക​ഴി​ഞ്ഞ്​ ഇ​ഫ്താ​റി​നാ​യി എ​ത്ത​ണ​മെ​ന്ന നൗ​ഷാ​ദ് ഡോ​ക്ട​റു​ടെ സ്നേ​ഹ​പൂ​ർ​ണ​മാ​യ ക്ഷ​ണം സ്വീ​ക​രി​ച്ച് ഞാ​ൻ കോ​ഴി​ക്കോ​ട്ടു​കാ​ര​ൻ രാ​ജു​നാ​യ​രു​ടെ,  ഇ​വി​ട​ത്തെ പ്ര​ധാ​ന​പ്പെ​ട്ട ഇ​ന്ത്യ​ൻ ഹോ​ട്ട​ലു​ക​ളി​ൽ ഒ​ന്നാ​യ ‘ദ​ർ​ബാ​റി’ ൽ ​എ​ത്തി. 

റ​ഷ്യ​യി​ലെ എ​​െൻറ ആ​ദ്യ ഇ​ഫ്താ​ർ സം​ഗ​മം. പ്രോ​സ്പെ​ക്ട​സ് മീ​ര എ​ന്ന വ​ലി​യ തെ​രു​വി​ലേ​ക്കു​ള്ള യാ​ത്ര​യി​ൽ എ​നി​ക്ക് തൊ​ട്ടു​മു​ന്നി​ലാ​യി ച​റ​പ​റ മ​ല​യാ​ളം സം​സാ​രി​ച്ചു​കൊ​ണ്ട് ഒ​രു​സം​ഘം വ​ള​രെ വേ​ഗ​ത്തി​ൽ ന​ട​ക്കു​ന്നു. ഏ​ക​ദേ​ശം 30 പേ​ര​ട​ങ്ങു​ന്ന സം​ഘം. പി​ന്നീ​ടാ​ണ​റി​ഞ്ഞ​ത് അ​വ​രും ഇ​ഫ്താ​റി​ന് വ​ന്ന​വ​രാ​യി​രു​ന്നു എ​ന്ന്. ഹോ​ട്ട​ലി​ന് മു​ന്നി​ൽ​ത​ന്നെ രാ​ജു​നാ​യ​ർ ഞ​ങ്ങ​ളെ സ്വീ​ക​രി​ക്കാ​ൻ ഉ​ണ്ടാ​യി​രു​ന്നു. ക​ഴി​ഞ്ഞ 30 വ​ർ​ഷ​മാ​യി ഈ ​ന​ഗ​ര​ത്തി​ലെ പ്ര​ധാ​ന മ​ല​യാ​ളി സം​രം​ഭ​ക​ൻ ആ​ണ് ഇ​ദ്ദേ​ഹം. ഇ​ന്നും ജോ​ലി അ​ന്വേ​ഷി​ച്ച് എ​ത്തു​ന്ന ഇ​ന്ത്യ​ക്കാ​ർ​ക്ക്  ഒ​രു  അ​ഭ​യ കേ​ന്ദ്ര​മാ​ണ് ഈ ​കോ​ഴി​ക്കോ​ട് അ​ര​യി​ട​ത്തു​പാ​ലം സ്വ​ദേ​ശി. നാ​ല്​ വ​ലി​യ ഹോ​ട്ട​ലു​ക​ൾ സ്വ​ന്ത​മാ​യു​ണ്ട് ഇ​ദ്ദേ​ഹ​ത്തി​നി​വി​ടെ. ഡോ​ക്ട​ർ​മാ​രും നി​ര​വ​ധി പേ​രും ഒ​ത്തു​ചേ​ർ​ന്ന ഇ​ഫ്താ​ർ സം​ഗ​മം സ​മൂ​ഹ​ത്തി​ന് ന​ല്ല ഒ​രു മെ​സ്സേ​ജ് ആ​ണ്  ന​ൽ​കു​ന്ന​ത് എ​ന്ന് പേ​രാ​മ്പ്ര സ്വ​ദേ​ശി​യാ​യ ഡോ​ക്ട​ർ ന​വീ​ൻ അ​ഭി​പ്രാ​യ​പ്പെ​ട്ടു. 

ര​ണ്ട​ര മ​ണി​ക്കു​ത​ന്നെ നേ​രം പു​ല​രു​ന്ന​തി​നാ​ൽ പെ​രു​ന്നാ​ൾ ന​മ​സ്കാ​ര​ത്തി​നാ​യി പ​ള്ളി​യി​ലേ​ക്ക് പോ​കാ​ൻ രാ​വി​ലെ അ​ഞ്ചി​നു ത​ന്നെ എ​ത്ത​ണം എ​ന്ന ആ​ഗ്ര​ഹം ഉ​ണ്ടാ​യി​രു​ന്നു. പ​ക്ഷേ, ആ​റു മ​ണി ക​ഴി​ഞ്ഞാ​ണ് ഞാ​ൻ പ​ള്ളി​യി​ലെ​ത്തി​യ​ത്. അ​പ്പോ​ഴേ​ക്കും ജ​ന​നി​ബി​ഡ​മാ​യി​രു​ന്നു ആ ​പ്ര​ദേ​ശം. പു​ല​ർ​ച്ച നാ​ലു​മ​ണി​ക്ക് ത​ന്നെ ഇ​വി​ടേ​ക്ക് ജ​നം ഒ​ഴു​കി​യെ​ത്തും എ​ന്നാ​ണ് അ​റി​യാ​ൻ ക​ഴി​ഞ്ഞ​ത്. റ​ഷ്യ​യി​ലെ ത​ന്നെ ഏ​റ്റ​വും വ​ലി​യ മു​സ്​​ലിം പ​ള്ളി​യാ​യ ക​ത്തീ​ഡ്ര​ൽ മോ​സ്​​കി​ൽ ആ​യി​രു​ന്നു ഇ​ത്. റ​ഷ്യ​ൻ ഭാ​ഷ​യി​ലും ത​ത്താ​രി​സ്ഥാ​ൻ ഭാ​ഷ​യി​ലും ആ​യി​രു​ന്നു പ്ര​ഭാ​ഷ​ണം. ക​സാ​ൻ എ​ന്ന പ്ര​ദേ​ശ​ത്തെ ആ​ളു​ക​ളു​ടെ സം​സാ​ര ഭാ​ഷ​യാ​ണ് ഇ​ത്. പ​ഴ​യ സോ​വി​യ​റ്റ്​ യൂ​നി​യ​​െൻറ ഭാ​ഗ​മാ​യ പ​ല രാ​ജ്യ​ങ്ങ​ളി​ൽ​നി​ന്നു​ള്ള ആ​ളു​ക​ൾ ഇ​വി​ടെ അ​ധി​ക​മാ​യി ഉ​ണ്ടാ​യി​രു​ന്നു. 

1904ൽ ​നി​ർ​മി​ച്ച ഈ ​പ​ള്ളി  പി​ന്നീ​ട് 2015ലാ​ണ് പൂ​ർ​ണ​മാ​യും വ​ലി​യ മി​നാ​ര​ങ്ങ​ളോ​ട് കൂ​ടി ഭം​ഗി​യാ​യി പു​തു​ക്കി പ​ണി​ത​ത്. 1980ലെ ​മോ​സ്കോ ഒ​ളി​മ്പി​ക്സ് സ​മ​യ​ത്ത് സോ​വി​യ​റ്റ് യൂ​നി​യ​​െൻറ മ​തേ​ത​ര​മു​ഖം ആ​യി ഈ ​പ​ള്ളി ഉ​യ​ർ​ത്തി കാ​ട്ടി​യി​രു​ന്നു എ​ന്ന് ഉ​ത്ത​രേ​ന്ത്യ​ക്കാ​ര​നാ​യ  അ​ബ്​​ദു​ൽ ഫാ​റൂ​ഖി സാ​ക്ഷ്യ​പ്പെ​ടു​ത്തു​ന്നു. പ​ള്ളി​ക്കു ചു​റ്റു​മു​ള്ള മു​ഴു​വ​ൻ പാ​ർ​ക്കി​ങ്​ സ്ഥ​ല​ത്തും ആ​ളു​ക​ൾ നി​റ​ഞ്ഞു​ക​വി​ഞ്ഞു. പ്രാ​ർ​ഥ​ന​ക്കെ​ത്തി​യ നീ​ണ്ട​നി​ര ചു​റ്റു​മു​ള്ള റോ​ഡു​ക​ളി​ലേ​ക്കും നീ​ണ്ടു. ഏ​ക​ദേ​ശം ര​ണ്ടു ല​ക്ഷ​ത്തി​ല​ധി​കം ആ​ളു​ക​ൾ പ​ങ്കെ​ടു​ത്തു എ​ന്നാ​ണ് ഔ​ദ്യോ​ഗി​ക ഭാ​ഷ്യം. 

റ​ഷ്യ​ൻ ചാ​ന​ൽ ഇ​ത് ലൈ​വാ​യി സം​പ്രേ​ഷ​ണം ചെ​യ്തു. ലോ​ക​ക​പ്പി​നെ​ത്തി​യ വി​ദേ​ശി​ക​ൾ​ക്ക​ട​ക്കം വ​ള​രെ​യ​ധി​കം അ​ത്ഭു​തം ഉ​ള​വാ​ക്കു​ന്ന​താ​യി​രു​ന്നു ഈ ​വ​ലി​യ രാ​ജ്യ​ത്തെ  ഈ ​അ​ത്ഭു​ത സം​ഗ​മം എ​ന്ന കാ​ര്യ​ത്തി​ൽ സം​ശ​യ​മി​ല്ല. പെ​രു​ന്നാ​ൾ ദി​ന​ത്തി​ലെ ഭ​ക്ഷ​ണ​വും കേ​മ​മാ​യി. ത​ല​ശ്ശേ​രി​ക്കാ​ര​നാ​യ എ​​െൻറ മു​ന്നി​േ​ല​ക്ക് എ​ങ്ങ​നെ ത​ങ്ങ​ളു​ടെ ബി​രി​യാ​ണി സ്വീ​ക​രി​ക്ക​പ്പെ​ടും എ​ന്ന ആ​വ​ലാ​തി​യാ​യി​രു​ന്നു സ​ക്ക​റി​യ​യു​ടെ ഭാ​ര്യ ഷം​ന​ക്കും കൂ​ട്ടു​കാ​ര​ൻ ജു​ഫി​​െൻറ ഭാ​ര്യ ഷ​ഫ്ന​ക്കും. പാ​ല​ക്കാ​ട്ടു​കാ​രി​ക​ളാ​യ ബി​രു​ദാ​ന​ന്ത​ര ബി​രു​ദ ധാ​രി​ണി​ക​ളാ​ണ് ര​ണ്ടു പേ​രും. ന​ല്ല ആ​വി പ​റ​ക്കു​ന്ന മ​ട്ട​ൻ ബി​രി​യാ​ണി മു​ന്നി​ലെ​ത്തി​ച്ചു ഇ​വ​ർ എ​​െൻറ റ​ഷ്യ​ൻ പെ​രു​ന്നാ​ൾ ന​മ്മു​ടെ മ​ല​യാ​ള നാ​ടി​​െൻറ രു​ചി​യെ നാ​വി​ലെ​ത്തി​ച്ചു, ‘സ്പ​പ​സി ബൈ ​ബാ​ൽ ശോ​യ് (താ​ങ്ക് യു ​വെ​രി മ​ച്ച്)’.