രണ്ട് പോയൻറ് അകലെ റയൽ മ​ഡ്രിഡിന്​ ലാ ലിഗ കിരീടം

മഡ്രിഡ്: റയൽ മഡ്രിഡിനും സ്പാനിഷ് ലാ ലിഗ കിരീടത്തിനുമിടയിൽ ഇനി രണ്ട് പോയൻറി​െൻറ മാത്രം ദൂരം. സീസൺ അവസാനിക്കാൻ രണ്ട് കളി ബാക്കിയുണ്ടെങ്കിലും റാമോസിനും കൂട്ടുകാർക്കും കപ്പുയർത്താൻ ഒരു ജയം മാത്രം മതി. ഗ്രനഡക്കെതിരായ ജയത്തിലൂടെ രണ്ടാം സ്ഥാനക്കാരായ ബാഴ്സലോണയുമായുള്ള പോയൻറ് വ്യത്യാസം നാലായി ഉയർത്തിയതോടെ ലാ ലിഗയിൽ റയലി​െൻറ കിരീടാഘോഷം തുടങ്ങി കഴിഞ്ഞു. ഇനി അടുത്ത കളിയിൽ ജയിക്കുകയോ, രണ്ട് സമനിലകൊണ്ടോ സിനദിൻ സിദാന് പരിശീലക കുപ്പായത്തിലെ രണ്ടാം ലാ ലിഗ കിരീടം ഉറപ്പിക്കാം.

ഡിസ്റ്റിഫാനോ അറീനയിൽ നടന്ന മത്സരത്തി​െൻറ 10ാം മിനിറ്റിലായിരുന്നു റയലി​െൻറ ആദ്യ ഗോൾ. കസ്മിറോ നൽകിയ ക്രോസിൽ ഗോൾ ലൈനിൽ നിന്നും അസാധ്യമായ ആംഗിളിൽ ഷോട്ടുതിർത്ത ഫ്രഞ്ച് യുവതാരം ഫെർലാൻഡ് മെൻഡി ഗ്രനഡ ഗോൾവലയുടെ മേൽക്കൂര കുലുക്കി. കസ്മിറോയും, പോസ്റ്റി​െൻറ എതിർവശത്ത് ബെൻസേമയും കാത്ത് നിൽക്കുേമ്പാഴാണ് സിദാ​​െൻറ പുതുപരീക്ഷണമായി അവതരിപ്പിച്ച ഫ്രഞ്ച് ഡിഫൻഡർ സ്കോർ ചെയ്തത്. ആറ് മിനിറ്റിനകം ബെൻസേമയുടെ ക്ലിനിക്കൽ ഫിനിഷിങ്ങിൽ റയലി​െൻറ രണ്ടാം ഗോളുമെത്തി.

രണ്ടാം പകുതിയിൽ പ്രതിരോധം ശക്തമാക്കി തിരിച്ചടിച്ച ഗ്രനഡ, 50ാം മിനിറ്റിൽ ഡാർവിൻ മഷിസിലൂടെ ആദ്യ ഗോൾ നേടി. അസൻസിയോ, റോഡ്രിഗോ എന്നിവരെയിറക്കി സിദാൻ മൂർച്ചകൂട്ടിയെങ്കിലും ലീഡുയർത്താനായില്ല. ഇതിനിടെ 86ാം മിനിറ്റിൽ ഗ്രനഡയുടെ ഗോളവസരം സെർജിയോ റാ​േമാസ് ഗോൾലൈൻ സേവിലൂടെ തട്ടിയകറ്റി. ഗാരെത് ബെയ്​ലിന് ഇക്കുറിയും സിദാൻ അവസരം നൽകിയില്ല.വ്യാഴാഴ്​ച വിയ്യാറയലിനെതിരെ ജയിച്ചാൽ സിദാന് ടെൻഷനില്ലാതെ തന്നെ കപ്പുയർത്താം. 36 കളിയിൽ റയലിന് 83ഉം, ബാഴ്സലോണക്ക് 79ഉം പോയൻറാണുള്ളത്.

ഗോളടിച്ചത് 21 പേർ; അതും റെക്കോഡ്
ലാ ലിഗ കിരീടത്തിലേക്ക് കുതിക്കുന്ന റയൽ മഡ്രിഡ് ഗോളടിയിലെ പങ്കാളിത്തവുമായി പുതു റെക്കോഡ് കുറിച്ചു. ഗ്രനഡക്കെതിരെ സ്കോർബോർഡിൽ കയറിപ്പറ്റിയ ഫെർലാൻഡ് മെൻഡിയിലൂടെയാണ് പുതിയ റെക്കോഡ് വന്നത്. ഒരു സീസണിൽ ഒരു ടീമിലെ ഗോൾവേട്ടക്കാരുടെ എണ്ണത്തിലാണ്​ റെക്കോഡ്​ പിറന്നത്​. സീസണിൽ റയലി​​െൻറ 21ാമത്തെ ഗോൾ വേട്ടക്കാരനാണ് ഫ്രഞ്ചുകാരനായ മെൻഡി. ഗോളടിയിൽ മുന്നിൽ സ്ട്രൈക്കർ കരിം ബെൻസേമ (19) തന്നെ. ബെൻസേമയും സെർജിയോ റമോസും (10) മാത്രമാണ് ആറിലധികം ഗോളടിച്ചവരുടെ പട്ടികയിലുള്ളത്.