കളിച്ചുജയിച്ച ഹംസക്കോയക്ക്​ കോവിഡിന് മുന്നിൽ കാലിടറി

പരപ്പനങ്ങാടി: ഹംസക്കോയയുടെ വിശ്രമമറിയാത്ത കളിക്കളത്തിലെ പോരാട്ടജീവിതം കോവിഡ് 19ന് മുന്നിൽ പൊലിഞ്ഞു. മഹാരാഷ്​ട്രയിൽ മലയാളക്കരയുടെ ഫുട്ബാൾ ഇതിഹാസമായി തല ഉയർത്തിയ ഇദ്ദേഹം മുൻ ഇന്ത്യൻ ഫുട്ബാൾ ടീം അംഗവും സന്തോഷ് ട്രോഫിയിൽ മഹാരാഷ്​ട്രക്കുവേണ്ടി ജഴ്സിയണിഞ്ഞ താരവുമായിരുന്നു. 

1973 മുതൽ തുടർച്ചയായ നാലുവർഷം പരപ്പനങ്ങാടി ബി.ഇ.എം ഹൈസ്കൂളി​​െൻറ സന്തതിയായി സംസ്ഥാനതലത്തിൽ ഫുട്​ബാളിലും ലോങ്​ ജംപിലും മികച്ച താരമായി തിളങ്ങി. തിരൂരങ്ങാടി പി.എസ്‌.എം.ഒ കോളജിൽ പ്രീഡിഗ്രിക്ക്​ (1976-78) പഠിക്കവെ കാലിക്കറ്റ് യൂനിവേഴ്സിറ്റി ഫുട്​ബാൾ ടീമി​​െൻറ അമരത്തെത്തി. 1981-86 വരെയാണ്​ മഹാരാഷ്​ട്രക്കുവേണ്ടി സന്തോഷ്​ ട്രോഫി കളിച്ചത്​. അഞ്ചുവർഷം വെസ്​റ്റേൺ റെയിൽവേക്കും​ ബൂട്ടണിഞ്ഞു. യൂനിയൻ ബാങ്ക്, ഒാർകെ മിൽസ്, മഫത്​ലാൽ, ടാറ്റ, നെഹ്​റു കപ്പിനുള്ള ഇന്ത്യൻ ടീമി​​​െൻറ ക്യാമ്പ്​ അംഗം എന്നിവയിലും മികവ്​ തെളിയിച്ചു. രണ്ടുതവണ ദേശീയ ടീമിലേക്ക്​ തിരഞ്ഞെടുക്കപ്പെട്ടു.

എത്ര ഉയരങ്ങളിൽ എത്തിനിൽക്കുമ്പോഴും പഠിച്ചുവളർന്ന ബി.ഇ.എം ഹൈസ്കൂൾ മൈതാനത്തെത്തിയാൽ പരപ്പനങ്ങാടിയിലെ പഴയ റെഡ് വേവ്സ് കായിക കൂട്ടായ്മയിലെ സുഹൃത്തുക്കൾക്കൊപ്പം പന്തുതട്ടാൻ സമയം കണ്ടെത്തുമായിരുന്നെന്ന് സുഹൃത്ത്​ ഉണ്ണികൃഷ്ണൻ അനുസ്മരിച്ചു. വോളിബാൾ താരം ലൈലയാണ് ജീവിതസഖി. ഇന്ത്യൻ ജൂനിയർ ഫുട്ബാൾ ടീം ഗോളിയായിരുന്ന ലിയാസ് കോയ മകനാണ്. മുംബൈയിലാണ് ഹംസക്കോയയും കുടുംബവും സ്ഥിരതാമസമാക്കിയതെങ്കിലും നാട്ടിലേക്കുള്ള മടക്കം മരണത്തിലേക്കും കൂടിയായതി​​െൻറ ​െനാമ്പരത്തിലാണ്​ നാട്ടുകാരും ഫുട്ബാൾ സ്നേഹികളും.