ബുഫണോ ട്രാപ്പോ? ആരാണ്​ പി.എസ്​.ജിയുടെ ഒന്നാം നമ്പർ ഗോളി

യുവൻറസ്​ ഇതിഹാസ ഗോൾകീപ്പർ ജിയാൻലുയി​ജി ബുഫൺ ഇറ്റലിവിട്ട്​ പി.എസ്​.ജിയിലെത്തിയെങ്കിലും ടീമി​​​െൻറ ഒന്നാം നമ്പർ ഗോളിയുടെ കാര്യത്തിൽ തീരുമാനമായില്ല. 40കാരനായ വെറ്ററൻ താരത്തെ കഴിഞ്ഞ ദിവസങ്ങളിൽ പ്രീസീസൺ മത്സരത്തിൽ പി.എസ്​.ജിയുടെ ആദ്യ ഇലവനിൽ ഇറക്കിയിരുന്നെങ്കിലും 30ാം നമ്പർ ജഴ്​സിയാണ്​ അണിഞ്ഞിരുന്നത്​.

മാധ്യമപ്രവർത്തകർ മത്സരശേഷം ഇതേക്കുറിച്ച്​ കോച്ച്​ തോമസ്​ തോഷെലിനോട്​ കാര്യം തിരക്കുകയും ചെയ്​തു. ഇതുവരെ തീരുമാനമായിട്ടില്ലെന്നായിരുന്നു കോച്ചി​​​െൻറ മറുപടി. ‘‘ ആർക്കും ഒന്നാം നമ്പർ ഗോൾകീപ്പറാവാം, അത്​ പ്രകടനമനുസരിച്ചാവും’’ -കോച്ച്​ പറഞ്ഞു. ലോകകപ്പ്​ സ്​ക്വാഡിലുണ്ടായിരുന്ന ​ഫ്രഞ്ച്​ ഗോളി അൽഫോൻസ്​ ആരിയോള, ​ജർമനിയുടെ കെവിൻ ട്രാപ്പ്​, ഫ്രഞ്ചുകാരായ സെബാസ്​റ്റ്യൻ സിബോയിസ്​, റെമി ദെഷാംപ്​സ്​ എന്നിവരെല്ലാം പി.എസ്​.ജിയുടെ കാവൽപട്ടികയിലുണ്ട്​. കഴിഞ്ഞ സീസണിൽ ട്രാപ്പായിരുന്നു​ ഒന്നാം നമ്പർ ഗോൾ കീപ്പർ. 

ഒന്നാം നമ്പർ ജഴ്​സിയെക്കുറിച്ച്​ ബുഫണും സംസാരിച്ചു: ‘‘24 വർഷത്തെ എ​​​െൻറ കരിയറിനിടയിൽ ഒന്നാം നമ്പർ ജഴ്​സി എനിക്ക്​ ആരും ഒൗദാര്യമായി തന്നതല്ല. കഠിന പരിശ്രമവും പ്രകടനവുംകൊണ്ട്​ നേടിയെടുത്തതാണ്.​’’ ഏതായാലും പി.എസ്​.ജിയിലെ ഒന്നാം നമ്പർ ജഴ്​സിക്കാരനെ അറിയാൻ കാത്തിരിക്കുകയാണ്​ ആരാധകർ. നീണ്ട 17 വർഷത്തിനൊടുവിൽ ഇൗ വർഷമാണ്​ ബുഫൺ യുവൻറസ്​ വിട്ട്​ ഫ്രഞ്ച്​ ചാമ്പ്യന്മാർക്കൊപ്പം ചേരുന്നത്​. ബുഫൺ വല കാത്ത ആദ്യ രണ്ടു പ്രീസീസൺ മത്സരങ്ങളിലും പി.എസ്​.ജിക്ക്​ തോൽക്കാനായിരുന്നു വിധി. രണ്ടു മത്സരങ്ങളിൽ നാലു ഗോളുകളും താരം വഴങ്ങി.