ഒളിമ്പിക്​സ്​ വനിത ഹോക്കി; ഇന്ത്യയെ തകർത്തെറിഞ്ഞ്​ ഡച്ചുകാർ

ടോക്യോ: ഒളിമ്പിക്​സിന്‍റെ ആദ്യ ദിനത്തിൽ ഇന്ത്യക്ക്​ സന്തോഷിക്കാൻ ഒരുപാടുണ്ടെങ്കിലും സങ്കടമായി വനിത ഹോക്കി. ലോക ഒന്നാം നമ്പർ ടീമായ നെതർലൻഡ്​സിനോട്​ ഒന്നിനെതിരെ അഞ്ച്​ ഗോളുകൾക്ക്​ ഏകപക്ഷീയമായാണ്​​ ഇന്ത്യ അടിയറവ്​ പറഞ്ഞത്​. ഇന്ന്​ നടന്ന പുരുഷ ഹോക്കിയിൽ ന്യൂസിലൻഡിനെ ഇന്ത്യ 3-2ന്​ തോൽപ്പിച്ചിരുന്നു.

മത്സരത്തിന്‍റെ ആറാം മിനിറ്റിൽ തന്നെ ഫെലിസ്​ ആൽബേഴ്​സിന്‍റെ ഗോളിൽ നെതർലാൻഡ്​സ്​ മുന്നിലെത്തിയിരുന്നു. പത്താം മിനിറ്റിൽ ടീം ക്യാപ്​റ്റൻ റാണി രാംപാലിന്‍റെ ഗോളിലൂടെ ഇന്ത്യ ഒപ്പമെത്തി.

എന്നാൽ രണ്ടാം പകുതിയിൽ കൂടുതൽ കരുത്തരായ നെതർലാൻഡ്​സിനെയാണ്​ കളിക്കളം കണ്ടത്​. 33ാം മിനിറ്റിൽ വാൻ ഗെഫനിലൂടെ നെതർലൻഡ്​സ്​ ലീഡ്​ വീണ്ടെടുക്കുയായിരുന്നു. 43, 45 മിനിറ്റുകളിൽ രണ്ടുഗോളുകൾ ഞൊടിയിടക്കുള്ളിൽ ഇന്ത്യൻ വലയിലെത്തിച്ച്​ ഡച്ച്​ പട വിജയമുറപ്പിച്ചു. 52ാം മിനിറ്റിൽ വാൻ മാസാക്കറുടെ പെനൽറ്റി കോർണറിലൂടെ ഡച്ചുകാർ അഞ്ചാം ഗോളും കുറിക്കുകയായിരുന്നു. മത്സരത്തിന്‍റെ ആദ്യ പകുതിയിൽ കരുത്തുറ്റ പ്രതിരോധം കാഴ്ചവെച്ചിരുന്നെങ്കിലും രണ്ടാം പകുതിയിൽ നെതർലാൻഡ്​സ്​ ആക്രമണത്തിന്​ മുന്നിൽ ആടിയുലയുകയായിരുന്നു.