ശിഷ്യയുടെ മുഖത്തടിച്ച്​ ജുഡോ കോച്ചിന്‍റെ '​പ്രോത്സാഹനം'; താക്കീതുമായി ഫെഡറേഷൻ

ടോക്യോ: ഒളിമ്പിക്​സിനിടെ വനിത ജുഡോ താരത്തിന്‍റെ മുഖത്തടിച്ച്​ പ്രോത്സാഹിപ്പിച്ച പരിശീലകന്​ താക്കീത്​. ജർമൻ കോച്ചായ ക്ലോഡിയോ പുസയാണ് ശിഷ്യയായ​ മാർട്ടിന ട്രാജോസിനെ കോളറിൽ പിടിക്കുകയും മുഖത്തടിക്കുകയും ചെയ്​തത്​.

ദൃശ്യങ്ങൾ കണ്ട നിരവധിയാളുകളാണ്​ കോച്ചിന്‍റെ നടപടിയിൽ അതൃപ്​തി രേഖപ്പെടുത്തിയത്​. താരത്തെ പ്രചോദിപ്പിക്കാനാണ്​ കോച്ച്​ അത്തരത്തിൽ ചെയ്​തതെന്നായിരുന്നു ന്യായീകരണം. അസാധാരണ രീതിയിലുള്ള പ്രചോദനം സ്വന്തം അഭ്യർഥനയിലാണെന്ന് പറഞ്ഞ ട്രാജോസ് കോച്ചിനെ പിന്തുണച്ചു. എന്നാൽ വനിതകളുടെ 63 കിലോഗ്രാം വിഭാഗത്തിൽ 32കാരി ഹംഗറിയുടെ സോഫി ഒസ്​ബാസ് തോറ്റ്​ പുറത്തായി​.

അന്താരാഷ്​ട്ര ജുഡോ ​െഫഡറേഷനാണ്​ കോച്ച്​ പുസയെ ഔദ്യോഗികമായി താക്കീത്​ ചെയ്​തത്​. 'മത്സരത്തിനിടെ അദ്ദേഹം കാണിച്ച മോശം പെരുമാറ്റത്തിൽ ജർമൻ കോച്ചിനെതിരെ ഐ.ജെ.എഫ് ഔദ്യോഗികമായി താക്കീത്​ ചെയ്യുകയാണ്​. ജൂഡോ ഒരു വിദ്യാഭ്യാസ കായിക വിനോദമാണ്. അതിനാൽ ഇത്തരം പെരുമാറ്റം അംഗീകരിക്കാൻ സാധിക്കില്ല. അത് ജൂഡോയുടെ ധർമികതക്ക്​​ വിരുദ്ധമാണ്​' -ഐ.ജെ.എഫ്​ ട്വീറ്റ്​ ചെയ്​തു.

2016 റിയോ ഒളിമ്പിക്​സിൽ അരങ്ങേറിയ ട്രാജോസിന്​ ഇത്​ രണ്ടാമ​ത്തെ ഒളിമ്പിക്​സാണ്​. 2020ൽ താരം യൂറോപ്യൻ ചാമ്പ്യൻഷിപ്പിൽ വെങ്കലം നേടിയിരുന്നു.