'അവൾ നൽകിയ ആവേശം എന്നെ കരയിച്ചു'- ​സിന്ധുവിനെ സമൂഹമാധ്യമത്തിൽ വാഴ്​ത്തി തായ്​ സു യിങ്​

ടോകിയോ: റിയോ ഒളിമ്പിക്​സിൽ ഫൈനൽ കളിച്ച പരിചയ സമ്പത്തുമായി എത്തിയിട്ടും സെമിയിൽ മടക്കിയ കരുത്തയായ എതിരാളിക്ക്​ പി.വി സിന്ധുവിനോട്​ ആരാധന കുറയുന്നില്ല. ഫൈനലിൽ ചൈനീസ്​ താരം ചെൻ യുഫെയ്​ക്കു മുന്നിൽ അടിയറവ്​ പറഞ്ഞ്​ വെള്ളി കൊണ്ട്​ തൃപ്​തിയടയേണ്ടിവന്ന തായ്​ സു യിങ്ങാണ്​ തനിക്ക്​ ആവേശം നൽകിയ വാക്കുകളുമായി ഒപ്പംനിന്ന സിന്ധു തന്നെ ശരിക്കും കരയിച്ചെന്ന്​ സമൂഹ മാധ്യമത്തിൽ വെളിപ്പെടുത്തിയത്​.

ഒളിമ്പിക്​ ബാഡ്​മിന്‍റണിലെ ഏറ്റവും മികച്ച പോരാട്ടം കണ്ട ​ഫൈനലിൽ 21-18 19-21 21-18ന്​ തായ്​ സു യിങ്ങ​ിനെ വീഴ്​ത്തിയായിരുന്നു ലോക രണ്ടാം നമ്പർ താരം ചെൻ യൂഫെയ്​ വിജയവും സ്വർണവുമായി മടങ്ങിയത്. റാലികളേറെ കണ്ട മത്സരത്തിൽ പലവട്ടം ലീഡ്​ മാറിമറിഞ്ഞു. എതിരാളി തളർന്ന അവസാന ഘട്ടത്തിൽ തകർപ്പൻ പ്രകടനവുമായി ചൈനീസ്​ താരം നിർണായക പോയിന്‍റുകൾ സ്വന്തമാക്കുകയും ചെയ്​തു.

വനിതകളിൽ ലോക ഒന്നാം നമ്പർ പദവി ഏറ്റവും നീണ്ട കാലം സ്വന്തമാക്കി വെച്ചിട്ടും ഒളിമ്പിക്​ സ്വർണം പിന്നെയൂം വഴിമാറിയതിന്‍റെ വേദനയുമായി മെഡൽ വാങ്ങാൻ നിൽക്കു​േമ്പാഴായിരുന്നു ആശ്വാസ വാക്കുകൾ പകർന്ന്​ സിന്ധു തായ്​ സുവിന്​ അരികിൽ എത്തിയത്​. 'അവൾ എന്നെ കെട്ടിപ്പിടിച്ചു. രോഗമുണ്ടെന്നറിയാം, എന്നിട്ടും മികച്ച പ്രകടനം പുറത്തെടുക്കാനായല്ലോ. ഇന്ന്​ നിങ്ങളുടെ ദിനമായിരുന്നില്ല എന്നു പറഞ്ഞു'' തായ്​ സു ഇൻസ്റ്റഗ്രാമിൽ കുറിച്ചു.

വനിത ബാഡ്​മിന്‍റണിൽ ഏറ്റവും കൂടുതൽ ആരാധകരുള്ള താരങ്ങളിൽ മുൻനിരയിലാണ്​ തായ്​ സു. ഒളിമ്പിക്​ സ്വർണം പക്ഷേ, അവർക്ക്​ കിട്ടാക്കനിയാണ്​. സെമി അനായാസം കടന്ന്​ ഫൈനലിലെത്തിയതോടെ സ്വർണമുത്തം ഇത്തവണ സാധ്യമാകുമെന്ന​ കണക്കുകൂട്ടലുകളും അവസാനം പിഴക്കുകയായിരുന്നു. ടോകിയോ ഒളിമ്പിക്​സിനു ശേഷം വിരമിക്കുമെന്ന പ്രഖ്യാപനവും അവർ നടത്തിയിട്ടുണ്ട്​.

'ജീവിതത്തിന്‍റെ പകുതിയും ഞാൻ കളിയുമായി കഴിഞ്ഞതാണ്​. ഇനി വിശ്രമം ആലോചിക്കുന്നു''- തായ്​ സു പറയുന്നു.