'എന്‍റെ സ്വപ്​നം നീ യാഥാർഥ്യമാക്കി മകനേ'- നീരജിനെ അഭിനന്ദിച്ച്​ പി.ടി. ഉഷ

ടോക്യോ ഒളിമ്പിക്‌സില്‍ സ്വര്‍ണം നേടിയ നീരജ് ചോപ്രയെ അഭിനന്ദിച്ച് ഇന്ത്യ കണ്ട ഏറ്റവും മികച്ച അത്​ലറ്റുകളിൽ ഒരാളായ കേരളത്തിന്‍റെ സ്വന്തം പയ്യോളി എക്​സ്​പ്രസ്​ പി.ടി. ഉഷ. '37 വര്‍ഷത്തിനുശേഷം എന്‍റെ സഫലമാവാത്ത സ്വപ്‌നമാണ് നീ യാഥാര്‍ഥ്യമാക്കിയത്. നന്ദി എന്‍റെ മകനേ' എന്ന്​ വികാരനിര്‍ഭരയായി ഉഷ ട്വിറ്ററില്‍ കുറിച്ചു. നീരജിനൊപ്പമുള്ള ചിത്രവും ഉഷ പങ്കുവെച്ചു.

Realised my unfinished dream today after 37 years. Thank you my son @Neeraj_chopra1 🇮🇳🥇#Tokyo2020 pic.twitter.com/CeDBYK9kO9

— P.T. USHA (@PTUshaOfficial) August 7, 2021

ഒളിമ്പിക്‌സിന്‍റെ ചരിത്രത്തിൽ ഇന്ത്യയുടെ കണ്ണീർമുത്ത്​ ആണ്​ ഉഷ. 37 വർഷം മുമ്പ്​ ലോസ് ആഞ്ചലസില്‍ 400 മീറ്റര്‍ ഹര്‍ഡില്‍സിന്‍റെ ഫൈനലില്‍ സെക്കൻഡിന്‍റെ നൂറിലൊരംശത്തിന്‍റെ വ്യത്യാസത്തിലാണ് ഉഷയ്ക്ക് വെങ്കല മെഡല്‍ നഷ്​ടമായത്. ഇന്ത്യന്‍ കായികചരിത്രത്തിലെ തന്നെ ഏറ്റവും ഹൃദയഭേദകമായ ഈ നിമിഷത്തിന്‍റെ സങ്കടമാണ്​ സുവർണ നേട്ടത്തിലൂടെ നീരജ്​ മാറ്റിയത്​.