'ഞാൻ എന്നെ അടയാളപ്പെടുത്തി അച്ഛാ...'; മെഡൽനേട്ടത്തിന്​ പിന്നാലെ പിതാവിനെ വിളിച്ച് നീരജ്​ ​പറഞ്ഞത്​

ന്യൂഡൽഹി: ടോക്യോയിലെ സ്വർണമെഡൽ നേട്ടത്തിന്​ പിന്നാലെ നീരജ്​ ചോപ്ര ദേശീയ ഹീറോയായി മാറിയിരിക്കുകയാണ്​. നീരജിന്‍റെ സ്വർണമെഡലിന്‍റെ മികവിൽ ഒളിമ്പിക്​സ്​ പോയിന്‍റ്​ പട്ടികയിൽ 65ാം സ്​ഥാനത്തായിരുന്ന ഇന്ത്യ 48ാം സ്​ഥാനത്തെത്തിയിരുന്നു. സ്വർണമെഡൽ നേട്ടത്തിന്​ പിന്നാലെ സ്വന്തം പിതാവിനെ വിളിച്ച നീരജിന്​ സന്തോഷം അടക്കിപിടിക്കാനായില്ല.

'ഞാൻ എന്നെ അടയാളപ്പെടുത്തി അച്ഛാ...' എന്നായിരുന്നു ഒളിമ്പിക്​ സ്വർണമെഡൽ സ്വന്തമാക്കിയ ശേഷം നീരജ്​ ചോപ്ര ​പിതാവിനെ ഫോണിൽ വിളിച്ച ശേഷം ആദ്യം പറഞ്ഞ വാചകം​. രാജ്യാന്തര അത്​ലറ്റിക്​സിൽ ഇന്ത്യയുടെ അടയാളപ്പെടുത്തൽ കൂടിയായിരുന്ന ആ സ്വർണമെഡൽ. അത്​ലറ്റിക്​സിൽ ഒരു ഇന്ത്യക്കാരൻ നേടുന്ന ആദ്യ സ്വർണമെഡലാണ്​ നീരജ്​ ടോക്യോയിൽ ജാവലിൻ എറിഞ്ഞ്​ വീഴ്​ത്തിയത്​.

'ഫോണിലൂടെ ഞാൻ മകനെ അഭിനന്ദിച്ചു. രാജ്യത്തിനായി വളരെ മികച്ച ജോലിയാണ്​ അവൻ ചെയ്​തു തീർത്തതെന്ന്​ പറഞ്ഞു. ചില മാധ്യമപ്രവർത്തകരുടെ സഹായത്തോടെ മകനുമായി സംസാരിച്ച ഞാൻ നമ്മുടെ രാജ്യം എങ്ങനെയാണ്​ ഈ വിജയം കൊണ്ടാടുന്നതെന്ന കാര്യവും അറിയിച്ചു' -നീരജിന്‍റെ പിതാവ്​ സതീഷ്​ ഞായറാഴ്ച പറഞ്ഞു.

ഹരിയാനയിലെ പാനിപ്പത്തിലെ ഖന്ദ്ര ഗ്രാമം നീരജിന്‍റെ സുവർണനേട്ടത്തിൽ ആഘോഷത്തിമിർപ്പിലായിരുന്നു. മധുരം വിതരണം ചെയ്​ത ഗ്രാമീണർ ധോൽ ​വാദ്യാഘോഷങ്ങളുടെ അകമ്പടിയോടെ നൃത്തം ചവിട്ടി.

മകൻ സ്വർണമെഡലും കൊണ്ട്​ വീട്ടിലേക്ക്​ മടങ്ങി വരു​േമ്പാൾ നൽകാനായി പ്രിയപ്പെട്ട വിഭവമായ 'ചൂർമ' ഉണ്ടാക്കി കാത്തിരിക്കുകയാണ്​ മാതാവ്​ സരോജ്​ ബാല. നീരജിനും മറ്റ്​ ആറ്​ മെഡൽ ജേതാക്കൾക്കും തിങ്കളാഴ്ച സ്​പോട്​സ്​ അതോറിറ്റി ഓഫ്​ ഇന്ത്യ ന്യൂഡൽഹിയിൽ വമ്പിച്ച സ്വീകരണം ഒരുക്കിയിരുന്നു.

പുരുഷൻമാരുടെ ജാവലിൻ ത്രോയിൽ 87.58 മീറ്റർ ജാവലിൻ പായിച്ചാണ്​ നീരജ്​ ചരിത്രമെഴുതിയത്​. അഭിനവ്​ ബിന്ദ്രക്ക്​ ശേഷം വ്യക്തിഗത ഇനത്തിൽ സ്വർണം നേടുന്ന ആദ്യ ഇന്ത്യക്കാരൻ കൂടിയാണ്​ നീരജ്​. വിജയത്തിന്​ തൊട്ടുപിന്നാലെ നീരജ്​ മെഡൽ അന്തരിച്ച ഇന്ത്യൻ സ്​പ്രിന്‍റ്​ ഇതിഹാസം മിൽഖ സിങ്ങിന്​ സമർപ്പിച്ചിരുന്നു.