ഇന്ത്യൻ ​െടന്നിസിൽ ഒളിമ്പിക്​ സെലക്ഷൻ വിവാദം കത്തുന്നു; ബൊപ്പണ്ണക്കും സാനിയക്കുമെതിരെ അസോസിയേഷൻ

ന്യൂഡൽഹി: ഇന്ത്യൻ ടെന്നിസിൽ ഒളിമ്പിക്​സ്​ സെലക്ഷൻ വിവാദം കത്തുന്നു. രോഹൻ ബൊപ്പണ്ണക്ക്​ അവസരം നഷ്​ടമായതിനെ തുടർന്ന്​ താരവും മിക്​സഡ്​ ഡബിൾസ്​ പങ്കാളി സാനിയ മിർസയും ഓൾ ഇന്ത്യ ടെന്നിസ്​ ​അസോസിയേഷനെതിരെ രൂക്ഷ വിമർ​ശനവുമായി രംഗത്തെത്തിയിരുന്നു.

ടോക്യോ ഒളിമ്പിക്​സിൽ പുരുഷ വിഭാഗം ഡബിൾസിൽ തനിക്ക്​ അവസരം ലഭിക്കുമെന്ന്​ പറഞ്ഞ്​ എ.ഐ.ടി.എ തന്നെ കബളിപിച്ചുവെന്നായിരുന്നു ബൊപ്പണ്ണയുടെ ആരോപണം. സാനിയയുടെയും ബൊപ്പണ്ണയുടെയും പ്രതികരണങ്ങൾ ദൗർഭാഗ്യകരമെന്നാണ്​ ടെന്നിസ്​ അസോസിയേഷൻ വിശേഷിപ്പിച്ചത്​.

'രോഹൻ ബോപണ്ണയുടെയും സാനിയ മിർസയുടെയും ട്വിറ്റർ പോസ്റ്റുകൾ അനുചിതവും തെറ്റിദ്ധരിപ്പിക്കുന്നതുമാണ്. നിയമങ്ങളെക്കുറിച്ച് അറിവില്ലായ്​മയാണ്​ ഇവിടെ പ്രകടമാകുന്നത്​. യോഗ്യതകളെക്കുറിച്ച് അവർ ഐ.ടി.എഫിന്‍റെ നിയമാവലി പരിശോധിക്കണം'-എ.ഐ.ടി.എ പ്രസ്​താവനയിൽ പറഞ്ഞു.

ഒളിമ്പിക്​സിൽ​ പുരുഷ ഡബിൾസിന്​ ബൊപ്പണ്ണ – ദിവിജ് ശരൺ സഖ്യത്തെ അയക്കാനായിരുന്നു അസോസിയേഷൻ തീരുമാനം. എന്നാൽ സഖ്യത്തിന്​ ഡബിൾസിൽ യോഗ്യത ലഭിക്കില്ലെന്നായതോടെ ബൊപ്പണ്ണയെയും സിംഗിൾസിൽ യോഗ്യത നേടിയ സുമിത് നാഗലിനെയും സഖ്യമാക്കി അസോസിയേഷൻ രാജ്യാന്തര ഫെഡറേഷനു ശിപാർശ നൽകുകയായിരുന്നു. എന്നാൽ അവസാന ദിവസമായ ജൂൺ 22ന്​​ ശേഷം നൽകിയ ശിപാർശ ഫെഡറേഷൻ തള്ളിയതോടെയാണ്​ വിവാദങ്ങൾക്ക്​ തുടക്കം​.

'ഡബിൾസിൽ ഇന്ത്യയെ പ്രതിനിധീകരിക്കാൻ ഏറ്റവും യോഗ്യത ബൊപ്പണ്ണ–ദിവിജ് ശരൺ സഖ്യത്തിനായിരുന്നു. അവരെ നാമനിർദേശം ചെയ്തത് കൃത്യമായ തീരുമാനവുമായിരുന്നു. ദൗർഭാഗ്യവശാൽ അവർക്ക് യോഗ്യത നേടാനായില്ല. അതിനാൽ സാനിയയുടെ ട്വീറ്റും അടിസ്ഥാനരഹിതമാണ്. അവരെപ്പോലെ നിലവാരമുള്ള ഒരു താരത്തിൽനിന്ന്​ ഇത്തരം പ്രതികരണം വരുന്നത്​ അപലപനീയമാണ്' -അസോസിയേഷൻ വ്യക്തമാക്കി.

'നേരിട്ട് യോഗ്യത നേടാനുള്ള റാങ്ക്​ അവർക്ക്​ ഉണ്ടായിരുന്നില്ല. അവസരമൊരുക്കാനായി ഞങ്ങൾ പരമാവധി ശ്രമിച്ചു. ജൂലൈ 16 വരെ സാധ്യതാ പട്ടികയിൽ അഞ്ചാമതായിരുന്നു ബൊപ്പണ്ണ– ദിവിജ് സഖ്യം. അന്ന്​ തന്നെ നാഗൽ സിംഗിൾസിന്​ യോഗ്യത നേടിയതോടെയാണ് മറ്റൊരു സാധ്യത തെളിഞ്ഞത്. സിംഗിൾസ് താരങ്ങൾക്കും മത്സരിക്കാൻ പറ്റുന്നതിനാൽ സാധ്യത കൂടുതലുള്ള രോഹൻ – നാഗൽ സഖ്യത്തിന്‍റെ പേര് നിർദേശിക്കുകയായിരുന്നു' – അസോസിയേഷൻ വിശദീകരിച്ചു.

ഐ.ടി.എഫ് ഒരു വേളയിലും തനിക്കും നാഗലിനും വേണ്ടി ശിപാർശ സ്വീകരിച്ചിരുന്നില്ല. നാമനിർദേശം സമർപ്പിക്കേണ്ട അവസാന ദിവസമായ ജൂൺ 22ന്​ ശേഷം പരിക്കോ അസുഖമോ ഇല്ലാതെ ഒരു മാറ്റവും അനുവദിക്കില്ലെന്നും​ വ്യക്തമായിരുന്നുവെന്നുമാണ്​ ബൊപ്പണ്ണ ട്വിറ്ററിൽ കുറിച്ചത്​. ഈ സാഹചര്യത്തിലും തങ്ങൾക്ക് അവസരമുണ്ടെന്ന് പ്രഖ്യാപിച്ച് ഇന്ത്യൻ ടെന്നിസ് അസോസിയേഷൻ താരങ്ങളെയും സർക്കാരിനെയും മാധ്യമങ്ങളെയും വഞ്ചിച്ചുവെന്നാണ്​ ബൊപ്പണ്ണ ആരോപിച്ചത്​.

ഇത് സത്യമാണെങ്കിൽ വിഡ്​ഢിത്തവും ലജ്ജാവഹവുമാണെന്നായിരുന്നു സാനിയ ട്വീറ്റ്​ ചെയ്​തത്​. ബൊപ്പണ്ണ–നാഗർ സഖ്യത്തിന്‍റെ പേരാണ് അവസാന നിമിഷം വരെ പറഞ്ഞിരുന്നതെന്നും മെഡൽ നേടാനുള്ള സുവർണാവസരമാണ്​ നഷ്​ടമാ​യതെന്നുമായിരുന്നു സാനിയയുടെ പ്രതികരണം.

പ്രമുഖ താരങ്ങളായ റാഫേൽ നദാൽ, റോജർ ഫെഡറർ തുടങ്ങിയ പ്രമുഖർ ഒളിമ്പിക്​സിൽ നിന്ന്​ പിൻവാങ്ങിയതോടെയാണ്​ ലോകറാങ്കിങ്ങിൽ 144ാം റാങ്കുകാരനായ നാഗലിന്​ നറുക്ക്​ വീണത്​. മറ്റൊരു ഇന്ത്യൻ താരമായ പ്രജ്​നേഷ്​ ഗുണശേഖരന്​ പക്ഷേ ഒളിമ്പിക്​ യോഗ്യതയില്ല. 148ാം റാങ്കുകാരനായിരുന്നു പ്രജ്​നേഷ്​. 2016 റിയോ ഒളിമ്പിക്​സിൽ സാനിയ-ബൊപ്പണ്ണ സഖ്യം മത്സരിച്ചിരുന്നുവെങ്കിലും മെഡലൊന്നും ലഭിച്ചിരുന്നില്ല.