യു.എസ്​ ഓപൺ ഫൈനൽ: പോയിന്‍റ്​ നഷ്​ടപ്പെട്ട ദേഷ്യം റാക്കറ്റിനോട്​ തീർത്ത്​​​ ദ്യോകോവിച്​- VIDEO

ന്യയോർക്ക്​: ഞായറാഴ്ച ലോക ​പുരുഷ ടെന്നിസിലെ ഒന്നാം നമ്പർ താരമായ നൊവാക്​ ദ്യോകോവിചിന്‍റെ ദിവസമായിരുന്നില്ല. യു.എസ് ഓപൺ പുരുഷ വിഭാഗം​ സിംഗിൾസ്​ ഫൈനലിൽ റഷ്യയുടെ ഡാനിൽ മെദ്​വദേവിനോട്​ നേരിട്ടുള്ള സെറ്റുകൾക്കാണ്​ താരം അടിയറവ്​ പറഞ്ഞത്​.

ഫൈനലിന്‍റെ രണ്ടാം സെറ്റിനിടെ നാലാം ഗെയിമിൽ പോയിന്‍റ് നഷ്​ടമായ നിരാശയിൽ താരം റാക്കറ്റ്​ കോർട്ടിൽ അടിച്ച്​ പൊട്ടിച്ചു​. ​ഏറ്റവും കൂടുതൽ ഗ്രാൻഡ്​സ്ലാം നേടിയ താര​െമന്ന റെക്കോഡിനൊപ്പം ദ്യോകോയുടെ കലണ്ടർ സ്ലാം സ്വപ്​നങ്ങൾ കൂടിയാണ്​ ആർതർ ആഷെ സ്​റ്റേഡിയത്തിൽ തവിടുപൊടിയായത്​. മത്സരം കൈവിട്ടുപോകുമെന്ന നിരാശയായിരുന്നു ദ്യോകോയുടെ പ്രവർത്തിക്ക്​ പിന്നിൽ. വിഡിയോ കാണാം:

2019 യു.എസ്​ ഒപൺ റണ്ണറപ്പായ മെദ്​വദേവിന്‍റെ കന്നി ഗ്രാൻഡ്​സ്ലാം കിരീടമാണിത്​. മൂന്നാം ഗ്രാൻഡ്​സ്ലാം ഫൈനലിലാണ്​ റഷ്യൻ താരം ആദ്യ കിരീടം ചൂടിയത്​. 21 വർഷത്തിനുശേഷമാണ് ഒരു റഷ്യൻ താരം യു.എസ് ഓപ്പൺ ജേതാവാകുന്നത്​. യെവ്​ഗനി കാഫൽനികോവിനും (1996-ഫ്രഞ്ച്​ ഓപൺ, 1999-ആസ്​ട്രേലിയൻ ഓപൺ) മാരറ്റ്​ സഫിനും (2000- യു.എസ്​ ഓപൺ, 2005-ആസ്​ട്രേലിയൻ ഓപൺ) ശേഷം ഗ്രാൻഡ്​സ്ലാം ​കിരീടം ചൂടുന്ന മൂന്നാമത്തെ റഷ്യൻ പുരുഷ താരമാണ്​ മെദ്​വദേവ്​. ദ്യോകോവിചിന്​ റെക്കോഡ്​ നേട്ടം സ്വന്തമാക്കുന്നതിന്​ തടയിട്ടതിന്​ മത്സരശേഷം മെദ്​വദേവ്​ താരത്തിന്‍റെ ആരാധകരോട്​ ക്ഷമചോദിച്ചു.

52 വർഷങ്ങൾക്ക്​ മുമ്പ്​ റോഡ്​ ലാവറാണ്​ യു.എസ്​ ഓപൺ, ഫ്രഞ്ച്​ ഓപൺ, ആസ്​ട്രേലിയൻ ഓപൺ, വിംബിൾഡൺ കിരീടങ്ങൾ സ്വന്തമാക്കി കലണ്ടർ സ്ലാം തികച്ച അവസാന താരം. ദ്യോകോ റെക്കോഡ്​ എഴുതുന്നത്​ കാണാനായല 23,000ത്തോളം വരുന്ന കാണികളുടെ കൂടെ ലേവറും സന്നിഹിതനായിരുന്നു. ഇത്​ മൂന്നാം തവണയാണ്​ ദ്യോകോ യു.എസ്​ ഓപൺ ഫൈനലിൽ തോൽക്കുന്നത്​. ഡോൺ ബഡ്ജ്​ (1938) ആണ്​ കലണ്ടർ സ്ലാം നേടിയ ആദ്യ പുരുഷ താരം.