ദ്യോകോവിച്​ യു.എസ്​ ഓപൺ ഫൈനലിൽ; ഒരുജയം അകലെ കലണ്ടർ സ്ലാം

ന്യൂ​േയാർക്ക്​: ലോക ഒന്നാം നമ്പർ താരം നൊവാക്​ ദ്യോകോവിചും കലണ്ടർ സ്ലാമും തമ്മിൽ ഒരു വിജയത്തിന്‍റെ മാത്രം അകലം. റോഡ്​ ലാവറിന്​ (1969) ശേഷം പുരുഷ വിഭാഗം ടെന്നിസിൽ കലണ്ടർ സ്ലാം സ്വന്തമാക്കി ചരിത്രം രചിക്കാൻ ദ്യോകോ ഡാനിൽ മെദ്​വദേവിനെ നേരിടും.

ടോക്യോ ഒളിമ്പിക്​സ്​ ചാമ്പ്യൻ അലക്​സാണ്ടർ സ്വരേവിനെ അഞ്ച്​ സെറ്റ്​ നീണ്ടു​നിന്ന പോരാട്ടത്തിൽ മറികടന്നാണ്​​ ദ്യോകോവിച്​ യു.എസ്​ ഓപൺ ഫൈനലിൽ കടന്നത്​. സ്​കോർ: 4-6, 6-2, 6-4, 4-6, 6-2. 2019ലെ യു.എസ്​ ഓപൺ റണ്ണറപ്പായ മെദ്​വദേവ്​ കാനഡയുടെ 12ാം സീഡ്​ താരം ഫെലിക്​സ്​ ഓഗറിനെ 6-4, 7-5, 6-2ന്​ തോൽപിച്ചാണ്​ മൂന്നാം ഗ്രാൻഡ്​സ്ലാം ഫൈനൽ പ്രവേശനം നേടിയത്​.

ഞായറാഴ്ച ആർ​തർ ആഷെ സ്​റ്റേഡിയത്തിലാണ്​ റഷ്യൻ താരത്തിനെതിരെയുള്ള കലാശപ്പോരാട്ടം. ആസ്​ട്രേലിയൻ ഓപൺ ഫൈനലിന്‍റെ തനിയാവർത്തനത്തിനാണ്​ ആർതർ ആഷെ സാക്ഷ്യം വഹിക്കാൻ പോകുന്നത്​. ഇതുവരെ മുഖാമുഖം കണ്ടുമുട്ടിയപ്പോൾ 5-3ന്​ ദ്യോകോവിചിനാണ്​ മുൻതൂക്കം. ദ്യോകോയുടെ 31ാം ഗ്രാൻഡ്​സ്ലാം ​ഫൈനൽ പ്രവേശനമാണിത്​. 2021ൽ 27 ഗ്രാൻഡ്​സ്ലാം മത്സരങ്ങളിൽ പരാജയമറിയാതെ കുതിക്കുകയാണ്​ താരം.

52 വർഷങ്ങൾക്ക്​ മുമ്പ്​ റോഡ്​ ലാവറാണ്​ കലണ്ടർ വർഷത്തെ നാല്​ മേജർ കിരീടങ്ങളും അവസാനമായി സ്വന്തമാക്കിയത്​​. ഒളിമ്പിക്​സ്​ സെമിയിൽ തന്നെ തോൽപിച്ച സ്വരേവിനെ ദ്യോകോവിച്​ പകരം വീട്ടു​േമ്പാൾ ആസ്​ട്രേലിയക്കാരനായ ലാവർ കാണികളുടെ കൂട്ടത്തിലുണ്ടായിരുന്നു. കലണ്ടർ സ്ലാമിനൊപ്പം ഒളിമ്പിക്​ സ്വർണമെഡൽ കൂടി നേടി 'ഗോൾഡൻ സ്ലാം' എന്ന അതുല്യ നേട്ടം തികക്കാനുള്ള അവസരം സെർബിയൻ താരത്തിന്​ നഷ്​ടമായിരുന്നു.

നാലാം യു.എസ്​ ഓപണും 21ാം ഗ്രാൻഡ്​സ്ലാം കിരീടവുമാണ്​ ദ്യോകോവിച്​ ലക്ഷ്യമിടുന്നത്​. ഇതിഹാസ താരങ്ങളായ റാഫേൽ നദാലിനും റോജർ ഫെഡററിനും 20 ഗ്രാൻഡ്​സ്ലാം കിരീടങ്ങൾ വീതമാണുള്ളത്​.

യു.എസിന്‍റെ ആന്ദ്രേ അഗാസിക്ക് (35 വയസ്സ്​-2005)​ ശേഷം യു.എസ്​ ഓപൺ ഫൈനലിലെത്തുന്ന ഏറ്റവും പ്രായം കൂടിയ താരമായി ദ്യോകോവിച്​. കെൻ റോസ്​വെലിന്​ ശേഷം ജേതാവാകുന്ന (35 വയസ്സ്​-1970) പ്രായം കൂടിയ താരമാകാനുള്ള അവസരം കൂടിയാണ്​ കൈവന്നിരിക്കുന്നത്​.