രാത്രി കാല കർഫ്യൂ പാലിക്കാൻ കാണികളെ ഇറക്കിവിട്ട്​ ഫ്രഞ്ച്​ ഓപൺ സെമി; കാണാനാളില്ലാതെ ദ്യോകോ ജയം

പാരിസ്​: ഇഷ്​ടതാരം ദ്യോകോവിച്ച്​ റാ​ക്കറ്റേന്തുന്ന ആവേശപ്പോരിനൊപ്പം ആർത്തുവിളിക്കാനെത്തിയ 5,000 കാണികളെ കളി പാതിയിൽ നിൽക്കെ ഇറക്കിവിട്ട ഫ്രഞ്ച്​ ഓപൺ ​സെമി പുതുമയായി. ഇറ്റലിയുടെ മാറ്റിയോ ബെററ്റിനിക്കെതിരായ മത്സരത്തിന്‍റെ ആദ്യ രണ്ടു സെറ്റ്​ ദ്യോകോവിച്ചും മൂന്നാമത്തേത്​ എതിരാളിയും​ പിടിച്ച ശേഷമായിരുന്നു രാത്രി കാല കർഫ്യു പാലിക്കാനായി ഇടക്ക്​ നിർത്തിവെച്ചത്​. ബഹളംവെച്ച്​ മൈതാനം വിട്ട കാണികൾ പോയിക്കഴിഞ്ഞതോടെ ഗാലറിയുടെ നിശ്ശബ്​ദതക്കൊപ്പം കളിച്ച്​ സെർബിയൻ താരം ജയം പിടിക്കുകയായിരുന്നു.

ഇതോടെ ഫ്രഞ്ച്​ ഓപണിൽ രണ്ടു ഇതിഹാസങ്ങൾ നേരത്തെ മുഖാമുഖം വരും. 14 ാം കിരീടം തേടുന്ന നദാലിനെ വീഴ്​ത്താനായാൽ ഏറ്റവും കൂടുതൽ ഗ്രാന്‍റ്​സ്ലാമുകൾ സ്വന്തമാക്കുന്ന താരത്തിനായുള്ള പോരിൽ ദ്യോകോ കൂടുതൽ അടുത്തെത്തും. നിലവിൽ നദാലിന്​ 20ഉം ദ്യോകോവിച്ചിന്​ 18ഉം കിരീടങ്ങളാണുള്ളത്​. ഫെഡററും 20 എണ്ണം സ്വന്തമാക്കിയിട്ടുണ്ടെങ്കിലും താരം​ നേരത്തെ പുറത്തായിരുന്നു.

സ്​​റ്റെഫാനോസ്​ സിറ്റ്​സിപാസ്​- അലക്​സാണ്ടർ സ്വരേവ്​ സെമി ജേതാക്കളാകും ഫൈനലിൽ എതിരാളി.

പാരിസ്​ നഗരത്തിൽ രാത്രി ഒമ്പതു മണി മുതൽ കർഫ്യൂ നിലനിൽക്കുന്നതിനാൽ വൈകി​ നടന്ന മുൻ മത്സരങ്ങൾ കാണികളില്ലാതെയായിരുന്നു. എന്നാൽ, ബുധനാഴ്ച ഇളവ്​ അനുവദിച്ചതോടെ ഇരച്ചെത്തിയത്​ 5,000 കാണികൾ. ആദ്യ രണ്ടു സെറ്റ്​ ദ്യോകോക്കൊപ്പം നിന്നതോടെ മൂന്നാം സെറ്റും താരം പൂർത്തിയാക്കി കളി അവസാനിക്കുമെന്നായിരുന്നു കണക്കുകൂട്ടൽ. പക്ഷേ, കളി മുറുക്കിയ ബെററ്റിനി മൂന്നാം സെറ്റ്​ പിടിച്ചു. 11 മണിയായതോടെ അടുത്ത സെറ്റ്​ ആരംഭിക്കുംമു​െമ്പ താരങ്ങൾ മടങ്ങിയതുകണ്ട്​ ഗാലറി നിശ്ശബ്​ദമായി.കോവിഡ്​ കർഫ്യൂ അറിയിച്ച്​ അറിയിപ്പ്​ മുഴങ്ങിയതോടെ കൂകിവിളിച്ച്​ മൈതാനംവിട്ടിറങ്ങിയ കാണികൾ പോയിക്കഴിഞ്ഞ്​ നാലാം സെറ്റും പിടിച്ച്​ ദ്യോകോ സെമിപ്രവേശനം ഉറപ്പാക്കുകയും ചെയ്​തു.

പകലിൽ നദാലിന്‍റെ ക്വാർട്ടർ പോരാട്ടം നേരത്തെ അവസാനിച്ചിട്ടും ദ്യോകോവിച്ചിന്‍റെ മത്സരം പാതി കാണികളില്ലാതെ നടത്തേണ്ടിവന്നതിൽ സംഘാടക​രുടെ പിടിപ്പുകേടും ആരോപിക്കപ്പെടുന്നുണ്ട്​. രണ്ടു മണിക്കൂർ നേരമാണ്​ മൈതാനം ഒഴിഞ്ഞുകിടന്നത്​.