ആസ്ട്രേലിയൻ ഓപൺ; ദ്യോകോവിചിന് ജയം

മെൽബൺ: 25ാം ഗ്രാൻഡ് സ്ലാം കിരീടവും ലോക റെക്കോഡും ലക്ഷ്യമിടുന്ന സെർബിയൻ സൂപ്പർതാരം നൊവാക് ദ്യോകോവിച് ആസ്ട്രേലിയൻ ഓപണിൽ ആദ്യ കടമ്പ കടന്നു. പുരുഷ സിംഗ്ൾസ് ഒന്നാം റൗണ്ടിൽ ക്രൊയേഷ്യൻ കൗമാരക്കാരൻ ദിനോ പ്രിസ്മിച്ചിനെയാണ് തോൽപിച്ചത്. സ്കോർ: 6-1, 6-7, 6-3, 6-4.

ഏറ്റവും കൂടുതൽ ഗ്രാൻഡ് സ്ലാം കിരീടങ്ങളെന്ന ആസ്ട്രേലിയക്കാരി മാർഗരറ്റ് കോർട്ടിന്റെ (24) റെക്കോഡിനൊപ്പമാണ് ദ്യോകോയിപ്പോൾ. ആസ്ട്രേലിയൻ ഓപൺ നേടിയാൽ 25 കിരീടങ്ങളുമായി മുന്നിലെത്തും. ആസ്ട്രേലിയൻ ഓപണിൽ ഏറ്റവുമധികം ചാമ്പ്യനായതും കോർട്ട് (11) തന്നെ. 10 കിരീടങ്ങളുമായി ദ്യോകോവിച് മറ്റൊരു റെക്കോഡിന് അരികിലുണ്ട്.