തൻെറ വിളി കേട്ട്​ കോമയിൽ നിന്നുണർന്ന കൗമാരക്കാരിയെ കാണാൻ ടോട്ടിയെത്തി

റോം: തൻെറ ശബ്​ദം ശ്രവിച്ച്​ ഒമ്പത്​ മാസം നീണ്ട നിദ്രയിൽ നിന്നുണർന്ന്​ പുതുജീവിതത്തിലേക്ക്​ കടന്ന്​ വന്ന കൗമാരക്കാരിയായ ഫുട്​ബാൾ താരത്തെ ഇറ്റാലിയൻ ഇതിഹാസം ഫ്രാൻസിസ്​കോ ടോട്ടി സന്ദർശിച്ചു.

ലാസിയോ വനിത ടീം അംഗമായിരുന്നുവെങ്കിലും നഗരവൈരികളായ ​റോമയുടെ കടുത്ത ആരാധികയായിരുന്നു ഇലേനിയ മാറ്റിലിയെന്ന 19കാരി. കഴിഞ്ഞ ഡിസംബറിൽ കാർ അപകടത്തിലാണ്​ അബോധാവസ്​ഥയിലായത്​. അപകടത്തിൽ വാഹനം ഒാടിച്ച സുഹൃത്ത്​ മാർടിന ഓറ മരിച്ചിരുന്നു.

ചികിത്സ വേളയിൽ ഇലേനയുടെ മാതാപിതാക്കൾ സ്​ഥിരമായി റോമയുടെ ഔദ്യോഗിക ഗാനം അവളെ കേൾപിക്കുമായിരുന്നു. മാസങ്ങൾക്ക്​ മുമ്പാണ്​ ഇലേനിയയെ അഭിസംബോധന ചെയ്​ത്​ ടോട്ടി വിഡിയോ സന്ദേശം അയച്ചത്​. അത്ഭുതമെന്ന്​ പറയ​ട്ടെ തൻെറ ഇഷ്​ടതാരത്തെ സ​ന്ദേശം കേട്ട അവൾ ഉറക്കമുണർന്നു.

അവളെ വിളിച്ച്​​ റോമ ഇതിഹാസ താരം ഇങ്ങനെ പറഞ്ഞു 'ഇലേനിയ വിട്ടുകൊടുക്കരുത്​. നിനക്കതിന്​ കഴിയും. ഞങ്ങളെല്ലാവരും നിന്നോടൊപ്പമുണ്ട്'​. തിങ്കളാഴ്​ചയാണ്​ കോമയിൽ നിന്നുണർന്ന ഇലേനിയയെ കാണാനായി മുമ്പ്​ വാഗ്​ദാനം ചെയ്​ത പോലെ 43കാരനായ ടോട്ടി എത്തിയത്​.

'അവൾ എന്നെ നോക്കി ചിരിച്ചു, എന്നെ കെട്ടിപ്പിടിച്ച ഉടനെ കരയാൻ തുടങ്ങി. ആശുപത്രിയിൽ നിന്നും ഇറങ്ങിയ ശേഷം ഞങ്ങൾ വീണ്ടും കണ്ടുമുട്ടും ' -ഇലേനെയെ സന്ദർശിച്ച ശേഷം ടോട്ടി മാധ്യമപ്രവർത്തകരോട്​ പറഞ്ഞു.

ചികിത്സയിൽ തുടരുന്ന ഇലേനക്ക്​ സംസാരശേഷി തിരിച്ചുകിട്ടിയിട്ടില്ല. എന്നാൽ ആംഗ്യ ഭാഷയിലൂടെയും ടാബ്​ലെറ്റിലൂടെയും തനിക്ക്​ പറയാനുള്ള കാര്യങ്ങൾ പങ്കുവെക്കുകയാണിപ്പോൾ.

2006ൽ ലോകകപ്പ്​ നേടിയ ഇറ്റാലിയൻ ടീമിൽ അംഗമായിരുന്ന ടോട്ടി 25 വർഷത്തെ സുദീർഘമായ കരിയറിൽ റോമക്കായാണ്​ ബൂട്ടണിഞ്ഞത്​.