ഫെറൻവാറോസ്​: വീര്യം വീണ്ടെടുക്കുന്ന മഗ്യാർസ്​

ബുഡപെസ്​റ്റ്​: ​ഇന്ന്​ രാത്രി ബാഴ്​സലോണക്കു​ മുന്നിൽ കോട്ടകെട്ടാനൊരുങ്ങുന്ന '​ഫെറൻവാറോസ്' എന്ന ഹ​ംഗേറിയൻ ക്ലബി​െൻറ ആകെ മൂല്യം 25 ദശലക്ഷം യൂറോ (215 കോടി രൂപ) വരും. എന്നുവെച്ചാൽ, ബാഴ്​സലോണയിൽനിന്ന്​ ലയണൽ മെസ്സി വാങ്ങുന്ന ഏതാനും മാസത്തെ ശമ്പളം മാത്രം (മെസ്സിയുടെ വാർഷിക ശമ്പളം 763 കോടി രൂപ)​.

ഇത്രയേറെ അന്തരമുണ്ട്​ ബാഴ്​സലോണയും ചാമ്പ്യൻസ്​ ലീഗ്​ ഗ്രൂപ്​ റൗണ്ടിൽ അവരുടെ ആദ്യ എതിരാളിയായ ​ഫെറൻവാറോസും തമ്മിൽ.

ആരാണ്​ ഇൗ ഫെറൻവാറോസ്​. പുതിയകാല യൂറോപ്യൻ ക്ലബ്​ ഫുട്​ബാൾ പരിസരങ്ങളിൽ പുതുമുഖമാണ്​ ഇൗ ഹ​ംഗേറിയൻ ക്ലബ്​. യൂറോപ്യൻ ലീഗുകൾക്കും ക്ലബുകൾക്കും ലോകമെങ്ങും ആരാധകർ സൃഷ്​ടിക്കപ്പെടുകയും ടി.വി സംപ്രേഷണം ലോകവ്യാപകമാവുകയും സമൂഹമാധ്യമങ്ങൾ സജീവമാവുകയും ചെയ്​ത കഴിഞ്ഞ പതിറ്റാണ്ടുകളിൽ കാണാമറയത്തായിരുന്നു ഇവർ.

121 വർഷത്തെ പാരമ്പര്യമുണ്ട് ക്ലബിന്​​. ഹ​​ംഗേറിയൻ ലീഗിൽ 31 തവണ ചാമ്പ്യന്മാർ. പക്ഷേ, യൂ​േറാപ്പിലെ വമ്പൻ പോരാട്ടവേദിയിലേക്ക്​ 25 വർഷത്തിനുശേഷമാണ്​ ഫെറൻവാറോസ്​ വരുന്നത്​. ആഗസ്​റ്റിൽ നടന്ന യോഗ്യതാ റൗണ്ടിലെ നാലു​ മത്സരങ്ങൾ പിന്നിട്ട്​ 1995നുശേഷം ആദ്യ ചാമ്പ്യൻസ്​ ലീഗ്​ പ്രവേശനം. അതാവ​െട്ട, ലോക ഫുട്​ബാളി​െല സൂപ്പർതാരങ്ങളായ ലയണൽ മെസ്സിയും ക്രിസ്​റ്റ്യാനോ റൊണാൾഡോയും അണിനിരക്കുന്ന മരണഗ്രൂപ്പിലും.

എന്നാൽ, പുതിയകാല ആരാധകർ അറിഞ്ഞിരിക്കേണ്ട ത്രസിപ്പിക്കുന്ന ചരി​ത്രമുണ്ട്​ ​ഹ​ംഗേറിയക്കാരുടെ ഗ്രീൻ ഇൗഗ്​ൾസിന്​. 1970കളിലെ ലിവർപൂളി​െൻറ സ്വപ്​നസംഘത്തെ തകർത്ത്​ മുന്നേറിയ യൂറോപ്യൻ പോരാട്ടം. 1975 യുവേഫ വിന്നേഴ്​സ്​ കപ്പി​െൻറ ഫൈനലിൽ ഡൈനാമോ കിയവിനോട്​ തോറ്റായിരുന്നു ആ കുതിപ്പ്​ അവസാനിച്ചത്​.

അതിനുംമുമ്പ്​ 1967ൽ മറ്റൊരു യൂറോപ്യൻ പോരാട്ടത്തിൽ (ഇൻറർ സിറ്റീസ്​ ഫെയേഴ്​സ്​ കപ്പ്​) ഫൈനലിൽ യുവൻറസിനെ വീഴ്​ത്തി ചാമ്പ്യന്മാരുമായി. അന്ന്​ ഇൗഗ്​ൾസിനെ തോളിലേറ്റിയ ഫോർവേഡ്​ ​േഫ്ലാറിയാൻ ആൽബർട്ട്​ ​േഫ്ലാറിയാൻ യൂറോപ്പിലെ മികച്ച താരത്തിനുള്ള ബാലൺ ഡി ഒാറും നേടി.

പിന്നീട്​, പ്രതാപം നഷ്​ടമായ ഫെറൻ​വാറോസ്​ ഉയിർത്തെഴുന്നേൽക്കുകയാണിപ്പോൾ. യൂറോപ്യൻ റാങ്കിങ്ങിൽ 118ാം സ്​ഥാനത്തും ചാമ്പ്യൻസ്​ ലീഗ്​ ഗ്രൂപ്​ റൗണ്ടിൽ ഏറ്റവും അവസാന റാങ്കുകാരുമാണ്​ അവർ.

എങ്കിലും, ഫെറങ്ക്​ പുഷ്​കാസി​െൻറയും ​േഫ്ലാറിയാൻ ആൽബർട്ടി​െൻറയും ഫെറങ്ക്​ ബെനെയുടെയും പ്രതാപത്തിലേക്ക്​ തിരികെയെത്താൻ കൊതിക്കുന്ന ഹംഗേ​റിയൻ കാൽപന്തുവീര്യമായ 'മഗ്യാർസി​െൻറ' പ്രതീകമാണ്​ ഫെറൻവാറോസ്​.