ഫ്രഞ്ച്​ ഒാപൺ: ബാർതിക്ക്​ കിരീടം; തീം x നദാൽ പുരുഷ ഫൈനൽ

പാരിസ്​: ഫ്രഞ്ച്​ ഒാപൺ വനിത കിരീടം ആസ്​ട്രേലിയയുടെ എട്ടാം സീഡ്​ ആഷ്​ലീഗ്​ ബാർതിക്ക്​. ഫൈനലിൽ സീഡ്​ ചെയ്യപ്പെ ടാത്ത മർകെറ്റ്​ വോൻ​ഡ്രൗസോവയെ നേരിട്ടുള്ള സെറ്റുകൾക്കാണ്​ 23കാരി തകർത്തത്​. സ്​കോർ: 6-1, 6-3. ബാർതിയുടെ കന്നി ഗ ്രാൻഡ്​സ്ലാം കിരീടമാണിത്​. ഇൗ വർഷം ആസ്​ട്രേലിയൻ ഒാപണിൽ ക്വാർട്ടർ ഫൈനലിലെത്തിയതായിരുന്നു ഇതിനുമുമ്പത്തെ മികച്ച നേട്ടം.

പുരുഷ വിഭാഗത്തിൽ ഒരേസമയം നാല്​ ഗ്രാൻഡ്​സ്ലാം കിരീടങ്ങളും കൈവശം വെക്കുന്ന അപൂർവനേട്ടത്തിലേക്ക്​ ഫ്രഞ്ച്​ ഒാപണിൽ ടോപ്​ സീഡ്​ നൊവാക്​ ദ്യോകോവിചിന്​ റാ​ക്കറ്റേന്താനായില്ല. അഞ്ച്​ സെറ്റ്​ നീണ്ട മാരത്തൺ സെമിയിൽ സെർബിയൻ താരത്തെ വീഴ്​ത്തി നാലാം സീഡ്​ ആസ്​ട്രിയയുടെ ഡൊമിനിക്​ തീം തുടർച്ചയായ രണ്ടാം ഫൈനലിലേക്ക്​ കുതിച്ചു. സ്​കോർ: 6-2, 3-6, 7-5, 5-7, 7-5. കഴിഞ്ഞ തവണത്തേതി​​​െൻറ ആവർത്തനമായ കലാശപ്പോരിൽ തീം ഞായറാഴ്​ച​ പാരിസിലെ കളിമൺ കോർട്ടിൽ 12ാം കിരീടം തേടുന്ന രണ്ടാം സീഡ്​ സ്​പെയ്​നി​​​െൻറ റാഫേൽ നദാലിനെ നേരിടും.

വെള്ളിയാഴ്​ച ഒാരോ സെറ്റ്​ പങ്കിട്ട്​ നിൽക്കവെ മഴ മൂലം തടസ്സപ്പെട്ട മത്സരം ശനിയാഴ്​ച പുനരാരംഭിച്ചപ്പോൾ അടുത്ത രണ്ട്​ സെറ്റുകളും ഇരുവരും പങ്കിട്ടു. നിർണായക അവസാന സെറ്റിൽ 4-1ന്​ തീം മുന്നിൽ നിൽക്കവെ വീണ്ടും മഴ. തിരിച്ചെത്തിയപ്പോൾ 5-3ന്​ രണ്ട്​ മാച്ച്​ പോയൻറുമായി സർവ്​ ചെയ്​ത തീം സമ്മർദത്തിനടിപ്പെട്ടപ്പോൾ തിരിച്ചടിച്ച ദ്യോകോ 5 -5ന്​ ഒപ്പംപിടിച്ചു. എന്നാൽ, 6-5ൽ ഒരിക്കൽ കൂടി മാച്ച്​ പോയൻറിലെത്തിയ തീം ഇത്തവണ അവസരം കൈവിട്ടില്ല.